Read Kitab Sutji, 1981 JABUR 38 Bible Online

JABUR 38 - Kitab Sutji, 1981 bible

JABUR 38

¹Masmur anggitane Prabu Dawud nalika nyaosake kurban pengetan.

²Dhuh Yehuwah, kawula mugi sampun ngantos kaukum salebeting bebendu Paduka, sarta kawula sampun ngantos karangket ing salebeting bramantya Paduka;

³amargi kawula ketaman ing panah Paduka, asta Paduka sampun ndhawahi kawula.

⁴Daging kawula boten wonten ingkang saras margi saking bebendu Paduka, balung kawula boten wonten ingkang wilujeng margi saking dosa kawula;

⁵amargi piawon kawula sampun tumempuh dhateng ing sirah kawula sadayanipun punika kados momotan ingkang langkung dening awrat saha kawraten tumrap kawula.

⁶Koreng kawula mambet boten eca, ngemu nanah margi saking bodho kawula.

⁷Kawula ngantos wungkuk, ngantos mbengkeluk sanget; sadinten muput anggen kawula lumampah sarwi mangangge bagor.

⁸Bangkekan kawula kebak tatu, saha daging kawula boten wonten ingkang wetah;

⁹kawula nglempuruk, katelasan kakiyatan, kawula asesambat amargi manah kawula trataban.

¹⁰Dhuh Pangeran, Paduka nguningani sadaya pepenginan kawula, sarta boten kesamaran menggah pasambat kawula.

¹¹Manah kawula trataban, kakiyatan kawula telas, saha mripat kawula koncatan sunaripun.

¹²Mitra saha tetepangan kawula sami sumingkir, margi saking memala kawula, saha sanak-sadherek kawula sami nebih.

¹³Tiyang ingkang ngarah nyawa kawula sami masang kala-jiret, ingkang murih cilaka kawula sami ngrantam badhe ngrisak kawula, saha saben dinten ngrancang paekan.

¹⁴Nanging kawula kados tiyang budheg, boten mireng, lan kados tiyang bisu, ingkang boten mbikak cangkemipun.

¹⁵Malah kados tiyang ingkang boten mireng, lan cangkemipun boten saged mabeni.

¹⁶Dene Paduka ingkang kawula ajeng-ajeng, dhuh Yehuwah; Paduka ingkang badhe maringi wangsulan, dhuh Pangeran Allah kawula.

¹⁷Gagasan kawula makaten: “Anggeripun tiyang punika sampun ngantos bingah-bingah margi saking kawula, sampun ngantos gumunggung manawi suku kawula gloyoran!”

¹⁸Awit kawula badhe dhawah jalaran kasandhung, saha kawula tansah karidhu ing sakit.

¹⁹Dene kawula ngakeni kalepatan kawula, kawula melang-melang margi saking dosa kawula.

²⁰Mengsah kawula kathah sanget, tuwin kathah tiyang ingkang sengit dhumateng kawula tanpa sabab;

²¹tiyang ingkang males awon dhateng kasaenan kawula, sami nglawan kawula, amargi kawula ngudi dhateng kasaenan.

²²Dhuh Yehuwah Allah kawula, Paduka mugi sampun negakaken kawula, sampun nebihi kawula.

²³Mugi enggala mitulungi kawula, dhuh Pangeran, Pamarta kawula!