Read Kitab Sutji, 1981 JABUR 33 Bible Online

JABUR 33 - Kitab Sutji, 1981 bible

JABUR 33

¹He para wong mursid, padha asurak-suraka ana ing Sang Yehuwah! Awit wus samesthine, manawa wong tulus atine padha memuji.

²Padha saosa puji sokur marang Sang Yehuwah kalawan clempung, kidungna masmur kalawan slukat akawat sepuluh.

³Kidungna kekidungan anyar; diprigel panabuhmu kanthi swara kang rame!

⁴Sebab pangandikane Sang Yehuwah iku nyata, samubarang kabeh katindakake kalawan setya tuhu.

⁵Panjenengane karenan marang kang bener lan adil; bumi kebak ing sih-kamurahaning Yehuwah.

⁶Sakehing langit padha katitahake dening sabdane Pangeran Yehuwah, sakehing balane dening napasing lesane.

⁷Banyuning segara dikumpulake kaya bebendungan, samodra gedhe dilebokake ing wadhah.

⁸Salumahing bumi cikben padha wedi marang Sang Yehuwah, wong saisining jagad cikben padha gumeter ana ing ngarsane!

⁹Amarga Panjenengane ngandika, kabeh banjur dadi; Panjenengane dhawuh, kabeh banjur ana.

¹⁰Sang Yehuwah nggagalake rancangane para bangsa; murungake rancangane para suku bangsa;

¹¹nanging karsane Sang Yehuwah iku tetep ing salawase, tuwin ciptaning galih iku turun-tumurun.

¹²Rahayu bangsa kang nganggep Sang Yehuwah dadi Allahe, sarta suku bangsa kang kapilih iku dadi kagungane!

¹³Pangeran Yehuwah maspaosake saka ing swarga, lan mirsani sakehing anake manungsa;

¹⁴saka ing padalemane nguningani sakehing isine bumi.

¹⁵Kabeh padha diwangun atine, sarta digatosake apa sapanggawene.

¹⁶Kaslametaning raja iku ora jalaran saka gedhening pangwasane; pahlawan iku ora bakal kapitulungan marga saka gedhening kakuwatane.

¹⁷Jaran iku tangeh yen marakake unggul, lan karosane kang ngedab-edabi ora njalari bisa oncat.

¹⁸Lan paningale Sang Yehuwah nguningani wong kang padha wedi marang Panjenengane, sarta nganti-anti marang sih-kadarmane,

¹⁹supaya nyawane kauwalake saka ing pati, sarta padha diuripi ing mangsa paceklik.

²⁰Nyawa kita nganti-anti marang Sang Yehuwah. Panjenengane iku pitulungan lan tetameng kita.

²¹Sanyata ati kita bungah marga saka Panjenengane, awit kita pracaya marang asmane kang suci.

²²Dhuh Yehuwah, sih-kadarman Paduka lumuntura dhateng kawula sadaya, kadosdene pangantos-antos kawula sadaya dhumateng Paduka.