Read Kitab Sutji, 1981 AYUB 4 Bible Online

AYUB 4 - Kitab Sutji, 1981 bible

AYUB 4

¹Ing kono Elifas wong Teman mangsuli, pangucape:

²“Manawa ana wong nyoba guneman karo kowe, apa ndadekake gelaning atimu? Nanging sapa kang bisa ngampet pitutur?

³Lan wus akeh wong kang padha kokwulang, tangan kang jimpe wus kokkuwatake,

⁴wong kang kajengklok wus kokjejegake sarana pituturmu, dhengkul kang nyleyor wus kokkukuhake,

⁵mangka bareng kowe dhewe wiwit ginepok, kowe banjur ngenes, bareng ketaman, ruhara atimu.

⁶Rak pangabektimu marang Gusti Allah kang minangka andel-andelmu, lan katemenane lakumu kang dadi pangarep-arepmu?

⁷Rasakna ta: Ngendi ana wong resik kang nemu karusakan, utawa wong temen kang tinumpes?

⁸Sasumurupku wong kang mluku cilaka lan nyebar rubeda, iya iku uga kang diundhuh.

⁹Padha tumpes dening napasing Allah, lebur dening bantering bebendune.

¹⁰Singane nggero, singane nggereng, untune singa nom padha rampal.

¹¹Singa tua mati marga kekurangan memangsan, sarta anake singa wadon padha buyar.

¹²Aku wus binisikan pitutur, tembung kang dibisikake iya wus tinampan dening kupingku,

¹³sajrone ngrasak-ngrasakake impen-impen ing wayah bengi, ing wektune wong kecandhak ing turu kepati,

¹⁴aku ketaman ing wedi lan geter, kang njalari balung-balungku gumeter.

¹⁵Nuli ana roh liwat ing ngarepku, temah wulune awakku mengkorog kabeh.

¹⁶Nalika mandheg ana ing ngarepku, aku ora bisa niteni rupane. Ana kang cumetha ing pandelengku, aku nuli krungu swara mbisiki mangkene:

¹⁷Apa manungsa bisa katon bener ana ing ngarsaning Allah, apa manungsa bisa katon suci ana ing ngarsane kang nitahake?

¹⁸Lah ta Gusti Allah ora pitados marang para abdine, malah sanadyan para malaekate iya kapirsan anggone kesasar,

¹⁹apa maneh para kang manggon ing omah lempung, kang tinalesan lebu, kang padha diidak-idak nganti mati kaya renget.

²⁰Ing antarane esuk lan sore padha diidek-idek, lan tanpa rinasa padha sirna salawase.

²¹Apa tamparing tarube ora dipedhot? Padha mati nanging tanpa kawicaksanan.