Read Jarai Yôsua 21 Bible Online

Yôsua 21 - Jarai bible

Yôsua 21

¹Giŏng anŭn, ƀing khua djă̱ akŏ ƀing djuai amăng kơnung djuai Lêwi nao pơ khua ngă yang Eleazar, Yôsua ană đah rơkơi Nun laih anŭn pơ ƀing khua djă̱ akŏ abih bang kơnung djuai ƀing Israel pơkŏn.

²Ƀing Lêwi anŭn ră ruai kơ ƀing gơñu ƀơi anih Silôh amăng anih lŏn Kanaan anŭn laih anŭn rơkâo mơ̆ng ƀing gơñu tui anai, “Yahweh pơtă laih kơ Môseh kơ tơlơi ƀing gih khŏm pơpha brơi kơ ƀing gơmơi khul plei pla kiăng kơ dŏ wơ̆t hăng đang rơ̆k jum dar plei anŭn kơ khul hlô mơnơ̆ng rong gơmơi mơ̆n.”[77]

³Hơnŭn yơh, tui hăng tơlơi Yahweh pơtă laih yơh, ƀing Israel pơpha brơi kơ ƀing Lêwi khul plei pla laih anŭn đang rơ̆k mơ̆ng guai lŏn kŏng ngăn gơñu pô tui anai:

⁴Tơlơi ngă čram pơpha brơi blung hlâo lê̆ djơ̆ kơ ƀing djuai Kehat amăng kơnung djuai Lêwi. Ƀing djuai Kehat anŭn, jing ƀing ană tơčô khua ngă yang A̱rôn prŏng hloh, mă tŭ pluh-klâo boh plei mơ̆ng guai lŏn ƀing kơnung djuai Yudah, Simeôn laih anŭn Benyamin.

⁵Ƀing djuai Kehat dŏ glaĭ pơkŏn dơ̆ng mă tŭ pluh boh plei mơ̆ng guai lŏn kŏng ngăn ƀing kơnung djuai Ephraim, Dan laih anŭn sămkrah kơnung djuai Manasseh gah yŭ̱.

⁶Ƀing djuai Gersôn mă tŭ pluh-klâo boh plei mơ̆ng guai lŏn kŏng ngăn ƀing kơnung djuai Issakhar, Aser, Naptali laih anŭn sămkrah kơnung djuai Manasseh gah ngŏ̱.

⁷Ƀing djuai Merari mă tŭ pluh-dua boh plei mơ̆ng guai lŏn kŏng ngăn ƀing kơnung djuai Reuben, Gad laih anŭn Zebulun.

⁸Amăng tơlơi ngă čram yơh, ƀing Israel pơpha brơi khul plei pla anŭn wơ̆t hăng đang rơ̆k gơñu kơ ƀing Lêwi tui hăng Yahweh hơmâo pơđar laih kơ Môseh.

⁹Mơ̆ng guai lŏn kŏng ngăn ƀing kơnung djuai Yudah hăng Simeôn yơh ƀing gơñu pơpha brơi hơdôm plei pla hơmâo anăn gah yŭ anai.

¹⁰Hơdôm plei pla anai ƀing gơñu pơpha brơi laih kơ ƀing ană tơčô A̱rôn jing ƀing amăng djuai Kehat yuakơ tơlơi ngă čram pơpha brơi lê̆ ƀơi ƀing Kehat yơh blung hlâo.

¹¹Ƀing gơñu pơpha brơi kơ ƀing gơ̆ plei pơnăng Kiryat-Arba ăt jing plei ƀing gơ̆ pơanăn Hebrôn mơ̆n, wơ̆t hăng anih đang rơ̆k jum dar plei anŭn mơ̆n amăng anih tring bŏl čư̆ ƀing Yudah yơh. Hlâo adih arăng pơanăn plei anŭn Arƀa jing ơi adon kơ ƀing djuai Anak prŏng glông yơh.

¹²Samơ̆ khul đang hơma hăng plei pla pơkŏn jum dar plei Hebrôn anŭn, ƀing gơñu hơmâo pơpha brơi hĭ laih kơ Kaleb ană đah rơkơi Yephunneh jing hĭ anih lŏn kŏng ngăn gơ̆ pô yơh.

¹³Tui anŭn, ƀing gơñu pơpha brơi kơ ƀing ană tơčô A̱rôn, jing pô khua ngă yang prŏng hloh, plei pơnăng Hebrôn, jing plei pioh kơ ƀing pơdjai djơ̆ mơnuih đuaĭ kơdŏp, hrŏm hăng plei Libnah,

¹⁴Yattir, Estemôa,

¹⁵Hôlôn, Debir,

¹⁶Ayin, Yuttah laih anŭn Bêt-Semes wơ̆t hăng khul đang rơ̆k gơñu mơ̆n; abih bang jing duapăn boh plei yơh mơ̆ng dua kơnung djuai Yudah hăng Simeôn.

¹⁷Laih anŭn mơ̆ng guai lŏn kŏng ngăn Benyamin, ƀing gơñu pơpha plei Gibôn, Gaba,

¹⁸Anathôt laih anŭn Almôn wơ̆t hăng khul đang rơ̆k gơñu mơ̆n; abih bang jing pă̱ boh plei.

¹⁹Abih bang plei pla pơpha brơi kơ ƀing khua ngă yang, jing ƀing ană tơčô A̱rôn, hơmâo pluh-klâo boh plei wơ̆t hăng khul đang rơ̆k gơñu mơ̆n.

²⁰Bơ kơ ƀing djuai Kehat dŏ glaĭ pơkŏn dơ̆ng mơ̆ng kơnung djuai Lêwi, ƀing Israel pơpha brơi kơ ƀing gơñu khul plei pla mơ̆ng guai lŏn kŏng ngăn ƀing kơnung djuai Ephraim tui anai:

²¹Amăng tring bŏl čư̆ guai lŏn kơnung djuai Ephraim, ƀing gơñu pơpha brơi kơ ƀing djuai Kehat plei pơnăng Sekhem, jing plei pioh kơ pô pơdjai djơ̆ mơnuih đuaĭ kơdŏp pơ anŭn, hrŏm hăng plei Gezer,

²²Kibzaim laih anŭn Bêt-Hôrôn, wơ̆t hăng khul đang rơ̆k gơñu mơ̆n; abih bang jing pă̱ boh plei yơh.

²³Ăt mơ̆ng guai lŏn kŏng ngăn ƀing kơnung djuai Dan mơ̆n, ƀing gơñu pơpha brơi kơ ƀing djuai Kehat anŭn plei Eltekêh, Gibethôn,

²⁴Aiyalôn laih anŭn Gat-Rimmôn, wơ̆t hăng khul đang rơ̆k gơñu mơ̆n; abih bang jing pă̱ boh plei yơh.

²⁵Mơ̆ng guai lŏn sămkrah kơnung djuai Manasseh gah yŭ̱, ƀing gơñu pơpha brơi kơ ƀing djuai Kehat anŭn plei Taanak laih anŭn Gat-Rimmôn wơ̆t hăng khul đang rơ̆k gơñu mơ̆n; abih bang jing dua boh plei.

²⁶Abih bang pluh boh plei wơ̆t hăng khul đang rơ̆k anŭn ƀing Israel pơpha brơi kơ ƀing djuai Kehat dŏ glaĭ pơkŏn anŭn yơh mă tŭ.

²⁷Ƀing Israel ăt pơpha brơi kơ ƀing Lêwi pơkŏn dơ̆ng jing ƀing djuai Gersôn tui anai: Mơ̆ng guai lŏn kŏng ngăn ƀing sămkrah kơnung djuai Manasseh gah ngŏ̱, ƀing gơñu pơpha brơi plei Gôlan amăng anih tring Basan, ăt jing plei pioh kơ pô pơdjai djơ̆ mơnuih đuaĭ kơdŏp, hrŏm hăng plei Beêsterah, wơ̆t hăng khul đang rơ̆k gơñu mơ̆n; abih bang jing dua boh plei.

²⁸Mơ̆ng guai lŏn kŏng ngăn ƀing kơnung djuai Issakhar, ƀing gơñu pơpha brơi plei Kisyôn, Dabrat,

²⁹Yarmut laih anŭn In-Gannim, wơ̆t hăng khul đang rơ̆k gơñu mơ̆n; abih bang jing pă̱ boh plei yơh.

³⁰Mơ̆ng guai lŏn kŏng ngăn ƀing kơnung djuai Aser, ƀing gơñu pơpha brơi plei Misal, Abdôn,

³¹Helkat laih anŭn Rehôb, wơ̆t hăng khul đang rơ̆k gơñu mơ̆n; abih bang jing pă̱ boh plei yơh.

³²Mơ̆ng guai lŏn kŏng ngăn ƀing kơnung djuai Naptali, ƀing gơñu pơpha brơi plei pơnăng Kedes amăng anih tring Galilê, jing plei pioh kơ pô pơdjai djơ̆ mơnuih đuaĭ kơdŏp, hrŏm hăng plei Hammôt-Dôr laih anŭn Kartan, wơ̆t hăng khul đang rơ̆k gơñu mơ̆n; abih bang jing klâo boh plei yơh.

³³Abih bang pluh-klâo boh plei wơ̆t hăng khul đang rơ̆k anŭn ƀing Israel pơpha brơi kơ ƀing djuai Gersôn anŭn yơh mă tŭ.

³⁴Ƀing Israel ăt pơpha brơi kơ ƀing Lêwi dŏ glaĭ pơkŏn dơ̆ng jing ƀing djuai Merari tui anai: Mơ̆ng guai lŏn kŏng ngăn ƀing kơnung djuai Zebulun, ƀing gơñu pơpha brơi plei Yokneam, Kartah,

³⁵Dimnah laih anŭn Nahalal, wơ̆t hăng khul đang rơ̆k gơñu mơ̆n; abih bang jing pă̱ boh plei yơh.

³⁶Mơ̆ng guai lŏn kŏng ngăn ƀing kơnung djuai Reuben, ƀing gơñu pơpha brơi plei Bezer, Yahaz,

³⁷Kedemôt laih anŭn Mêphaat, wơ̆t hăng khul đang rơ̆k gơñu mơ̆n; abih bang jing pă̱ boh plei yơh.

³⁸Mơ̆ng guai lŏn kŏng ngăn ƀing kơnung djuai Gad, ƀing gơñu pơpha brơi jing plei Ramôt amăng anih tring Gilead, jing plei pioh kơ pô pơdjai djơ̆ mơnuih đuaĭ kơdŏp hrŏm hăng plei Mahanaim,

³⁹Hesbôn laih anŭn Yazer, wơ̆t hăng khul đang rơ̆k gơñu mơ̆n; abih bang jing pă̱ boh plei yơh.

⁴⁰Tui anŭn, abih bang pluh-dua boh plei ƀing Israel pơpha brơi kơ ƀing djuai Merari, jing ƀing kơnung djuai Lêwi dŏ glaĭ, mă tŭ.

⁴¹Mrô pơtŭm khul plei pla ƀing Lêwi mă tŭ amăng guai lŏn ƀing Israel abih bang jing pă̱pluh-sapăn boh wơ̆t hăng khul đang rơ̆k gơñu mơ̆n.

⁴²Rĭm khul plei pla anŭn le̱ng kơ hơmâo đang rơ̆k jum dar soh sel.

⁴³Tui anŭn yơh, Yahweh pha brơi pơgiŏng hĭ kơ ƀing Israel abih bang anih lŏn Ñu hơmâo ƀuăn brơi laih kơ ƀing ơi adon ƀing gơ̆ hlâo adih. Tơdang ƀing gơ̆ hơmâo mŭt mă tŭ laih kŏng ngăn anŭn, ƀing gơ̆ dŏ hơdip amăng anŭn yơh.

⁴⁴Yahweh brơi kơ ƀing gơ̆ tơlơi rơnŭk rơnua amăng abih anih lŏn, tui hăng Ñu hơmâo ƀuăn laih hăng ƀing ơi adon ƀing gơ̆. Ƀu hơmâo ôh sa amăng ƀing rŏh ayăt ƀing gơ̆ anăm pơkơdơ̆ng glaĭ hăng ƀing gơ̆, yuakơ Yahweh hơmâo jao brơi laih kơ ƀing Israel dưi hĭ hloh kơ abih bang ƀing rŏh ayăt ƀing gơ̆.

⁴⁵Yahweh djă̱ pioh ngă tui rĭm tơlơi ƀuăn hiam klă Ñu hơmâo ƀuăn laih hăng ƀing Israel.