Read Kitab Sutji, 1981 AYUB 24 Bible Online

AYUB 24 - Kitab Sutji, 1981 bible

AYUB 24

¹“Yagene wektune pangadilan ora kapesthekake dening Kang Mahakuwasa? Yagene wong kang ngabekti ora sumurup ing dinane pangadilan?

²Ana wong kang padha ngowahi watesing palemahan, kang ngrampas pepanthan kewan banjur diengon dhewe.

³Kuldine bocah lola diinggatake lan sapine wadon randha digadhe.

⁴Wong miskin padha disingkang-singkang, wong kesrakat ing sajroning nagara kepeksa padha ndhelik kabeh.

⁵Lah kaya kuldi alas ing ara-ara samun anggone padha metu arep nyambut gawe golek pangan ing tanah bera kanggo anak-anake.

⁶Ana ing pategalan padha njupuki panganing kewan, lan ana ing kebone anggur wong duraka padha methiki woh kekarene.

⁷Padha nginep kalawan wuda, amarga ora duwe sandhangan, sarta ora duwe kemul ing wektu adhem;

⁸padha klebus marga saka deresing udan ing pagunungan, lan sarehne ora ana papan kanggo ngeyub, banjur kepeksa ndhepipis ing parang.

⁹Ana kang ngrebut bocah yatim saka ing susune biyunge, sarta nggadhe bayine wong miskin.

¹⁰Padha klambrangan kalawan wuda, tanpa sandhangan, lan padha mikul gedheng-gedhengan gandum kalawan keluwen.

¹¹Padha mipit lenga ana ing antarane kebon rong guthek padha ngiles-iles pamipitan anggur kalawan kasatan.

¹²Padha krungu panggluruhe wong-wong kang wis meh mati saka ing kutha, lan panjeriting wong-wong kang nandhang tatu, nanging Gusti Allah ora miyarsakake pandongane.

¹³Ana maneh golongan kang nyatru marang pepadhang kang ora sumurup marang margining Allah lan ora tetep ngambah ing lelurung pitedahe.

¹⁴Sadurunge wayah bangun esuk durjana tumandang mateni wong kesrakat lan wong miskin, dene yen bengi tumindake kaya maling.

¹⁵Wong kang laku jina ngenteni wayah repet-repet, awit pamikire: Aku aja nganti kaweruhan ing wong; banjur raine dikudhungi.

¹⁶Samangsa peteng padha mbabah omah, yen awan padha ndhelik, ora gelem ndeleng pepadhang,

¹⁷awit tumraping wong-wong iku peteng iku esuk, lan wus padha kulina marang peteng ndhedhet kang nggegirisi.

¹⁸Padha keli ana ing lumahing banyu, bageane kang ana ing bumi kena ing ipat-ipat; padha ora menyang ing pakebonane anggur maneh.

¹⁹Banyuning salju kasirnakake dening ketiga ngerak lan panasing srengenge, kaya mangkono uga tumindaking jagading wong mati marang wong kang nglakoni dosa,

²⁰wus ora dielingi dening guwa-garbaning biyung, dikrikiti ing eset ora ana kang ngelingi, dadine duraka iku tinugel kaya wit-witan.

²¹Wong kang ngrayah darbeke wong gabug kang ora duwe anak, lan ora gawe becik marang randha,

²²malah wong-wong prakosa padha disered kalawan kakuwatane; iku tangi maneh, mangka uripe ora ana kang dijagakake.

²³Gusti Allah maringi katentreman kang dadi gondhelane, lan mirsani salakune.

²⁴Mung sadhela anggone padha sumengka nganti dhuwur nanging banjur wus ora ana. Padha diesorake nuli dadi alum kaya samubarang kabeh, tumuli pinunggel kaya pucuking dami.

²⁵Manawa ora mangkono anane, sapa kang wani madoni aku lan ngapesake tembungku?”