Read Jarai Luk 1 Bible Online

Luk 1 - Jarai bible

Luk 1

¹Ơ Theophilos khăp, Ih thâo laih hơmâo lu mơnuih hơmâo gir čih laih hơdôm bruă Yêsu hơmâo ngă laih tơdang Ñu dŏ tŏng krah ƀing gơmơi.

²Ƀing gơñu hơmâo čih laih tui hăng tơlơi ră ruai ƀing gơmơi hơmư̆ mơ̆ng ƀing ƀuh laih bruă anŭn blung hlâo hăng mơta gơñu pô, jing tui hăng ƀing ding kơna mă bruă pơtô laih tơlơi pơthâo hiam.

³Tui anŭn yơh, Ơ Theophilos pơpŭ ăh, yuakơ kâo pô hơmâo kơsem hrăm pơñen laih abih bang bruă anŭn čơdơ̆ng mơ̆ng phŭn, ăt jing hiam kơ kâo mơ̆n kiăng čih tơlơi ră ruai tŏ tơroai anai kơ ih.

⁴Tui anŭn, ih či dưi thâo hluh sĭt kơ abih bang tơlơi arăng hơmâo pơtô laih kơ ih mơ̆ng hlâo.

⁵Amăng rơnŭk Hêrôd ngă pơtao amăng kwar Yudea, hơmâo sa čô khua ngă yang kơ Ơi Adai mơ̆ng kơnung djuai khua ngă yang grup ƀing Abiyah anăn ñu Zakharias. Zakharias hăng bơnai ñu HʼElisabet le̱ng kơ mơ̆ng kơnung djuai khua ngă yang prŏng hloh A̱rôn.[1]

⁶Ƀing gơñu ăt hơdip djơ̆ tơpă mơ̆n ƀơi anăp Ơi Adai laih anŭn tui gưt abih bang khul tơlơi juăt tơlơi phiăn Khua Yang tơl arăng ƀu thâo ƀuăh ƀing gơñu ôh.

⁷Samơ̆ ƀing gơñu ƀu hơmâo ană ôh yuakơ HʼElisabet jing đah kơmơi plao laih anŭn ră anai abih dua gơñu le̱ng kơ tha laih.

⁸Hơmâo sa wơ̆t, tơdang grup ƀing Zakharias grơ̆ng glăm kơ bruă ngă yang, Zakharias mă bruă ñu anŭn amăng Sang Yang ƀơi anăp Ơi Adai.

⁹Arăng ruah mă djơ̆ laih anăn ñu hăng mă čram tui hăng tơlơi juăt ƀing khua ngă yang, tui anŭn ñu mŭt pơ Sang Yang Khua Yang kiăng kơ čuh gơnam ƀâo hiam.

¹⁰Abih bang mơnuih truh laih pơ anŭn dŏ pơjơnum iâu laĭ amăng wăl tơdron gah rơngiao kơ Sang Yang tơdang djơ̆ mông Zakharias nao čuh gơnam ƀâo hiam.

¹¹Giŏng anŭn, hơmâo ha čô ling jang hiam Khua Yang blĭp blăp pơƀuh rai kơ Zakharias gah hơnuă kơ kơnưl kơƀa̱ng pioh čuh gơnam ƀâo hiam.

¹²Tơdang Zakharias ƀuh ling jang hiam anŭn, ñu kơtuă tơtư̆ djhir djhar laih anŭn huĭ biă mă.

¹³Samơ̆ ling jang anŭn laĭ kơ ñu tui anai, “Ơ Zakharias hơi! Anăm ih huĭ ôh, yuakơ Ơi Adai hơmâo hơmư̆ laih tơlơi ih iâu laĭ. Bơnai ih HʼElisabet či tơkeng kơ ih sa čô ană đah rơkơi laih anŭn ih či pơanăn ñu Yôhan.

¹⁴“Ñu či jing sa tơlơi sŭ mơak prŏng kơ ƀing gih yơh laih anŭn lu mơnuih či hơ̆k kơdơ̆k yuakơ tơlơi tơkeng rai kơ ană anŭn.

¹⁵Laih anŭn dơ̆ng, Ơi Adai či yap ñu jing mơnuih yom prŏng yơh, tui anŭn ñu ƀu dưi mơñum tơpai ôh kŏn dưi yua tơpai măt lơi, samơ̆ ñu či bă blai hăng Yang Bơngăt Hiam čơdơ̆ng mơ̆ng mông ñu ăt dŏ amăng kian amĭ ñu.[2]

¹⁶Ñu či ba lu ƀing ană plei Israel kơhma̱l glaĭ đaŏ kơ Khua Yang Ơi Adai gơñu.

¹⁷Ñu či nao hlâo kơ Khua Yang kar hăng sa čô mơnuih pơkra jơlan kơ sa čô pơtao. Ñu či hơmâo bơngăt jua dưi mơyang kar hăng Êliyah, kiăng kơ ba pran jua ƀing ama pơrơno̱m glaĭ hăng ƀing ană bă gơñu, laih anŭn ba ƀing mơnuih ƀu gưt kơ Ơi Adai wơ̆t glaĭ kơ tơlơi rơgơi tơpă hơnơ̆ng, anŭn yơh jing tơlơi ñu prap rơmet ƀing ană plei kiăng kơ tŭ ju̱m Khua Yang.”[3]

¹⁸Samơ̆ Zakharias tơña kơ ling jang hiam anŭn tui anai, “Hiư̆m pă kâo dưi thâo tơlơi anŭn či truh sĭt lĕ? Ih thâo laih, dua rơkơi bơnai gơmơi ăt tha laih mơ̆n.”

¹⁹Ling jang hiam anŭn laĭ glaĭ kơ ñu, “Anăn kâo Gabriel; kâo dŏ ƀơi anăp Ơi Adai laih anŭn Ñu pơkiaŏ rai kâo pơhiăp kiăng ră ruai kơ ih tơlơi pơthâo hiam anai.[4]

²⁰Anai nê, Ih či kơmlô hĭ yuakơ ih ƀu đaŏ ôh kơ khul tơlơi kâo pơhiăp laih anŭn ih ƀu či thâo pơhiăp ôh tơl truh hrơi tơlơi anai truh hĭ. Tơlơi anai či truh ƀơi hrơi mông găl gơñu yơh.”

²¹Tơdang anŭn, ƀing ană plei hlak dŏ tơguan Zakharias laih anŭn ƀing gơñu pơmĭn hli̱ng hla̱ng yơh yuakơ Zakharias dŏ sui biă mă amăng Sang Yang.

²²Hơnăl tuč, tơdang Zakharias tơbiă mơ̆ng Sang Yang anŭn, ñu ƀu thâo pơhiăp hăng ƀing gơ̆ ôh. Ñu gir pơhiăp hăng ƀing gơ̆ samơ̆ ƀu thâo ôh, tui anŭn ñu ngă gru kơnăl hăng tơngan ñu kiăng pơhiăp hăng ƀing ană plei. Tui anŭn, ƀing ană plei thâo krăn yơh ñu hơmâo ƀuh laih tơlơi pơƀuh amăng Sang Yang.

²³Tơdang hrơi ñu ngă yang giŏng laih, ñu glaĭ pơ sang ñu pô.

²⁴Tơdơi ƀiă kơ anŭn, bơnai ñu HʼElisabet pi kian yơh. HʼElisabet pơdŏp hĭ ñu pô amăng sang rơma blan, ƀu brơi arăng ƀuh ñu ôh.

²⁵Ñu pơmĭn tui anai, “Anai yơh jing tơlơi Khua Yang hơmâo ngă laih kơ kâo. Amăng hrơi mông anai yơh Ñu hơmâo pơrơđah laih tơlơi pap Ñu kơ kâo kiăng kơ mă pơđuaĭ hĭ tơlơi mlâo kâo ƀơi anăp mơnuih.”

²⁶Giŏng anŭn, tơdang HʼElisabet pi kian amăng năm blan laih, Ơi Adai pơkiaŏ ling jang hiam Ñu Gabriel nao pơ plei Nazaret amăng kwar Galilê.

²⁷Ñu nao pơ sa čô dra hơči̱h hơmâo djă̱ kong laih hăng sa čô tơdăm anăn gơ̆ Yôsêp, jing mơ̆ng kơnung djuai pơtao Dawid. Anăn dra anŭn jing HʼMari.[5]

²⁸Ling jang hiam anŭn pơƀuh rai kơ dra anŭn laih anŭn laĭ tui anai, “Kơkuh kơ ih, Ơ pô Ơi Adai khăp pap hơi, Khua Yang dŏ hrŏm hăng ih.”

²⁹HʼMari rŭng răng biă mă tơdang ñu hơmư̆ tơlơi ling jang hiam anŭn pơhiăp kar hăng anŭn laih anŭn Ñu pơmĭn amăng pran jua ñu pô tui anai, “Hơget tơlơi kơkuh anai kiăng laĭ lĕ?”

³⁰Samơ̆ ling jang hiam anŭn laĭ kơ ñu, “Ơ HʼMari, anăm ih huĭ ôh, yuakơ ih hơmâo tơlơi khăp pap laih ƀơi anăp Ơi Adai.

³¹Ih či pi kian laih anŭn tơkeng kơ sa čô ană đah rơkơi; giŏng anŭn ih khŏm pơanăn Ñu Yêsu.[6]

³²Ñu či jing pô yom pơphan prŏng laih anŭn arăng či iâu Ñu Ană Đah Rơkơi Pô Glông Hloh yơh. Khua Yang či brơi kơ Ñu jing pơtao kar hăng ơi adon Ñu Dawid yơh kiăng kơ git gai wai lăng.

³³Tui anŭn, Ñu či git gai wai lăng nanao kơnung djuai Yakôb laih anŭn dêh čar Ñu ƀu thâo đŭt hĭ ôh.”[7]

³⁴HʼMari tơña kơ ling jang hiam anŭn tui anai, “Hiư̆m ngă tơlơi anai thâo truh lĕ, yuakơ kâo aka dŏ hrŏm hăng đah rơkơi ôh?”

³⁵Ling jang hiam anŭn laĭ glaĭ kơ HʼMari tui anai, “Yang Bơngăt Hiam či trŭn ƀơi ih laih anŭn tơlơi dưi mơyang Pô Glông Hloh či go̱m hĭ ih kar hăng tơu. Tui anŭn, Ană Nge ih tơkeng rai či jing Pô Rơgoh Hiam laih anŭn arăng či iâu Ñu jing Ană Đah Rơkơi Ơi Adai yơh.

³⁶Adơi ai ih HʼElisabet, wơ̆t tơdah ñu jing đah kơmơi plao, samơ̆ ñu ăt či hơmâo rai sa čô ană mơ̆n amăng thŭn tha gơ̆. Ră anai ñu pi kian hlak năm blan laih,

³⁷yuakơ ƀu hơmâo tơlơi hơget ôh Ơi Adai ƀu dưi ngă.”[8]

³⁸HʼMari laĭ glaĭ, “Kâo jing ding kơna Khua Yang. Brơi bĕ tơlơi anŭn truh kar hăng ih hơmâo laĭ laih.” Giŏng anŭn, ling jang hiam anŭn đuaĭ hĭ mơ̆ng gơ̆.

³⁹Tơdơi kơ anŭn, HʼMari prap rơmet laih anŭn ječ ameč nao pơ plei Zakharias dŏ amăng anih bŏl čư̆[9] kwar Yudea.

⁴⁰Ñu mŭt nao amăng sang Zakharias laih anŭn ñu pơhiăp kơkuh hăng HʼElisabet.

⁴¹Tơdang HʼElisabet hơmư̆ asăp HʼMari pơhiăp kơkuh hăng ñu, ană amăng kian ñu pơpư̆ kơtang laih anŭn HʼElisabet bă blai hăng Yang Bơngăt Hiam ƀơi mông anŭn mơtam.

⁴²HʼElisabet pơhiăp hăng HʼMari kraih krin tui anai, “Mơyŭn hiam yơh kơ ih hloh kơ abih bang ƀing đah kơmơi pơkŏn laih anŭn mơyŭn hiam yơh kơ ană ih hlak dŏ pi kian anŭn!

⁴³Yua hơget Khua Yang pơpŭ pơyom kơ kâo tơl amĭ Khua Yang kâo rai čuă ngui kâo lĕ, yuakơ kâo ƀu năng lăp ôh?

⁴⁴Kâo thâo ih či jing amĭ kơ Khua Yang kâo yơh yuakơ tơdang kâo hơmư̆ asăp ih pơhiăp kơkuh hăng kâo, ană amăng kian kâo pơpư̆ hơ̆k kơdơ̆k.

⁴⁵Ơi Adai bơni hiam kơ ih yuakơ ih hơmâo đaŏ laih kơ tơlơi Khua Yang hơmâo pơtă laih kơ ih či kiăp truh sĭt yơh!”

⁴⁶Giŏng anŭn, HʼMari bơni hơơč tui anai: “Pran jua kâo bơni hơơč kơ Khua Yang.

⁴⁷Ñu brơi jua bơngăt kâo hơ̆k kơdơ̆k yuakơ Ñu jing Pô Pơklaih kâo,

⁴⁸yuakơ Ñu ăt pơmĭn ƀlơ̆ng kơ kâo, jing ding kơna Ñu anai, wơ̆t tơdah kâo jing pô ƀu yom pơphan ôh. Čơdơ̆ng mơ̆ng hrơi anai truh kơ abih bang rơnŭk pơanăp lu mơnuih či yap kơ kâo mơnuih Ơi Adai bơni hiam,[10]

⁴⁹yuakơ Pô Dưi Kơtang hơmâo ngă khul tơlơi yom prŏng kơ kâo. Anăn Ñu jing rơgoh hiam yơh.

⁵⁰Ñu pơrơđah tơlơi pap kơ ƀing hlơi pô thâo huĭ pơpŭ kơ Ñu, čơdơ̆ng mơ̆ng rơnŭk đưm truh kơ lu rơnŭk pơanăp.

⁵¹Ñu ngă khul bruă kơtang mơyang hăng hơpăl tơngan Ñu pô; Ñu pơčơlah hĭ bru bra ƀing hlơi pô pơgao ang amăng jua pơmĭn gơñu.

⁵²Ñu pơglưh trŭn hĭ ƀing khua git gai mơ̆ng grê pơtao gơñu samơ̆ Ñu pŭ̱ đĭ ƀing ƀu yom pơphan.[11]

⁵³Ñu pơtrơi hĭ ƀing rơpa mơhao hăng khul gơnam hiam, samơ̆ Ñu kiaŏ pơđuaĭ hĭ ƀing pơdrŏng hăng tơngan đôč đač.

⁵⁴Ñu djru kơ ƀing ding kơna Ñu ƀing Israel laih anŭn Ñu hơdơr nanao kiăng pơrơđah tơlơi pap Ñu

⁵⁵kơ Abraham laih anŭn kơ abih bang ƀing kơnung djuai gơ̆ hlŏng lar, tui hăng Ñu hơmâo ƀuăn rơ̆ng laih hăng ƀing ơi adon ta.”[12]

⁵⁶Tơdơi kơ HʼMari bơni hơơč laih kơ Ơi Adai, ñu dŏ hrŏm hăng HʼElisabet kơplăh wăh klâo blan. Giŏng anŭn, ñu glaĭ pơ sang ñu pô yơh.

⁵⁷Tơdang truh hrơi HʼElisabet đih apui laih, ñu tơkeng kơ sa čô ană đah rơkơi.

⁵⁸Tơdang ƀing mơnuih re̱ng gah laih anŭn ƀing adơi ai gơñu hơmư̆ tơlơi Khua Yang hơmâo pơrơđah laih tơlơi pap prŏng prin kơ HʼElisabet, abih bang ƀing gơñu hơ̆k mơak hrŏm hăng gơ̆ yơh.

⁵⁹Tơjuh hrơi tơdơi kơ anŭn, ƀing gơñu rai lăng ƀing djă̱ akŏ tơlơi đaŏ ngă tui hăng tơlơi phiăn khăt klĭ brơi kơ čơđai anŭn, laih anŭn ƀing adơi ai amĭ ama gơ̆ kiăng pơanăn gơ̆ tui hăng anăn ama gơ̆ Zakharias.[13]

⁶⁰Samơ̆ amĭ gơ̆ laĭ, “Ơ ơh, anăn ñu či jing Yôhan.”

⁶¹Samơ̆ ƀing gơñu laĭ kơ HʼElisabet tui anai, “Amăng ƀing adơi ai gih ƀu hơmâo ôh anăn Yôhan anŭn.”

⁶²Giŏng anŭn, ƀing gơñu ngă gru kơnăl kiăng tơña kơ ama gơ̆ hơget anăn ñu kiăng pơanăn.

⁶³Zakharias ngă gru kơnăl rơkâo kơ arăng brơi kơ ñu sa pŏk hơnăl čih laih anŭn ñu čih tui anai, “Anăn ñu jing Yôhan.” Tơdang anŭn, abih bang ƀing gơñu dŏ kơtuă hli̱ng hla̱ng biă mă yơh.

⁶⁴Ƀơi mông anŭn mơtam amăng bah ñu rơmuăn, jơlah ñu thâo pơpư̆ glaĭ laih anŭn ñu čơdơ̆ng pơhiăp bơni hơơč kơ Ơi Adai.

⁶⁵Abih ană plei jum dar hli̱ng hla̱ng biă mă laih anŭn arăng ră ruai kơ khul tơlơi anai djŏp anih bŏl čư̆ kwar Yudea yơh.

⁶⁶Tui anŭn, hlơi pô hơmư̆ tơlơi anŭn le̱ng kơ pơtơña tơdruă tui anai, “Hiư̆m thơ čơđai anŭn či jing lĕ ĭh?” Ƀing gơñu pơtơña tơlơi anai yuakơ ƀing gơñu thâo hơpăl tơngan Khua Yang dŏ hrŏm hơbĭt hăng gơ̆.

⁶⁷Giŏng anŭn, ama čơđai anŭn Zakharias bă blai hăng Yang Bơngăt Hiam laih anŭn ñu laĭ lui hlâo tui anai,

⁶⁸“Bơni hơơč bĕ kơ Khua Yang, jing Ơi Adai ƀing Israel, yuakơ Ñu rai laih kiăng kơ song mă ƀing ta jing ƀing ană plei Ñu.

⁶⁹Ñu brơi rai kơ ƀing ta sa čô Pô Pơklaih Dưi Kơtang mơ̆ng kơnung djuai ding kơna Ñu pơtao Dawid.

⁷⁰Kar hăng Ñu hơmâo brơi laih ƀing pô pơala laĭ lui hlâo mơ̆ng đưm adih,

⁷¹Ñu brơi rai Pô Pơklaih anai kiăng pơklaih hĭ ƀing ta mơ̆ng ƀing rŏh ayăt ta jing ƀing pơrơmut kơ ƀing ta yơh.

⁷²Ñu ngă tui anŭn kiăng pơhơdơr glaĭ tơlơi pơgop rơgoh hiam Ñu hăng ơi adon ta Abraham laih anŭn kiăng pơrơđah tơlơi pap kơ ơi adon ta laih anŭn kơ ƀing ta jing kơnung djuai ƀing gơ̆ yơh.

⁷³Anai yơh jing tơlơi Ñu ƀuăn rơ̆ng laih hăng ơi adon ta Abraham:

⁷⁴Ñu ƀuăn rơ̆ng Ñu či pơklaih hĭ ƀing ta mơ̆ng tơngan ƀing rŏh ayăt ta, kiăng kơ brơi ƀing ta dưi mă bruă kơ Ñu ƀu hyưt huĭ ôh,

⁷⁵laih anŭn kơkuh pơpŭ kơ Ñu amăng tơlơi rơgoh hiam hlo̱m laih anŭn amăng tơlơi tơpă hơnơ̆ng ƀơi anăp Ñu abih hrơi ƀing gơmơi dŏ hơdip yơh.

⁷⁶Bơ kơ ih, Ơ ană kâo hơi, arăng či yap ih jing pô pơala kơ Pô Glông Hloh, yuakơ ih či nao hlâo kơ Khua Yang kiăng kơ pơkra jơlan kơ Ñu.[14]

⁷⁷Tui anŭn, ih či pơtô kơ ƀing ană plei Ơi Adai thâo hluh kơ tơlơi pơklaih tơdang Ñu pap brơi khul tơlơi soh ƀing gơ̆.

⁷⁸Yuakơ Ơi Adai khăp pap kơ ƀing ta yơh, Ñu či brơi tơlơi pơklaih kar hăng hrơi sêng brêng mơguah rai pơ ƀing ta mơ̆ng plei hiam adih,

⁷⁹kiăng kơ pơčrang brơi kơ ƀing mơnuih dŏ amăng tơlơi mơmŏt jing ƀing dŏ gah yŭ kơ tơu tơlơi djai, laih anŭn kiăng dui ba plă̱ tơkai ta rơbat amăng jơlan rơnŭk rơnua.”[15]

⁸⁰Čơđai Yôhan anŭn prŏng tui hơmâo tơlơi kơtang amăng bơngăt jua. Tơdang ñu prŏng laih, ñu dŏ amăng anih tơdron ha̱r tơl truh hrơi ñu či pơrơđah ñu pô kơ ƀing Israel yơh.