Read Kitab Sutji, 1981 PANGENTASAN 31 Bible Online

PANGENTASAN 31 - Kitab Sutji, 1981 bible

PANGENTASAN 31

¹Sawuse mangkono Pangeran Yehuwah ngandika marang Nabi Musa, mangkene:

²“Lah Ingsun wus milih Bezaleel bin Uri bin Hur, saka taler Yehuda,

³lan wus Sunpenuhi Rohing Allah, keahlian, kawasisan tuwin kawruh tumrap sawernaning pagawean,

⁴bisa ngrancang pagawean barang mas, salaka lan tembaga;

⁵nggosok sesotya supaya kena dipasang; ngukir kayu sarta nindakake sarupane gegawean.

⁶Karodene Ingsun iya wus netepake minangka rewange ing gawe iya iku Aholiab bin Ahisamakh, saka taler Dhan; saben ahli wus Sunparingi keahlian; iku padha gawea sabarang kang Sunprentahake marang sira:

⁷Tarub Pasewakan, pethi angger-angger, tutup pangruwatan kanggo pethi mau, lan sakabehe pirantine tarub iku,

⁸kayata meja sapirantine, padamaran mas murni sapirantine lan misbyah padupan,

⁹misbyah kurban obaran sapirantine, wadhah banyu satadhahane,

¹⁰mangkono uga panganggon dhines, sandhangan suci kanggo Harun sarta sandhangane para anake kang padha dadi imam,

¹¹lenga jebad lan dupa wangi kanggo ing pasucen; iku kabeh kudu kagawe miturut plek kaya kang wus Sundhawuhake marang sira.” [118†]

¹²Pangeran Yehuwah ngandika maneh marang Nabi Musa, mangkene:

¹³“Sira mratelakna pangandikaningSun marang wong Israel, mangkene: Poma sira padha netepana dina-dina SabatingSun, awit iku minangka pratandha ana ing antarane Ingsun lan sira, nganti turun-tumurun, supaya sira sumurup, yen Ingsun iki Yehuwah, kang nucekake sira kabeh.

¹⁴Kang iku sira padha netepana dina Sabat, awit iku dina suci tumrap sira; sing sapa nyawiyah kasucene dina Sabat, iku kaukuma pati, awitdene sadhengah wong kang nyambut gawe ing dina iku, wong kaya mangkono mau katumpesa saka ing satengahe bangsane.

¹⁵Nem dina wong padha nindakna pagawean, nanging dina kapitu iku sabat, dina ngaso babarpisan, dina suci kagem Pangeran Yehuwah; sing sapa nindakake pagawean ing dina Sabat, iku kudu kaukum pati.

¹⁶Kang iku wong Israel padha netepana dina Sabat, dina iku diriyayakna turun-tumurun, minangka prajanjian kang langgeng.

¹⁷Iku dadia pratandha ana ing antarane Ingsun lan wong Israel kanggo ing salawas-lawase, awitdene sajroning nem dina anggone Pangeran Yehuwah karya langit lan bumi, lan ing dina kapitu Panjenengane kendel makarya perlu ngaso.” [119†] [120†]

¹⁸Sawuse Pangeran Yehuwah mungkasi pangandikane marang Nabi Musa ana ing gunung Sinai, banjur maringi papan angger-angger loro, papan watu kang diserati dening racikaning Allah.