Read Kitab Sutji, 1981 JABUR 118 Bible Online

JABUR 118 - Kitab Sutji, 1981 bible

JABUR 118

¹Padha saosa pamuji sokur marang Pangeran Yehuwah, awitdene Panjenengane iku sae! ujer sih-kadarmane iku langgeng ing salawas-lawase.

²Israel ngucapa: “Sih-kadarmane iku langgeng ing salawase!”

³Turune Imam Harun ngucapa: “Sih-kadarmane iku langgeng ing salawase!”

⁴Para wong kang ngabekti marang Pangeran Yehuwah padha ngucapa: “Sih-kadarmane iku langgeng ing salawase!”

⁵Sajroning karubedan aku nyebut marang Pangeran Yehuwah. Pangeran Yehuwah tumuli nyembadani panyuwunku, aku kaparingan lega;

⁶Pangeran Yehuwah nunggil karo aku, aku bakal ora wedi. Manungsa bisa manggawe apa marang aku?

⁷Pangeran Yehuwah nunggil karo aku sarta mitulungi aku, aku bakal nganggep sepele marang wong kang padha sengit marang aku.

⁸Becik ngungsi marang Pangeran Yehuwah katimbang karo ngandelake manungsa;

⁹becik ngungsi marang Pangeran Yehuwah katimbang karo ngandelake para panggedhe.

¹⁰Aku dikepung sakehe bangsa demi asmaning Sang Yehuwah, kabeh padha dakgecak.

¹¹Aku dikepung, kemput anggone ngepung, demi asmaning Sang Yehuwah, dakgecak.

¹²Padha ngepung aku kaya tawon, padha mulad-mulad kaya geni eren, demi asmaning Sang Yehuwah, padha dakgecak temah mundur.

¹³Aku dijorogake sarosane nganti tiba, nanging Sang Yehuwah mitulungi aku.

¹⁴Pangeran Yehuwah iku dadi karosanku lan masmurku,, Panjenengane wus dadi karaharjanku.

¹⁵Ing kemahe para wong mursid ana swara surak-surak lan kaunggulan: “Astane tengen Sang Yehuwah nindakake kaprawiran,

¹⁶Astane tengen Sang Yehuwah bisa njunjung; Astane tengen Sang Yehuwah nindakake kaprawiran!”

¹⁷Aku bakal ora mati, nanging urip lan aku bakal nyritakake pakaryaning Sang Yehuwah.

¹⁸Sang Yehuwah banget anggone ngrangket marang aku, nanging aku ora diulungake marang pati.

¹⁹Aku wenganana gapuraning kabeneran, aku arep lumebu, arep ngunjukake panuwun marang Sang Yehuwah.

²⁰Iki gapuraning Sang Yehuwah kang bakal dileboni dening para wong mursid.

²¹Kawula ngunjukaken panuwun dhumateng Paduka, margi Paduka sampun nyembadani panyuwun kawula sarta Paduka sampun dados karahayon kawula.

²²Watu kang tinampik dening para juru yasa omah iku wus dadi uger-ugering padon;

²³kadadeyan iku saka ing Pangeran Yehuwah, sarta elok ing pandeleng kita.

²⁴Iki dina kang katitahake dening Pangeran Yehuwah, ayo padha bungah-bungah lan sukarena.

²⁵Dhuh Yehuwah, Paduka mugi kersaa paring karaharjan. Dhuh Yehuwah, Paduka mugi kersaa paring kabegjan.

²⁶Binerkahana ingkang rawuh atas asmanipun Pangeran Yehuwah. Aku padha mberkahi kowe kabeh saka ing padalemaning Sang Yehuwah.

²⁷Pangeran Yehuwah iku Gusti Allah, Panjenengane paring pepadhang marang kita, kurbane riyaya cancangen kalawan tali ing sungu-sungune misbyah.

²⁸Paduka punika Allah kawula, Paduka badhe kawula caosi pamuji sokur, dhuh Allah kawula, Paduka badhe kawula luhuraken.

²⁹Padha saosa pamuji sokur marang Sang Yehuwah, awit Panjenengane iku sae! Ujer sih-susetyane iku kanggo ing salawase. [182†] [183†] [184†] [185†] [186†]