Read Kitab Sutji, 1981 JABUR 116 Bible Online

JABUR 116 - Kitab Sutji, 1981 bible

JABUR 116

¹Aku tresna marang Sang Yehuwah awit miyarsakake swaraku lan panyuwunku,

²sarta talingane nilingake aku, mulane sajegku urip aku bakal nyebut marang Panjenengane.

³Aku digubed ing talining pati, sarta ditempuh ing rasa wedi marang jagading wong mati, tuwin ngrasakake karupekan lan kasusahan.

⁴Nanging aku nyebut asmaning Pangeran Yehuwah: “Dhuh Yehuwah, Paduka mugi kersaa ngluwari kawula.”

⁵Pangeran Yehuwah iku asih-mirma lan adil, Gusti Allah kita iku ambek welasan.

⁶Pangeran Yehuwah iku rumeksa marang wong prasaja; aku wus lemes, nanging banjur dipitulungi dening Panjenengane.

⁷Dhuh nyawaku, puliha dadi ayem maneh, awit Pangeran Yehuwah wus nyaeni marang kowe.

⁸Inggih, Paduka sampun ngluwari kawula saking pejah, lan mripat kawula saking luh, tuwin suku kawula saking sesandhungan.

⁹Aku diparengake lumaku ana ing ngarsaning Sang Yehuwah, ana ing tanahe wong urip.

¹⁰Aku pracaya, sanajan duwe pangucap: “Banget temen anggonku katindhes.”

¹¹Ing sajroning kabingunganku aku ngucap: “Manungsa iku padha dora-cara kabeh.”

¹²Kang dakgawe piwales apa marang Sang Yehuwah, tumrap ing sakehe sih-kadarmane marang aku?

¹³Aku arep njunjung tuwunging pangentasan lan arep nyebut asmaning Pangeran Yehuwah,

¹⁴arep ngluwari kaulku marang Sang Yehuwah ana ing ngarepe umat kabeh.

¹⁵Patine para kekasihe iku akeh pangajine ana ing paningaling Sang Yehuwah.

¹⁶Dhuh Yehuwah, kawula punika abdi Paduka, inggih estu abdi Paduka, anakipun parekan Paduka; Paduka ingkang sampun nguculi bebandan kawula.

¹⁷Paduka badhe kawula saosi kurban pamuji sokur, saha badhe nyebut asmaning Sang Yehuwah.

¹⁸Dakngluwari kaulku marang Pangeran Yehuwah ana ing ngarepe umate kabeh,

¹⁹ing platarane padalemaning Pangeran Yehuwah, ana ing satengahmu, he Yerusalem! Haleluya! [180†]