Read Kitab Sutji, 1981 AYUB 6 Bible Online

AYUB 6 - Kitab Sutji, 1981 bible

AYUB 6

¹Ing kono Ayub banjur mangsuli, pangucape:

²“Adhuh muga karubedanku katrajua kalawan patitis, sarta kasrakatanku sinelehna ing timbangan!

³Abote mesthi ngungkuli wedhi ing sagara; mulane metune tembungku sasar-susur.

⁴Marga jemparinge Kang Mahakuwasa padha tumancep ing awakku, ampuhe sinesep ing nyawaku; aku tinempuh ing pagiris kang saka ing Allah.

⁵Kuldi alasan apa iya gereng-gereng ana ing pasuketan ijo, sapi apa iya mbengah-mbengah ana ing ngarepe pakane?

⁶Barang kang cemplang rasane apa dipangan tanpa uyah, utawa putihing endhog apa ana rasane?

⁷Ndemok bae aku ora sudi, tumrap aku iku pangan kang ngunek-uneki.

⁸Ah, muga-muga panyuwunku kabul, Gusti Allah muga karsa paring kang dadi pangarep-arepku!

⁹Gusti Allah muga karsaa ngremuk aku, ngagagake astane sarta nguwisi uripku!

¹⁰Iku kang isih dadi panglipur tumrap aku, malah aku bakal lincak-lincak marga saka bungahku. ing sajrone aku nandhang sangsara kang tanpa piwelas iku, sabab aku ora tau nyelaki pangandikane Kang Mahasuci.

¹¹Sapira ta kakuwatanku, kok aku bisa tahan, lan apa ta wekasaning awakku, kok aku isih kudu nyabarake?

¹²Apa kakuwatanku iku kaya watu? Apa dagingku kaya prunggu?

¹³Rak wus ora ana pitulungan babar pisan tumrap aku, lan kaslametan wus adoh saka aku?

¹⁴Wong kang ora welas marang pepadhane, iku nglirwakake pangabekti marang Kang Mahakuwasa.

¹⁵Sadulurku padha ora kena diandel kaya kali, kaya santering banyu kang metu saka dhasare kali,

¹⁶kang buthek marga banyune njendhel, salju kang ana ing njerone dadi ajer,

¹⁷kang ing mangsa panas padha surud, samangsa kena ing dayane panas tumuli asat ana ing panggonane;

¹⁸iline menggak-menggok, anjog ana ing pasamunan banjur mati.

¹⁹Kapilah kang saka ing Tema padha ngungak-ungak, para sudagar ing Syeba padha ngarep-arep,

²⁰nanging padha kecuwan marga saka manut kayakinane, satekane ing kana bakal kapusan.

²¹Iya kaya mangkono iku kowe kabeh saikine tumrap aku, nalika kowe padha nyumurupi kaanan kang nggegirisi, banjur padha kaget.

²²Apa aku tau kandha: Nggawaa oleh-oleh, sarta: Aku wenehana dhuwit reruba saka bandhamu,

²³utawa: Aku luwarana saka tangane kang nganiaya, lan: Aku tebusen saka tangane kang misesa?

²⁴Aku wulangen, temah aku bakal meneng; aku sumurupna kang dadi kaluputanku.

²⁵Iba gedhene sawabe pitutur kang jujur! Nanging apa tegese pamelehmu iku?

²⁶Apa karepmu iku nacad tembung? Apa tembunge wong kang entek pangarep-arepe iku dianggep angin?

²⁷Malah kowe padha mbuwang undhi tumrap marang bocah lola, dene mitramu kokdadekake barang dagangan.

²⁸Nanging saiki aku sawangen; aku rak ora bakal ngapusi kowe.

²⁹Padha salina pangrasa ta, ja nganti ana kaculikan kang tumindak; iya padha salina pangrasa, aku iki nyata-nyata bener.

³⁰Ing ilatku apa ana durakane? Cethakku apa ora bisa mbedak-mbedakake kasangsaran?”