Read Kitab Sutji, 1981 JABUR 67 Bible Online

JABUR 67 - Kitab Sutji, 1981 bible

JABUR 67

¹Kanggo lurah pasindhen. Binarung swaraning clempung. Masmur. Kidungan.

²Gusti Allah muga paring sih-rahmat lan berkah marang kita, Panjenengane muga karsaa nyunari kita kalawan wadanane, (Selah)

³supados margi Paduka kasumerepan wonten ing bumi, saha karahayon peparing Paduka wonten ing satengahing bangsa sadaya.

⁴Dhuh Allah, para bangsa mugi sami ngucapa sokur dhumateng Paduka; para bangsa mugi sami ngucap sokur dhumateng Paduka sadaya.

⁵Para suku bangsa mugi sami sukarenaa, tuwin surak-suraka, amargi Paduka ngereh para bangsa kanthi adil, lan para suku bangsa ing salumahing bumi sami Paduka tuntun. (Selah)

⁶Dhuh Allah, para bangsa mugi sami memujia dhumateng Paduka, Paduka pinujia dening sadaya bangsa.

⁷Bumi wus menehake pametune, Gusti Allah, Allah kita mberkahi kita.

⁸Gusti Allah mberkahi kita; salumahing bumi muga ngabektia marang Panjenengane.