Read Kitab Sutji, 1981 JABUR 148 Bible Online

JABUR 148 - Kitab Sutji, 1981 bible

JABUR 148

¹Haleluya! Padha saosa puji marang Pangeran Yehuwah kang ana ing swarga! Padha saosa puji marang Panjenengane kang ana ing ngaluhur!

²He sakehe malaekate, padha saosa puji marang Panjenengane! He wadya-balane, padha saosa puji marang Panjenengane!

³He srengenge lan rembulan, padha saosa puji marang Panjenengane! He sakehing lintang kang gumebyar, padha saosa puji marang Panjenengane!

⁴He langit kang ngungkuli sakehe langit, padha saosa puji marang Panjenengane! he, banyu kang ana ing sandhuwuring langit!

⁵Sakabehe iku padha memujia marang asmaning Yehuwah, amarga Pangeran ngandika, samubarang kabeh banjur padha dumadi.

⁶Pangeran ngadegake sakabehe iku kanggo sabanjure lan ing salawase, sarta netepake paugeran kang ora kena katerak.

⁷Padha saosa puji marang Pangeran Yehuwah ana ing bumi, he ula-ula naga lan saindenging samodra agung;

⁸he geni lan udan es, salju lan pedhut, angin prahara kang nindakake sabdane;

⁹he gunung-gunung lan sakehing tetengger, sakehe karang-kitri lan sakehing wit eres;

¹⁰he para kewan alasan lan sakehing kewan, kewan kang gumremet lan manuk-manuk kang mawa swiwi.

¹¹He para raja ing bumi lan sakehing bangsa, para panggedhe lan sakehe peprentahan ing jagad,

¹²he para jaka lan para prawan, para wong tuwa lan wong anom!

¹³Kabeh iku kareben padha memuji marang asmaning Yehuwah, awit mung asmane kang luhur, kamulyane ngungkuli bumi lan langit.

¹⁴Sungune umate wus kaluhurake, dadi kidung pepujian tumrap sakehing wong kang dikasihi, tumrap wong Israel, umat kang rumaket marang Panjenengane. Haleluya!