Read Jarai Pơrơđah 7 Bible Online

Pơrơđah 7 - Jarai bible

Pơrơđah 7

¹[49] Tơdơi kơ anŭn, kâo ƀuh pă̱ čô ling jang hiam dŏ dơ̆ng ƀơi pă̱ akiăng lŏn tơnah, pơkơ̆ng hĭ pă̱ glung angĭn lŏn tơnah kiăng kơ pơgăn hĭ angĭn pă kiăng kơ thut ƀơi tơnah, ƀơi ia rơsĭ ƀôdah ƀơi kơyâo yơh.[50]

²Giŏng anŭn, kâo ƀuh sa čô ling jang hiam pơkŏn dơ̆ng tơbiă rai mơ̆ng gah ngŏ̱, laih anŭn ñu hơmâo gru kơđŏm Ơi Adai hơdip. Ñu pơhiăp kraih biă mă hăng pă̱ čô ling jang hiam Ơi Adai, jing hơmâo tŭ mă laih tơlơi dưi kiăng kơ pơrăm hĭ lŏn tơnah wơ̆t hăng ia rơsĭ tui anai:

³“Anăm pơrăm hĭ lŏn tơnah, ia rơsĭ ƀôdah khul kơyâo ôh, tơl ƀing gơmơi kơđŏm sa gru kơđŏm ƀơi athơi ƀing ding kơna Ơi Adai gơmơi hlâo amơĭ.”[51]

⁴Giŏng anŭn, kâo hơmư̆ mrô ƀing mơnuih hơmâo tŭ laih gru kơđŏm tui anai: Sa-rơtuh pă̱pluh-pă̱-rơbâo[52] čô mơ̆ng abih bang kơnung djuai ƀing Israel.

⁵Mơ̆ng kơnung djuai Yudah hơmâo pluh-dua-rơbâo[53] čô tŭ mă gru kơđŏm, mơ̆ng kơnung djuai Reuben hơmâo pluh-dua-rơbâo[54] čô, mơ̆ng kơnung djuai Gad hơmâo pluh-dua-rơbâo[55] čô,

⁶mơ̆ng kơnung djuai Aser hơmâo pluh-dua-rơbâo[56] čô, mơ̆ng kơnung djuai Naptali hơmâo pluh-dua-rơbâo[57] čô, mơ̆ng kơnung djuai Manasseh hơmâo pluh-dua-rơbâo[58] čô,

⁷mơ̆ng kơnung djuai Simeôn hơmâo pluh-dua-rơbâo[59] čô, mơ̆ng kơnung djuai Lêwi hơmâo pluh-dua-rơbâo[60] čô, mơ̆ng kơnung djuai Issakhar hơmâo pluh-dua-rơbâo[61] čô,

⁸mơ̆ng kơnung djuai Zebulun hơmâo pluh-dua-rơbâo[62] čô, mơ̆ng kơnung djuai Yôsêp hơmâo pluh-dua-rơbâo[63] čô, laih anŭn mơ̆ng kơnung djuai Beyamin hơmâo pluh-dua-rơbâo[64] čô.

⁹Tơdơi kơ anŭn, kâo lăng laih anŭn ƀuh sa tơpul mơnuih lu biă mă, ƀu hơmâo hlơi pô dưi yap ôh. Ƀing gơñu rai mơ̆ng rĭm lŏn čar, kơnung djuai, ană plei laih anŭn phara tơlơi pơhiăp. Ƀing gơñu dŏ dơ̆ng ƀơi anăp grê pơtao laih anŭn ƀơi anăp Ană Triu yơh. Ƀing gơñu buh ao phyung kô̱̆ laih anŭn djă̱ than đung kri amăng tơngan gơñu.

¹⁰Ƀing gơñu pơhiăp kraih krin tui anai, “Tơlơi pơklaih lŏm kơ Ơi Adai ta, jing Pô dŏ be̱r ƀơi grê pơtao, laih anŭn kơ Ană Triu yơh.”

¹¹Abih bang ƀing ling jang hiam dŏ jum dar grê pơtao laih anŭn jum dar ƀing kŏng tha wơ̆t hăng pă̱ čô djuai mơnơ̆ng hơdip mơ̆n. Ƀing gơñu bon akŭp ƀô̆ mơta gơñu ƀơi anăp grê pơtao laih anŭn kơkuh pơpŭ kơ Ơi Adai.

¹²Ƀing gơñu laĭ tui anai, “Amen! Tơlơi bơni hơơč hăng tơlơi ang yang, tơlơi rơgơi, tơlơi bơni hăng tơlơi pơpŭ pơyom, tơlơi dưi mơyang hăng tơlơi kơtang jing kơ Ơi Adai ta nanao hlŏng lar yơh. Amen!”

¹³Giŏng anŭn, sa čô amăng ƀing kŏng tha tơña kơ kâo tui anai, “Hlơi ƀing mơnuih buh ao phyung kô̱̆ anŭn laih anŭn mơ̆ng pă ƀing gơñu rai lĕ?”

¹⁴Kâo laĭ glaĭ tui anai, “Ơ khua ăh, ih yơh thâo.” Laih anŭn ñu laĭ kơ kâo tui anai, “Anŭn jing ƀing hơmâo tơbiă rai laih mơ̆ng tơlơi gleh tơnap prŏng. Ƀing gơñu hơmâo bŏh laih khul ao phyung gơñu laih anŭn hơmâo tŭ pơrơgoh hĭ laih ao gơñu anŭn kô̱̆ amăng drah Ană Triu.[65]

¹⁵Hơnŭn yơh, “Ƀing gơñu dŏ ƀơi anăp grê pơtao Ơi Adai laih anŭn mă bruă kơ Ñu hrơi mlam amăng sang yang Ñu, laih anŭn Pô dŏ ƀơi grê pơtao či pơkăng sang khăn pơgang Ñu ƀơi ƀing gơñu yơh.

¹⁶Ƀing gơñu ƀu či rơpa mơhao dơ̆ng tah. Yang hrơi ƀu či pơčrang kơtang ƀơi ƀing gơñu ôh, laih anŭn tơlơi pơiă kŏn pơruă hĭ ƀing gơñu lơi.[66]

¹⁷Yuakơ Ană Triu dŏ ƀơi tŏng krah grê pơtao yơh či jing pô wai triu gơñu; Ñu či dui ba ƀing gơñu pơ khul ia bluh, jing ia tơlơi hơdip yơh. Laih anŭn Ơi Adai či sut hĭ rĭm ia mơta mơ̆ng mơta gơñu yơh.”[67]