Read Kitab Sutji, 1981 AYUB 13 Bible Online

AYUB 13 - Kitab Sutji, 1981 bible

AYUB 13

¹“Lah iku kabeh wus dakdeleng kalawan mripatku, dakrungu kalawan kupingku lan dakmangreteni.

²Apa kang padha koksumurupi, iku iya daksumurupi, aku ora kalah karo kowe.

³Nanging aku arep munjuk marang Kang Mahakuwasa, aku kapengin mbelani prakaraku ana ing ngarsaning Allah.

⁴Dene kowe kabeh iku wong kang padha nutupi gorohmu, sarta padha dadi dhukun kang palsu.

⁵Saupama kowe padha meneng babar pisan, iku malah dadi kawicaksananmu.

⁶Rungokna ta wangsulanku lan gatekna panjawabing lambeku!

⁷Apa kowe gelem goroh kagem Gusti Allah, apa kowe gelem ngapusi kagem Panjenengane?

⁸Apa kowe gelem mbelani Gusti Allah sarta bebantahan kanggo mbelani Panjenengane?

⁹Apa prayoga, manawa Panjenengane niti-priksa marang kowe? Apa kowe bisa ngapusi Panjenengane kaya ngapusi marang wong?

¹⁰Kowe bakal padha kaukum kalawan keras manawa kowe mbelani kalawan ora ngeblak.

¹¹Apa kamulyane Gusti Allah iku ora bakal ngagetake kowe, sarta apa kowe ora bakal ketiban ing pagirise?

¹²Pepeling-pepelingmu iku wulang bebasan lebu lan tamengmu iku tameng lempung.

¹³Padha menenga! Aku arep calathu, nadyan apa bae kang bakal tumempuh marang aku, daksanggane!

¹⁴Dagingku arep dakjupuk kalawan untuku, lan nyawaku arep daksangga ing tanganku.

¹⁵Delengen, Panjenengane arep mateni aku, aku wus ora duwe pangarep-arep, ewadene aku arep ngaturake panjawab ing bab lakuku ana ing ngarsane.

¹⁶Panjenengane bakal dadi kaslametanku, nanging wong lamis ora kena seba ing ngarsane.

¹⁷Rungokna kang tumenan tembung-tembungku, lan gatekna katranganku!

¹⁸Sumurupa, aku wus nyawisake prakaraku, aku yakin, manawa aku bener.

¹⁹Sapa kang keconggah pepadon karo aku, iya wis, aku dakmeneng bae banjur dakmati.

²⁰Namung kalih prakawis ingkang mugi sampun Paduka tundukaken dhumateng kawula, dados kawula boten badhe ndhelik saking ing ngarsa Paduka,

²¹inggih punika: Asta Paduka mugi Paduka singkiraken ingkang tebih saking kawula, kaliyan malih kawula sampun ngantos gumeter margi saking pagiris Paduka,

²²lajeng Paduka mugi nimbali kawula, kawula inggih badhe ngaturi wangsulan; utawi kawula ingkang munjuk saha Paduka ingkang paring wangsulan.

²³Sapinten ta agenging kalepatan saha dosa kawula? Kawula mugi Paduka sumerepaken dhateng panerak saha dosa kawula.

²⁴Punapa sababipun dene Paduka ngantos nyingidaken wadana Paduka saha kawula Paduka anggep mengsah?

²⁵Ron kabur kanginan kok Paduka damel geter; dami garing kok Paduka bujeng-bujeng!

²⁶Sabab kawula Paduka etrapi ingkang pait getir, kalepatan nalika nem-neman kawula punika Paduka dhawahaken dhateng kawula,

²⁷suku kawula Paduka belok, sarta salampah-lampah kawula Paduka ulat-ulataken, tlapakan kawula Paduka pasangi pepalang,

²⁸mangka punika tumrap dhateng tiyang ingkang sampun ringkih kados kajeng gapuk, kados sinjang ingkang dipun tedha ing renget.”