Read Kitab Sutji, 1981 AYUB 40 Bible Online

AYUB 40 - Kitab Sutji, 1981 bible

AYUB 40

¹Pangeran Yehuwah banjur ngandika maneh marang Ayub saka ing satengahing prahara, mangkene:

²“Mara rumantia dikaya wong lanang; “Sira bakal Sundangu, Ingsun unjukana wangsulan.

³Apa sira arep ngorakake pangadilaningSun nyalahake Ingsun supaya bisa mbenerake awakira dhewe?

⁴Apa tanganira kaya astaning Allah, lan apa sira bisa ngetokake swara gumludhug kaya Panjenengane?

⁵Yen mangkono awakira wenehana rerenggan kamulyan lan kaluhuran, sira ngrasuka kaagungan lan prabawa!

⁶Esokna nepsunira kang mulad-mulad; awasna saben wong kang kumlungkung lan sira esorna,

⁷awasna saben wong kang lumuhur-luhur iku lan dhingklukna. Sarta wong duraka padha sira leburna ana ing panggonane!

⁸Pendhemen bebarengan ana ing njero lebu, kunjaranen ana ing papan kang ndhelik,

⁹temah Ingsun bakal ngalembana marang sira, amarga tanganira tengen ngolehake kaunggulan marang sira.”

¹⁰“Sira nyawanga jaran Nil, kang wus Suntitahake uga kaya sira. Iku mangan suket kaya sapi.

¹¹Sira mawanga karosane kang dumunung ana ing lempenge kakuwatane kang ana ing ototing wetenge!

¹²Anggone ngencengake buntute kaya wit eres, otot-ototing pupune bebuletan,

¹³Balung-balunge kaya pipa tembaga, ragangane kaya lantakan wesi.

¹⁴Iku kang dhisik dhewe katitahake dening Gusti Allah, makhluk kang kaparingan gegaman pedhang;

¹⁵gunung-gunung padha nuwuhake kang minangka pakane; kewan alasan padha seneng-seneng ana ing kono.

¹⁶Jaran Nil mau anggone njerum ana ing sangisoring wit trate, ingaling-alingan ing glagah lan rawa.

¹⁷Tetuwuhan trate padha ngayomi kalawan ayang-ayangane, sarta ingubengan ing wit truntum.

¹⁸Sanadyan ilining banyu santer banget, kewan mau ora gumeter; sanadyan bengawan Yarden luber nempuh marang cangkeme, atine iya enak-enak bae.

¹⁹Apa wong bisa nyekel saka ing ngarep lan bisa ngeluhi irunge?” [12†]

²⁰“Apa sira bisa nggered baya nganggo pancing, utawa njiret ilate nganggo tali?

²¹Apa sira bisa ngetrapake tali penjalin ing irunge, utawa nyublesake gantholan ing uwange.

²²Apa kira-kira kewan mau bisa njaluk sih-piwelas marang sira, utawa bisa calathu alus marang sira?

²³Apa kira-kira bisa gawe prajanjian kalawan sira, temah banjur sira dadekake batur ing salawase?

²⁴Apa sira bisa dolanan karo kewan mau kayadene karo manuk, sarta apa bisa sira dadekake dolananing anak-anakira wadon?

²⁵Apa kira-kira kena didadekake daganganing para juru amek iwak, utawa diedum-edum ing antarane para wong dagang?

²⁶Apa kulite kena sira jojohi kalawan towok, utawa endhase kalawan cempuling?

²⁷Tanganira sira tumpangna ing endhase! Elinga marang anggone tarung! -- Sira ora bakal nindakake mangkono maneh!

²⁸pangarep-arepira iku sanyata tanpa isi. Lagi ndeleng kewan iku bae, wong wis ambruk.