Read Kitab Sutji, 1981 JABUR 147 Bible Online

JABUR 147 - Kitab Sutji, 1981 bible

JABUR 147

¹Haleluya! Sanyata becik ngidungake masmur marang Allah kita iku, malah iku nengsemake lan pantes ngidungake pamuji iku.

²Pangeran Yehuwah mbangun Yerusalem, sarta ngempalake para wong Israel kang pating blesar.

³Panjenengane mulihake wong kang pepes atine, padha diblebedi tatune.

⁴Pangeran nemtokake cacahe lintang-lintang, padha kasebut jenenge dhewe-dhewe.

⁵Gusti Allah kita iku agung lan ngleluwihi kakiyatane, kawicaksanane ora kena winirasa.

⁶Pangeran Yehuwah nyantosakake maneh para wong kang katindhes, nanging para wong duraka padha diesorake nganti konjem ing bumi.

⁷Padha ngrepekna kidung pamuji sokur marang Pangeran Yehuwah, padha ngidunga masmur konjuk marang Gusti Allah kita kanthi swaraning clempung!

⁸Panjenengane kang nutupi langit kalawan mendhung kang nyawisi udan marang bumi, kang damel gunung-gunung padha nukulake suket.

⁹Panjenengane kang paring pakan marang sato-kewan, marang anak-anaking gagak kang padha celuk-celuk.

¹⁰Pangeran ora karenan marang karosaning jaran, lan marang sikile wong lanang.

¹¹Pangeran Yehuwah karenan marang wong kang ngabekti marang Panjenengane, lan para wong kang ngarep-arep marang sih-kadarmane.

¹²He Yerusalem, ngalembanaa marang Sang Yehuwah, he Sion saosa puji marang Allahmu,

¹³awit Pangeran nyantosani slaraking gapuramu, sarta mberkahi anak-anakmu ana ing wewengkonmu.

¹⁴Panjenengane kang nentremake satanah wewengkonmu, maregi kowe kalawan pepethinganing gandum.

¹⁵Panjenengane maringake dhawuhe marang bumi, Pangandikane lumawat pesat.

¹⁶Pangeran paring salju kaya wulu wedhus gembel, nyawurake ebun njendhel kaya awu.

¹⁷Pangeran nguncalake jendhelan banyu kaya pecahan, sapa bisa tahan ngadeg mbetahake adheme?

¹⁸Panjenengane ngandika, kabeh banjur ajer maneh, Panjenengane ngididake angin, banyune tumuli mili.

¹⁹Sabdane kaparingake marang Rama Yakub, apadene pranatane lan angger-anggere marang Rama Israel.

²⁰Panjenengane ora nindakake mangkono tumrap sakehing bangsa, sarta para bangsa iku padha ora sumurup marang sarake. Haleluya.