Read Kitab Sutji, 1981 PURWANING DUMADI 5 Bible Online

PURWANING DUMADI 5 - Kitab Sutji, 1981 bible

PURWANING DUMADI 5

¹Iki sarasilahe turune Bapa Adam. Nalika Gusti Allah nitahake Bapa Adam, anggone karya nulad pasemone Gusti Allah.

²Anggone nitahake lanang lan wadon sarta padha diberkahi tuwin disebut: “Manungsa” yaiku ing nalikane padha katitahake.

³Bareng Bapa Adam umur satus telung puluh taun, nuli duwe anak kang ngemperi rupa lan pasemone, dijenengake: Set.

⁴Sawuse duwe anak Set mau, Bapa Adam isih ginanjar umur wolung atus taun maneh, sarta duwe anak lanang lan wadon.

⁵Dadi gunggunge umure Bapa Adam sangang atus telung puluh taun, banjur tinggal donya.

⁶Nalika Set umur satus lima taun, duwe anak Enos.

⁷Sawuse anak-anak Enos mau, Set isih diganjar umur maneh wolung atus pitu taun, sarta duwe anak lanang lan wadon.

⁸Dadi gunggunge umure Set sangang atus rolas tahun, banjur ngajal.

⁹Nalika Enos umur sangang puluh taun, duwe anak Kenan.

¹⁰Sawuse anak-anak Kenan, Enos isih diganjar umur maneh wolung atus limalas taun, sarta duwe anak lanang lan wadon.

¹¹Dadi gunggunge umure Enos sangang atus lima taun, banjur ngajal.

¹²Nalika Kenan umur pitung puluh taun, duwe anak Mahalaleel.

¹³Sawuse anak-anak Mahalaleel, Kenan isih diganjar umur maneh wolung atus patang puluh taun, sarta duwe anak lanang lan wadon.

¹⁴Dadi gunggunge umure Kenan sangang atus sepuluh taun, banjur ngajal.

¹⁵Nalika Mahalaleel umur sawidak lima taun, duwe anak Yared.

¹⁶Sawuse anak-anak Yared, Mahalaleel isih ginanjar umur maneh wolung atus telung puluh taun sarta duwe anak lanang lan wadon.

¹⁷Dadi gunggunge umure Mahalaleel wolung atus sangang puluh lima taun, banjur ngajal.

¹⁸Nalika Yared umur satus sawidak loro taun, duwe anak Henokh.

¹⁹Sawuse anak-anak Henokh, Yared isih diganjar umur maneh wolung atus taun, sarta duwe anak lanang lan wadon.

²⁰Dadi gunggunge umure Yared sangang atus sawidak loro taun, banjur ngajal.

²¹Nalika Henokh umur sawidak lima taun, banjur duwe anak Metusalakh.

²²Henokh sawuse anak-anak Metusalakh mau, lakune tinunggil dening Gusti Allah, lan isih diparingi umur telung atus taun, sarta kaparingan anak lanang lan wadon.

²³Dadi gunggunge umure Henokh telung atus sawidak lima taun.

²⁴Henokh lakune tinunggil dening Gusti Allah, banjur ora ana, amarga wus kapulung dening Gusti Allah.

²⁵Nalika Metusalakh umur satus wolung puluh pitu taun, duwe anak Lamekh.

²⁶Sawuse anak-anak Lamekh, Metusalakh isih diganjar umur pitung atus wolung puluh loro taun, sarta duwe anak lanang lan wadon.

²⁷Dadi gunggunge umure Metusalakh sangang atus sawidak sanga taun, banjur ngajal.

²⁸Nalika Lamekh umur satus wolung puluh loro taun, duwe anak lanang,

²⁹iku dijenengake Nuh, celathune: “Bocah iki bakal aweh panglipur marang kita ing sajroning pagawean kita kang ngrekasa banget ana ing bumi kang wus kena ing ipat-ipate Sang Yehuwah iki.”

³⁰Sawuse anak-anak Nuh, Lamekh isih diganjar umur limang atus sangang puluh lima taun, sarta kaparingan anak lanang lan wadon.

³¹Dadi gunggunge umure Lamekh pitung atus pitung puluh pitu taun, banjur ngajal.

³²Nalika Nuh umur limang atus taun, duwe anak Sem, Kham lan Yafet. [16†] [17†] [18†]