Read Jarai Ephesos 6 Bible Online

Ephesos 6 - Jarai bible

Ephesos 6

¹Ơ ƀing ană bă, tui gưt bĕ amĭ ama gih amăng Khua Yang, yuakơ tơlơi anŭn jing djơ̆ lăp yơh.[24]

²“Pơpŭ bĕ kơ amĭ ama ih,” anŭn jing tơlơi juăt tal sa hrŏm hăng tơlơi ƀuăn anai mơ̆n,[25]

³“tui anŭn kiăng kơ hơmâo khul tơlơi či truh hiam kơ ih yơh laih anŭn ih dưi tŭ mơak tơlơi hơdip sui ƀơi lŏn tơnah.”

⁴Ơ ƀing ama, anăm ngă kơ ƀing ană bă gih hil nač ôh; kơđai glaĭ kơ tơlơi anŭn, pơtô hăng pơhrăm bĕ kơ ƀing gơñu amăng hơdră jơlan Khua Yang kiăng.[26]

⁵Ơ ƀing hlŭn, tui gưt bĕ kơ ƀing khua gih amăng lŏn tơnah anai hăng tơlơi pơpŭ hăng huĭ laih anŭn hăng pran jua tơpă sĭt, kar hăng ƀing gih tui gưt Krist.[27]

⁶Tui gưt bĕ kơ ƀing gơñu ƀu djơ̆ kơnơ̆ng tơdang ƀing gơñu dŏ lăng kơ ƀing gih laih anŭn kiăng kơ ƀing gơñu bơni kơ ƀing gih đôč ôh, samơ̆ jing bĕ hrup hăng hlŭn Krist, ngă tui tơlơi Ơi Adai kiăng mơ̆ng pran jua gih.

⁷Mă bruă bĕ hăng abih pran jua kar hăng ƀing gih mă bruă kơ Khua Yang ƀu djơ̆ kơ mơnuih ôh,

⁸yuakơ ƀing gih thâo laih kơ tơlơi Khua Yang či bơni kơ hlơi pô ngă bruă hiam, wơ̆t tơdah ñu anŭn jing mơnuih hlŭn ƀôdah mơnuih rơngai.

⁹Laih anŭn Ơ ƀing khua, ngă bĕ kơ ƀing hlŭn gih kar kaĭ mơ̆n. Anăm pơhuĭ hĭ ƀing gơ̆ ôh, yuakơ ƀing gih thâo sĭt kơ tơlơi Pô jing Khua gơñu ăt jing Khua gih hlak dŏ pơ adai adih, Ñu ƀu ngă tơlơi ƀu pơdơ̆ pơđơ̱r kơ ƀing khua laih anŭn kơ ƀing hlŭn ôh.[28]

¹⁰Hơnăl tuč, tŭ dŏ kơtang kơjăp bĕ amăng Khua Yang laih anŭn amăng tơlơi dưi mơyang Ñu.

¹¹Čut hơô bĕ gơnam pơgang Ơi Adai brơi, tui anŭn kiăng kơ ƀing gih dưi dŏ dơ̆ng pơkơdơ̆ng glaĭ hăng khul tơlơi mơneč yang sat.

¹²Yuakơ ƀing ta pơblah ƀu djơ̆ pơkơdơ̆ng glaĭ hăng asar laih anŭn drah ôh, samơ̆ pơkơdơ̆ng glaĭ hăng ƀing khua djă̱ akŏ, pơkơdơ̆ng glaĭ hăng khul tơlơi dưi, pơkơdơ̆ng glaĭ hăng khul tơlơi dưi mơyang lŏn tơnah kơnăm mơmŏt anai laih anŭn pơkơdơ̆ng glaĭ hăng ƀing yang sat bơngăt mơyang amăng khul adai adih.

¹³Yuakơ anŭn yơh, čut hơô bĕ gơnam pơgang Ơi Adai brơi, tui anŭn kiăng kơ tơdang hrơi sat ƀai truh, ƀing gih dưi dŏ dơ̆ng kơjăp yơh. Laih anŭn tơdơi kơ ƀing gih hơmâo prap pre pioh hĭ laih abih bang tơlơi, ƀing gih ăt dŏ dơ̆ng kơjăp mơ̆n.

¹⁴Tui anŭn dŏ kơjăp bĕ, prap rơmet bĕ gih pô hăng hơdrăng kơiăng tơlơi sĭt hruă jum dar kơiăng gih, hăng ao pơgang tơlơi tơpă hơnơ̆ng buh hơô djơ̆ anih,[29]

¹⁵laih anŭn čut bĕ ƀơi tơkai tơkhŏ tơlơi prap pre, jing tơlơi tơbiă rai mơ̆ng tơlơi pơthâo hiam rơnŭk rơno̱m.[30]

¹⁶Thim mŭt amăng abih bang tơlơi anŭn, mă tŭ bĕ khiơl tơlơi đaŏ. Mơ̆ng gơnam anŭn yơh, ƀing gih dưi pơthăm[31] hĭ abih bang khul ƀrŏm apui yang sat pơnăh rai.

¹⁷Mă tŭ bĕ muk pơgang tơlơi pơklaih laih anŭn đao gưm Yang Bơngăt, jing Boh Hiăp Ơi Adai.[32]

¹⁸Laih anŭn iâu laĭ tŭ pơgit bĕ yua mơ̆ng Yang Bơngăt ƀơi abih bang anih hơdip hrŏm hăng abih bang khul tơlơi iâu laĭ laih anŭn tơlơi kwưh rơkâo. Hơmâo tơlơi anŭn amăng jua pơmĭn, ƀing gih răng bĕ laih anŭn gir iâu laĭ nanao kơ abih bang ƀing đaŏ hiam klă.

¹⁹Ăt iâu laĭ kơ kâo mơ̆n kiăng kơ pơpă anih kâo čơdơ̆ng ha pơhiăp, Ơi Adai či brơi kơ kâo khul tơlơi pơhiăp djơ̆ kiăng kơ pơhiăp. Tui anŭn, kâo dưi hơmâo tơlơi khĭn kiăng kơ pơblang tơlơi hơgŏm amăng tơlơi pơthâo hiam yơh.

²⁰Yuakơ tơlơi pơthâo hiam anŭn yơh kâo mơnuih pơala Yang Yêsu dŏ amăng sang mơnă. Iâu laĭ kơ kâo bĕ kiăng kơ kâo dưi pơtô pơblang hăng tơlơi khĭn, anŭn yơh jing tơlơi kâo năng ngă.

²¹Tukhikos, jing ayŏng adơi khăp laih anŭn jing ding kơna tŏng ten amăng Khua Yang, či pơruai kơ ƀing gih abih bang tơlơi, kiăng kơ ƀing gih dưi thâo krăn yơh hiư̆m kâo jing laih anŭn hơget tơlơi kâo hlak dŏ ngă.[33] [34]

²²Kâo hlak pơkiaŏ ñu nao pơ ƀing gih yuakơ tơlơi kơñăm anŭn yơh kiăng kơ ƀing gih dưi thâo krăn hơget tơlơi hlak truh kơ ƀing gơmơi, laih anŭn ñu yơh dưi pơtrŭt pơkơjăp pran jua gih.

²³Rơkâo tơlơi rơnŭk rơno̱m, tơlơi khăp hrŏm hăng tơlơi đaŏ kơnang mơ̆ng Ơi Adai Ama laih anŭn mơ̆ng Khua Yang Yêsu Krist dŏ hrŏm hăng ƀing gih, Ơ ƀing ayŏng amai adơi ăh.

²⁴Rơkâo tơlơi khăp pap brơi kơ abih bang hlơi pô khăp kơ Khua Yang Yêsu Krist ta hăng sa tơlơi khăp ƀu thâo abih ôh.