Read Kitab Sutji, 1981 JABUR 135 Bible Online

JABUR 135 - Kitab Sutji, 1981 bible

JABUR 135

¹Haleluya! Padha ngluhurna asmaning Pangeran Yehuwah, padha luhurna, he para abdining Pangeran Yehuwah.

²He para wong kang padha teka leladi ana ing padalemaning Sang Yehuwah, ing platarane padalemane Allah kita!

³Padha saosa puji marang Pangeran Yehuwah, awit Pangeran Yehuwah iku becik, asmane padha luhurna kalawan masmur, awit iku endah!

⁴Awit Pangeran Yehuwah wus milih Yakub dadi kagungane, Israel dadi kekasihe.

⁵Lah aku sumurup, yen Pangeran Yehuwah iku mahaagung, sarta Gusti kita kang ngungkuli sakehing allah.

⁶Pangeran Yehuwah nindakake apa kang dadi karsane, ana ing swarga lan ing bumi, ing segara lan ing saindenging samodra agung.

⁷Pangeran ndadekake mendhung mumbul saka ing pungkasaning bumi, nitahake bledheg kang mbarengi udan, angin diwetokake saka ing gedhonge.

⁸Panjenengane kang mejahi para anak pembarep ing tanah Mesir, manungsa lan kewan,

⁹apadene ndhatengake pratandha lan kaelokan ana ing satengahmu, he tanah Mesir, nglawan marang Raja Pringon lan sakehing abdine.

¹⁰Panjenengane kang nggecak bangsa akeh, sarta nyedani raja-raja kang santosa.

¹¹Sihon, ratune bangsa Amori, Og, ratu ing nagara Basyan, lan sakehe karajan ing tanah Kanaan,

¹²sarta tanahe diparingake dadi tanah-pusaka, tanah-pusaka marang Israel, umate.

¹³Dhuh Yehuwah, asma Paduka punika langgeng ing salaminipun. Dhuh Yehuwah, Paduka dipun enget-enget turun-tumurun.

¹⁴Awitdene Sang Yehuwah iku bakal paring kaadilan marang umate, sarta bakal melasi marang para abdine.

¹⁵Brahalane para bangsa iku selaka utawa mas, gaweane tangane manungsa,

¹⁶padha duwe cangkem nanging ora bisa calathu, padha duwe mata, nanging ora bisa ndeleng,

¹⁷kupinge ana, nanging ora bisa ngrungokake, dalah cangkeme iya ora ana ambekane.

¹⁸Iya kaya mangkono kaanane para wong kang gawe, sarta sakehing wong kang nganggep iku.

¹⁹He turune Rama Israel, padha saosa puji marang Pangeran Yehuwah, he para turune Imam Harun, padha saosa puji marang Pangeran Yehuwah.

²⁰He turune Rama Lewi, padha saosa puji marang Pangeran Yehuwah, he, para wong kang ngabekti marang Pangeran Yehuwah, padha saosa puji marang Pangeran Yehuwah.

²¹Sang Yehuwah kasaosana puji saka ing kutha Sion, Panjenengane kang akedhaton ana ing Yerusalem. Haleluya! [191†]