Read Kitab Sutji, 1981 AYUB 28 Bible Online

AYUB 28 - Kitab Sutji, 1981 bible

AYUB 28

¹“Pancen ana papan pamelikan salaka lan papan panglimbangan emas.

²Wesi didhudhuk saka ing lemah sarta tembaga metu saka ing watu kang ingejer.

³Pepeteng diuwisi dening wong, nganti tekan teleng kang jero-jero anggone nliti watu-watu kang ana ing pepeteng lan ing palimengan.

⁴Wong kang padha ndhudhuk pamelikan iku adoh saka papan padunungane wong akeh, padha dilalekake dening wong kang padha lumaku ing dhuwur padha nggandhul geyang-geyong tanpa ancik-ancik adoh karo wong akeh.

⁵Bumi kang nuwuhake gandum, ngisore kawolak-walik kaya dening geni.

⁶Watune kadunungan watu manila kang isi mas ure.

⁷Dalane mrana ora kasumurupan ing manuk galak siji-sijia lan ora kaweruhan ing matane manuk bidho,

⁸ora kaambah ing kewan galak, lan iya ora ana singa kang liwat ing kono.

⁹Watu kelang uga ditandangi dening manungsa, gunung-gunung padha didhungkari tekan ing dhasare.

¹⁰Gunung parang padha diboboki digawe trowongan, mripate ndeleng samubarang kang adi.

¹¹Rembesing kali-kali padha dibunteti lan apa kang sumimpen diwetokake marang ing pepadhang.

¹²Nanging kawicaksanan iku tinemune ana ing ngendi, lan ana ing ngendi dununge akalbudi?

¹³Manungsa ora sumurup marang ajine, sarta iku iya ora tinemu ing bumine wong urip.

¹⁴Calathune teleng: Aku ora kanggonan. Ujare sagara: Aku ora kadunungan.

¹⁵Ora kena diijoli ing emas murni, utawa diregani kalawan salaka.

¹⁶Ora kena diregani nganggo emas Ofir utawa nganggo sotya soham kang larang lan manila kang adi,

¹⁷ora kena ditandhing karo emas utawa kaca, utawa diijoli rerenggan emas murni.

¹⁸Giwang utawa kristal iku sapele yen katimbang karo iku. Ndarbeni kawicaksanan iku luwih becik tinimbang mutyara.

¹⁹Sotya cepaka saka ing tanah Etiopia iya ora bisa nandhingi; iya ora kena diajeni nganggo emas murni.

²⁰Kawicaksanan iku saka ngendi asale, lan akal-budi iku ana ngendi panggonane?

²¹Iku sinamar tumrap mripate wong urip, malah uga sinamar tumrap manuk ing awang-awang.

²²Kasusahan lan pati calathu: Kupingku mung krungu wartane bae.

²³Gusti Allah kang mirsa dalan kang anjog marang kawicaksanan sarta nguningani dununge.

²⁴Amarga paningale nyrambahi tekan ing pungkasane bumi, sarta mirsa apa kang ana ing sangisoring langit kabeh.

²⁵Nalika Panjenengane netepake kakuwataning angin, lan nemtokake kehing banyu,

²⁶nalika damel katetepan tumrap udan lan dalaning kilate gludhug,

²⁷nalika iku Panjenengane nguningani kawicaksanan kang banjur kawartakake, katetepake, malah iya katiti-priksa;

²⁸nanging marang manungsa pangandikane: Lah pangabekti marang Pangeran iku kawicaksanan sarta nyingkiri piala iku akal-budi.” [9†]