Read Jarai 1 Yôhan 1 Bible Online

1 Yôhan 1 - Jarai bible

1 Yôhan 1

¹Kâo čih pơhaih hră anai kơ ƀing gih kơ boh hiăp tơlơi hơdip. Anŭn jing tơlơi hơmâo čơdơ̆ng mơ̆ng phŭn, jing tơlơi ƀing gơmơi hơmâo hơmư̆ laih, jing tơlơi ƀing gơmơi hơmâo ƀuh laih hăng mơta gơmơi pô; ƀơi tơlơi anŭn ƀing gơmơi hơmâo lăng hăng ruaih laih hăng tơngan gơmơi pô.[1]

²Sĭt yơh tơlơi hơdip anŭn pơƀuh rai laih. Ƀing gơmơi hơmâo ƀuh laih Ñu laih anŭn ngă gơ̆ng jơlan kơ tơlơi anŭn, laih anŭn ƀing gơmơi pơhaih kơ ƀing ih tơlơi hơdip hlŏng lar, jing tơlơi dŏ hăng Yang Ama laih anŭn hơmâo pơƀuh rai laih kơ ƀing gơmơi.[2]

³Ƀing gơmơi ăt pơhaih kơ ƀing ih mơ̆n hơget tơlơi ƀing gơmơi hơmâo ƀuh hăng hơmư̆ laih, tui anŭn ƀing ih ăt dưi hơmâo tơlơi pơgop pơlir hăng ƀing gơmơi mơ̆n. Laih anŭn sĭt yơh ƀing gơmơi pơgop pơlir hăng Yang Ama laih anŭn hăng Yang Ană, jing Yang Yêsu Krist.

⁴Ƀing gơmơi čih tơlơi anai kiăng kơ ngă brơi kơ tơlơi mơak ta hlo̱m ƀo̱m.

⁵Anai jing tơlơi pơhiăp ƀing gơmơi hơmâo hơmư̆ laih Ñu pơtô laih anŭn pơhaih kơ ƀing ih tui anai: Ơi Adai jing tơlơi bơngač laih anŭn amăng Ñu ƀu hơmâo tơlơi kơnăm mơmŏt hơget gĕt ôh.

⁶Tơdah ƀing ta laĭ ƀing ta hơmâo tơlơi pơgop pơlir hăng Ñu samơ̆ rơbat amăng tơlơi kơnăm mơmŏt, ƀing ta ƀlŏr laih anŭn ƀu hơdip amăng tơlơi sĭt ôh.

⁷Samơ̆ tơdah ƀing ta rơbat amăng tơlơi bơngač, kar hăng Ñu dŏ amăng tơlơi bơngač, ƀing ta hơmâo tơlơi pơgop pơlir hăng tơdruă yơh, laih anŭn drah Yang Yêsu, Ană Đah Rơkơi Ñu, pơrơgoh hĭ ƀing ta mơ̆ng abih bang tơlơi soh yơh.

⁸Tơdah ƀing ta laĭ ta pô ƀu hơmâo tơlơi soh ôh, ƀing ta pleč ƀlŏr hĭ ta pô yơh laih anŭn tơlơi sĭt ƀu dŏ amăng ƀing ta ôh.

⁹Tơdah ƀing ta pơhaih khul tơlơi soh ta, Ñu yơh jing Pô tŏng ten hăng tơpă hơnơ̆ng laih anŭn či pap brơi khul tơlơi soh ta hăng pơrơgoh hĭ ƀing ta mơ̆ng abih bang tơlơi ƀu tơpă hơnơ̆ng yơh.

¹⁰Tơdah ƀing ta laĭ ƀing ta ƀu hơmâo ngă soh ôh mơ̆ng hlâo truh pơ tă anai, ƀing ta pơjing hĭ laih Ñu jing Pô ƀlŏr laih anŭn boh hiăp Ñu ƀu dŏ amăng tơlơi hơdip ta ôh.