Read Kitab Sutji, 1981 AYUB 11 Bible Online

AYUB 11 - Kitab Sutji, 1981 bible

AYUB 11

¹Zofar wong Naama banjur mangsuli calathune:

²“Wong kakehan rembug iku apa ora kudu diwangsuli? Apa wong kang juweh iku kudu dianggep bener?

³Apa wong kudu meneng bae krungu ocehmu iku? Tuwin manawa kowe ngala-ala iku apa ora ana kang melehake?

⁴Kowe munjuk: Piwulang kawula punika murni, saha kawula resik wonten ing paningal Paduka.

⁵Nanging muga-muga Gusti Allah piyambak karsa ndhawuhake pangandika, sarta mbikak lathine tumrap kowe,

⁶lan paring sumurup marang kowe bab wewadining kawicaksanan, awit iku isine aneh. Kowe nuli bakal sumurup, yen Gusti Allah ora ngetang kaluputanmu saperangan.

⁷Apa kowe bisa njajagi wewadosing Allah, apa bisa nyumurupi wates-watese pangwaose Kang Mahakuwasa?

⁸Iki dhuwure padha karo langit; -- kowe bisa nindakake apa? Jerone ngluwihi teleng palimengan: -- kowe mangreti apa?

⁹Dawane ngluwihi ukuraning bumi, jembare ngungkuli samodra.

¹⁰Manawa Panjenengane langkung, nuli nangkep lan ngadili, sapa kang bisa mambengi?

¹¹Amarga Panjenengane nguningani si juru apus sarta mirsa piala tanpa ningali.

¹²Manawa wong bodho bisa mangreti, beloning kuldi alas iya bisa lair dadi manungsa.

¹³Manawa atimu kokcawisake, nuli ngegarake tanganmu marang Panjenengane,

¹⁴sarta piala kang ana ing tanganmu iku kokedohake, tuwin kowe ora aweh duraka manggon ana ing tarubmu,

¹⁵kowe mesthi banjur bisa ndengengek kalawan tanpa cacad, temah santosa lan ora bakal wedi,

¹⁶kowe malah banjur lali marang kasusahanmu, iku mung kokelingi kaya banyu kang wus kepungkur miline.

¹⁷Uripmu padhange bakal ngungkuli wayah tengange, pepeteng bakal dadi padhang kaya esuk.

¹⁸Kowe bakal rumangsa tentrem, awit ana pangarep-arep; sawuse mulat ngiwa nengen banjur bakal turu kepenak;

¹⁹anggonmu nglegeyeh ora bakal ana kang ngreridhu, lan akeh wong kang padha ngempek-empek marang kowe.

²⁰Nanging mripate wong duraka mesthi bakal dadi lamur, mulane padha ora bisa lumayu ngungsi maneh; kang dadi pangarep-arepe mung pecating nyawane.”