Read Kitab Sutji, 1981 PANGENTASAN 25 Bible Online

PANGENTASAN 25 - Kitab Sutji, 1981 bible

PANGENTASAN 25

¹Pangeran Yehuwah banjur ngandika marang Nabi Musa:

²“Sira ndhawuhana marang wong Israel, supaya padha nyaosna pisungsung mirunggan konjuk marang Ingsun. Anggone padha nyaosake pisungsung mirunggan konjuk marang Ingsun iku metua saka legawaning atine.

³Anadene mungguh pisungsung mirunggan kang konjuk marang Ingsun iku arupa: mas, selaka, tembaga,

⁴bakal wungu tuwa, bakal wungu nom, bakal jingga, mori alus, wulu wedhus,

⁵lulang wedhus gembel lanang dipulas abang, lulang dhuyung lan kayu sittah

⁶lenga kanggo padamaran, anggi-anggi kanggo lenga jebad lan kanggo dupa,

⁷sotya krisopras lan sesotya tatahan kanggo klambi efod lan tutup dhadha.

⁸Lan Ingsun padha sira yasakna pasucen, supaya Ingsun dedalem ana ing tengahira.

⁹Anggonira padha yasa dalem pasucen lan sakehe pirantine kabeh iku mituruta conto kang bakal Suntedahake marang sira.” [97†]

¹⁰“Sira padha gawea pethi kayu sittah, dawane loro satengah asta, ambane karotengah asta lan dhuwure karotengah asta.

¹¹Pethi iku sira lapisana mas murni ing jero lan ing jabane, sarta ing dhuwur mubeng sira wenehana plisir mas.

¹²Karodene sira gawea gelang mas cithakan patang iji padha kapasanga ing pojokane papat, dadi ing iringan kenene ana gelangane loro, lan ing iringan kanane ana gelangane loro.

¹³Sarta maneh sira gawea pikulan kayu sittah, padha kalapis ing mas.

¹⁴Pikulan iku padha kaslobokna ing gelangan kang ana ing iringane pethi, dianggo nggotong pethine.

¹⁵Pikulan iku tetepa ana ing gelangan pethi, ora kena didudut.

¹⁶Ing jeroning pethi isenana papan angger-angger kang bakal Sunparingake marang sira.

¹⁷Apadene sira gawea tutup pangruwatan mas murni, dawane loro satengah asta, ambane karotengah asta.

¹⁸Lan sira gawea pepethan kerub mas loro kang kagawe emas gemblengan, kapasanga ing pungkasane tutup pangruwatan mau.

¹⁹Kerub kang siji ana ing pungkasane sisih kenene, lan kerub sijine ana ing sisih kanane tutup, kerub sakarone iku padha gawenen irasan karo tutup pangruwatan ing kiwa lan ing tengen.

²⁰Kerub-kerub iku padha ngegarna swiwine mandhuwur ngaubi tutup pangruwatan, raine padha adu arep; raine kerub-kerub iku padha tumungkula marang tutup pangruwatan mau.

²¹Tutup pangruwatan iku sira etrapna ing dhuwure pethi, samangsa papan angger-angger kang bakal Sunparingake marang sira iku wus sira selehake ing sajroning pethine.

²²Ana ing kono anggoningSun bakal ngrawuhi sira saka ing sadhuwure tutup pangruwatan iku, saka ing antarane kerub loro kang ana ing sadhuwure pethi angger-angger iku, Ingsun bakal paring pangandika marang sira bab kang bakal Sundhawuhake marang sira kang kudu sira terusake marang wong Israel.” [98†]

²³“Lan maneh sira gawea meja kayu sittah, dawane rong asta, ambane saasta lan dhuwure karotengah asta.

²⁴Meja iku sira lapisana mas murni sarta wenehana plisir mas mubeng.

²⁵Karodene sira wenehana wengku mubeng ambane saepek-epek, lan wengku iku iya sira wenehana plisir mas mubeng.

²⁶Sarta maneh meja iku iya sira gawekna gelangan mas patang iji, gelangan iku sira etrapna ing pojokane papat kaprenah ana ing sikile papat.

²⁷Gelangane padha pepetna ing wengku, kanggo slobokane pikulan kang kanggo ngusung mejane.

²⁸Pikulane iku iya kayu sittah kalapisa mas, iku kang kagawe ngusung mejane.

²⁹Sira iya gawea pinggan, piring, porong lan tuwung, kang kagawe ngesok kurban unjukan, kabeh iku kagawea saka mas murni.

³⁰Mejane iku tansah dokokana roti sesaosan ana ing ngarsaningSun.” [99†] [100†]

³¹“Sira gawea padamaran mas murni; padamaran iku kang digawe kudu mas gemblengan, iya sikilane iya adeg-adege; dalah rerekane slaga, kudhup lan kembange padha kagawea iras-irasan karo padamarane.

³²Pange nem metu saka ing adeg-adege; pange kang telu ing sisih kenene, lan kang telu ing sisih kanane.

³³Siji-sijine pang anaa rerekane slaga kembang saked nelung iji, karo rerekan kudhup lan kembang, dadine pang nem kang metu saka padamaran iku iya gawenen kaya mangkono.

³⁴Mungguh adeg-adege padamaran iku anaa rerekane slaga kembang saked patang iji dalah rerekane kudhup lan kembang.

³⁵Rerekan kudhup siji anaa kang kapasang ing ngisore pang sajodho kang kapisan kang metu saka padamarane, siji maneh ing ngisore pang kang kapindho lan siji maneh ing ngisore kang katelu, mangkono mungguh pang nem kang metu saka ing adeg-adege padamaran mau digawea padha.

³⁶Kudhup lan pange iku kudu metu saka ing padamaran mau lan kabeh mau kang digawe kudu mas murni gemblengan.

³⁷Padamaran iku iya sira gawekna clupak pitung iji, katumpangna ing ndhuwure, supaya madhangi kang ana ing ngarepe.

³⁸Sapite lan tadhahane langes iya padha mas murni.

³⁹Mas murni satalenta kang dianggoa gawe padamaran dalah sapirantine kabeh.

⁴⁰Dingati-ati, anggonira gawe kabeh mau kudu ngepleki conto kang wus katedahake marang sira ana ing gunung.” [101†] [102†]