Read Kitab Sutji, 1981 AYUB 33 Bible Online

AYUB 33 - Kitab Sutji, 1981 bible

AYUB 33

¹“Dene saiki, he Ayub, rungokna kandhaku, lan tilingna pangrungumu marang tembung-tembungku.

²Sumurupa, aku wus mbukak cangkemku, ilatku ngucap ana ing sangisoring cethakku.

³Atiku nglairake tembung kalawan jujur, lan lambeku mratelakake kalawan cetha apa kang disumurupi.

⁴Aku katitahake dening Rohing Allah, lan napase Kang Mahakwasa njalari aku urip.

⁵Manawa kowe bisa, aku wangsulana, mapana arep-arepan karo aku.

⁶Satemene tumraping Allah aku karo kowe iku padha bae, aku iya diwangun saka lempung.

⁷Mulane kowe aja giris ana ing ngarepku, ora abot anggonku bakal menet marang kowe.

⁸Nanging kowe wus calathu ing sacedhake kupingku, lan aku wus krungu anggonmu ngucap mangkene:

⁹Aku iki resik aku sepi ing panerak, aku suci tanpa kaluputan.

¹⁰Nanging Panjenengane manggih alasan kanggo nglawan marang aku, aku dianggep mungsuhe.

¹¹Sikilku dibelok, satindakku tansah dipirsani.

¹²Wangsulanku marang kowe: Ing bab iku kowe ora bener, awit Gusti Allah iku ngungkuli manungsa.

¹³Yagene kowe kok madoni Panjenengane, awit ora paring wangsulan marang sakehing tembungmu?

¹⁴Amarga Gusti Allah anggone paring pangandika sarana patrap siji loro, nanging wong ora nggatekake.

¹⁵Sajroning pangimpen, sajroning wahyu ing wayah bengi, manawa wong turu kepati, manawa leyeh-leyeh ing paturon;

¹⁶ing kono Panjenengane mbikak kupinging manungsa lan nggatekake wong-wong mau kalawan panyaruwe-panyaruwe,

¹⁷minangka pepalang tumrap pratingkahe lan kanggo ngilangi gumunggunge,

¹⁸temah nyawane kasingkirna saka ing kubur lan uripe saka ing penempuhing tumbak.

¹⁹Wong kelakon kapredi kalawan nandhang lara ing paturon, ing sajroning balung-balunge tansah ana crah kang tanpa kendhat.

²⁰Nganti wetenge bosen roti, ilang kekarepane mangan kang enak-enak.

²¹Daginge susut nganti ora katon, balung-balunge kang maune ora katon, banjur padha pating pendhosol.

²²Nyawane wus nyedhaki kubur, sarta uripe nyedhaki pati.

²³Manawa ana malaekat ing sandhinge, kang dadi panengah, siji ing antarane sewu, kang kadhawuhan mratelakake kabeneraning manungsa,

²⁴ing kono Gusti Allah bakal paring kawelasan pangandikane: Uculna wong iku, supaya aja nganti mudhun marang ing kubur, Ingsun wus oleh panebus.

²⁵Wong mau banjur kasegerake awake kaya wong nom, dadi kaya nalika isih nom.

²⁶Samangsa nyenyuwun marang Gusti Allah, Panjenengane iya karsa midhangetake, temah ndeleng wadanane kalawan suka-pirena, lan Gusti Allah banjur mangsulake kabenerane marang manungsa.

²⁷Wong mau nuli bakal nyaritani marang wong-wong liyane adhapur kidung mangkene: Aku wus nglakoni dosa lan kang jejeg wus dakbengkokake, ewadene aku ora kawales.

²⁸Gusti Allah wus mitulungi nyawaku temah ora tumiba ing kubur, lan uripku bakal weruh pepadhang.

²⁹Kabeh iki nyata-nyata pakaryaning Allah kang ping pindho, ping telu tumanduk marang manungsa,

³⁰karsane mbalekake nyawane saka ing kubur satemah kasorotan ing cahyaning urip.

³¹He Ayub, gatekna, rungokna aku, menenga, aku kang guneman.

³²Manawa ana kang bakal kokkandhakake, wangsulana aku: kandhaa, awit aku kapengin bisa mbenerake kowe.

³³Manawa ora, rembugku rungokna; kowe menenga, aku arep nyumurupake kawicaksanan marang kowe.”