Read Jarai Juăt 18 Bible Online

Juăt 18 - Jarai bible

Juăt 18

¹Môseh pơhiăp dơ̆ng tui anai: Ƀing khua ngă yang jing ƀing Lêwi, biă mă ñu abih bang kơnung djuai Lêwi, ƀu či hơmâo črăn pơpha ôh kŏn či hơmâo lŏn kŏng ngăn hrŏm hăng ayŏng adơi gơñu ƀing Israel ôh. Ƀing gơñu či hơdip yua mơ̆ng khul gơnam pơyơr pơkra kơ Yahweh hăng apui, yuakơ anŭn yơh jing kŏng ngăn gơñu.

²Ƀing gơñu ƀu či hơmâo ôh lŏn kŏng ngăn amăng ƀing ayŏng adơi gơñu; Yahweh yơh jing kŏng ngăn gơñu tui hăng Ñu ƀuăn laih kơ ƀing gơ̆.[99]

³Anai yơh jing črăn ană plei či pha brơi kơ ƀing khua ngă yang tơdang ƀing gơñu ngă yang sa drơi rơmô tơno ƀôdah sa drơi triu: Añăm bra, añăm kơham wơ̆t hăng jơlah laih anŭn khul hlung asơi mơ̆n.

⁴Ƀing gih khŏm brơi kơ ƀing gơ̆ khul boh čroh blung hlâo mơ̆ng pơdai, ia boh kơƀâo laih anŭn ia rơmuă gih wơ̆t hăng mơrai blung hlâo mơ̆ng blâo triu yuă mơ̆n,

⁵yuakơ Yahweh Ơi Adai ta hơmâo ruah mă laih ƀing gơñu hrŏm hăng ƀing kơnung djuai gơñu mơ̆ng abih bang kơnung djuai gih kiăng kơ mă bruă amăng anăn Yahweh nanao.

⁶Tơdah sa čô Lêwi tơbiă mơ̆ng sa boh plei amăng Israel jing anih ñu hlak dŏ hơdip, laih anŭn rai hăng khul gơnam ñu hơmâo truh pơ anih Yahweh či ruah brơi,

⁷ñu dưi mă bruă amăng anăn Yahweh Ơi Adai ñu hrup hăng abih bang ƀing Lêwi pơkŏn mơ̆n jing ƀing mă bruă pơ anŭn ƀơi anăp Yahweh.

⁸Ñu či pơpha pơđơ̱r amăng gơnam ƀing gơñu hơmâo, wơ̆t tơdah ñu hơmâo mă tŭ prăk tơdang ñu sĭ hĭ khul kŏng ngăn sang anŏ ñu pô.

⁹Môseh pơhiăp dơ̆ng tui anai: Tơdang ƀing gih mŭt amăng anih lŏn Yahweh Ơi Adai ta či brơi kơ ƀing gih, răng bĕ, anăm ngă tui hăng khul jơlan hơƀak drak mơ̆ng lu ƀing kơnung djuai pơ anŭn ôh.

¹⁰Anăm brơi ôh hlơi pô amăng gih ngă tui anai: Pơyơr ngă yang ană đah rơkơi ƀôdah ană đah kơmơi ñu amăng apui; jing pô ngă tui tơlơi suai yang ƀôdah ngă tơlơi pơjâo, pơblang tơlơi hơdip pơanăp, pơgop amăng bruă pơjâo gai,[100]

¹¹de̱ng ƀăng, jing pô kơplăh wăh mơnuih hơdip hăng mơnuih djai, pô pơhiăp hăng ƀing yang ƀôdah pơhiăp hăng ƀing djai.

¹²Hlơi pô ngă khul tơlơi anŭn, ñu anŭn jing pô Yahweh hơƀak drak yơh. Yuakơ ƀing kơnung djuai amăng anih lŏn anŭn ngă khul bruă hơƀak drak anai yơh, Yahweh Ơi Adai ta či puh pơđuaĭ hĭ ƀing kơnung djuai anŭn mơ̆ng anăp gih.

¹³Ƀing gih khŏm jing sa kơnung djuai anăm ngă ôh tơlơi hơƀak drak anŭn ƀơi anăp Yahweh Ơi Adai ta.[101]

¹⁴Môseh pơhiăp dơ̆ng tui anai: Ƀing kơnung djuai jing ƀing mơnuih ƀing gih puh pơđuaĭ hĭ anŭn, ƀing gơñu hơmư̆ tui ƀing hlơi pô ngă bruă pơjâo ƀôdah pơhiăp hăng yang rơba̱ng. Samơ̆ bơ kơ ƀing gih, Yahweh Ơi Adai ta ƀu či brơi ƀing gih ngă tui anŭn ôh.

¹⁵Yahweh Ơi Adai ta či ruah rai sa čô pô pơala hrup hăng kâo mơ̆ng ayŏng adơi ta pô. Ƀing gih khŏm hơmư̆ ñu bĕ.[102]

¹⁶Anai yơh jing tơlơi ƀing gih rơkâo kơ Yahweh Ơi Adai ta amăng hrơi pơjơnum ƀơi anih Hôrêb tui anai, “Anăm brơi ôh ƀing gơmơi hơmư̆ asăp pơhiăp Yahweh Ơi Adai ta ƀôdah ƀuh apui prŏng anai dơ̆ng tah, huĭ kơ ƀing gơmơi či djai hĭ yơh.”

¹⁷Yahweh pơhiăp hăng kâo, “Tơlơi ƀing gơñu pơhiăp anŭn jing djơ̆ yơh.

¹⁸Kâo či ruah rai kơ ƀing gơñu sa čô pô pơala hrup hăng ih mơ̆ng ƀing ayŏng adơi gơñu; Kâo či brơi ñu pơhiăp khul boh hiăp Kâo kiăng, laih anŭn ñu či ruai kơ ƀing gơ̆ rĭm tơlơi Kâo pơđar kơ ñu.

¹⁹Tơdah hlơi pô ƀu hơmư̆ tui ôh khul boh hiăp Kâo mơ̆ng pô pơala anŭn pơhiăp amăng anăn Kâo, Kâo pô yơh či pơkơhma̱l hĭ pô anŭn.[103]

²⁰Samơ̆ tơdah sa čô pô pơala jing pô khĭn pơhiăp amăng anăn Kâo hơget tơlơi Kâo ƀu hơmâo pơđar kơ ñu kiăng pơhiăp ôh, ƀôdah pơhiăp amăng anăn yang rơba̱ng, ƀing gih khŏm pơdjai hĭ ñu yơh.”

²¹Năng ai ƀing gih či pơmĭn amăng pran jua ih pô, “Hiư̆m pă ƀing ta dưi thâo krăn tơdah Yahweh hơmâo pơhiăp ƀôdah ƀu hơmâo pơhiăp ôh boh hiăp anŭn lĕ?”

²²Tơdah tơlơi pô pơala pơhaih amăng anăn Yahweh samơ̆ ƀu krep djơ̆ ƀôdah ƀu djơ̆ ôh, anŭn jing ƀu djơ̆ tơlơi pơhiăp Yahweh hơmâo pơhiăp ôh. Pô pơala anŭn hơmâo pơhiăp hăng tơlơi pơmĭn kiăng ñu pô đôč. Anăm huĭ pơyom kơ ñu ôh.