Read Kitab Sutji, 1981 JABUR 78 Bible Online

JABUR 78 - Kitab Sutji, 1981 bible

JABUR 78

¹Kidung piwulang anggitane Asaf. Dhuh bangsaku, piwulangku padha rungokna, pamicarane cangkemku padha tilingna.

²Aku arep mbukak cangkemku prelu medharake bebasan, aku arep ngucapake cangkriman jaman kuna,

³Apa kang wus padha kita rungu, sarta kita sumurupi, lan kang dicritakake dening para leluhur kita marang kita,

⁴ora bakal daksidhem tumrap anak-putune; nanging kita bakal nyaritakake marang para turun ing tembe pepujian marang Pangeran Yehuwah lan kasantosane, sarta kaelokan-kaelokan kang wus katindakake.

⁵Pangeran wus ndhawuhake pepenget marang trahe Rama Yakub, lan angger-anggering Toret marang Banisrael; para leluhur kita padha kadhawuhan ngluntakake iku marang para anak putune,

⁶supaya disumurupana dening para turune ing sapungkure, supaya anak-putu kang ing tembe bakal padha lair, padha gumregah lan nyaritakake marang anak-anake,

⁷supaya padha kumandela marang Gusti Allah, lan aja lali marang sakabehing pakaryane, nanging padha netepana dhawuh-dhawuhe;

⁸apadene aja padha kaya para leluhure, kang padha wangkot lan mbalela, jenis kang ora antepan tuwin kang nyawane ora setya marang Gusti Allah.

⁹Bani Efraim, prajurit panahan kang sikep gegaman ganep, padha mundur nalika dinane perang.

¹⁰Padha ora nggondheli prasetyaning Allah sarta padha emoh lumaku manut ing Torete.

¹¹Padha lali marang pakaryane lan kaelokan kang katindakake, kang wus dikatingalake marang dheweke kabeh.

¹²Gusti Allah wus nindakake kaelokan-kaelokan ana ing ngarepe para leluhure, ana ing tanah Mesir, ana ing ara-ara Zoan;

¹³segara dipiyak, para leluhur padha disabrangake; banyune diadegake kaya bendungan,

¹⁴ing wayah awan lakune para umat dituntun kalawan mega, ing wayah bengi kalawan padhanging geni.

¹⁵Gunung parang ing ara-ara samun dibengkah, para leluhur mau tumuli padha diparingi banyu akeh kaya saka ing samodra agung;

¹⁶saka ing parang Gusti Allah mijilake kali, grojoging banyune kaya bengawan.

¹⁷Ewadene para leluhur mau ndlarung anggone gawe dosa marang Panjenengane, yaiku anggone mbalela marang Kang Mahaluhur ana ing pasamunan.

¹⁸Malah padha nyoba marang Gusti Allah ing sajroning atine yaiku anggone nyuwun pangan kanggo nguja hawa-napsune.

¹⁹Padha rasanan bab Gusti Allah mangkene: “Allah apa iya kuwasa nyedhiyani pangan ana ing ara-ara samun?

²⁰Pancen Panjenengane nggebag parang satemah metu banyune lan banjur ana kali-kali kang mili; nanging apa iya kuwaos paring roti, utawa nyawisi daging para umate?”

²¹Iku kapiyarsa dening Pangeran Yehuwah, njalari dukane, temahan ana geni kang mubal nempuh bani Yakub, sarta bebendune nempuh Banisrael,

²²awit padha ora pracaya marang Gusti Allah, sarta ora padha kumandel marang pitulungane.

²³Gusti Allah tumuli dhawuh marang mega-mega ing dhuwur, lan mbikak lawang-lawanging langit,

²⁴umate diudani mana minangka pangane, sarta padha diparingi gandum saka ing langit;

²⁵saben wong wus mangan roti malaekat; padha dikirimi sangu pangan nganti turah-turah.

²⁶Pangeran ngididake angin wetan ana ing awang-awang lan nggiring angin kidul kalawan kakiyatane;

²⁷umate banjur diudani daging kehe kaya bledug, tuwin diudani manuk kang mawa swiwi cacahe kaya wedhining segara;

²⁸padha katibakake ing satengahing tarub-tarube, ing sakubenging papan panggonane mau.

²⁹Tumuli padha mangan nganti wareg banget; Panjenengane maringi apa kang padha dikarepake.

³⁰Nalika isih padha rumangsa durung wareg, sarta pangane isih ana ing cangkeme;

³¹Gusti Allah banjur duka marang wong-wong iku, gembong-gembonge padha dipateni, lan para nonomane Israel padha disirnakake.

³²Sanadyan mangkono, para leluhur mau iya isih bae anggone padha nglakoni dosa, sarta ora pracaya marang sakehing pakaryane Allah kang ngedab-edabi.

³³Mulane dina-dinane kadamel sirna tanpa tanja, sarta taun-taune padha sirna sajroning pagiris.

³⁴Bareng padha dipateni banjur padha nakokake marang Panjenengane, padha mratobat sarta padha ngupaya marang Gusti Allah;

³⁵padha kelingan, yen Gusti Allah iku peparange, lan Gusti Allah Kang Mahaluhur iku dadi Juru Panebuse.

³⁶Nanging padha ngapusi Panjenengane kalawan cangkeme lan nggorohi Panjenengane kalawan ilate.

³⁷Atine ora mantep marang Panjenengane, lan ora setya marang ing prajanjiane.

³⁸Tujune Panjenengane iku asipat welasan, karsa ngapura kaluputane lan ora numpes umate; malah kerep ngampah bebendune, sarta ora nggigah dedukane kabeh.

³⁹Panjenengane karsa ngengeti manawa wong iku kabeh daging, angin kang midid, kang ora bakal bali.

⁴⁰Ping pira bae para leluhur mau anggone padha mbalela marang Panjenengane ana ing ara-ara samun, lan anggone padha gawe sekeling galihe ana ing pasamunan!

⁴¹Bola-bali anggone padha nyoba marang Gusti Allah, sarta anggone padha gawe gerahe panggalihing Allah Israel Kang Mahasuci.

⁴²Padha ora eling marang pagwaose, sarta marang dina nalika padha diluwari saka ing tanganing mungsuh,

⁴³nalika Panjenengane nganakake pratandha-pratandha ana ing tanah Mesir, sarta mukjijat-mukjijat ana ing ara-ara Zoan.

⁴⁴Kali-kaline lan ilen-ilene padha disabdakake dadi getih, temahan banyune ora kena diombe;

⁴⁵ndhatengake laler cathak kang mangsa wong-wong mau, lan kodhok-kodhok kang nyirnakake wong-wong mau.

⁴⁶Tanem tuwuhe wong Mesir dipakakake marang ama uler, tuwin wohing rekasane marang walang.

⁴⁷Wite anggur padha disirnakake sarana udan watu, sarta wite sikmah sarana ebun njendhel.

⁴⁸Pepanthaning kewane padha dipasrahake marang udan es, lan rajakayane disamber ing bledheg.

⁴⁹Padha didhawahi mulad-mulading bebendune, bramantya, deduka sarta karupekan, apadene malaekat sabregada kang nggawa bilai;

⁵⁰Panjenengane ngumbar mulad-mulading bebendune, nyawane padha ora diluwari saka ing pati, nyawane padha diulungake marang pageblug;

⁵¹sakehing anake pembarep wong Mesir padha dipateni, wohing kakuwatane kang kawitan ana ing tarub-tarube Kham;

⁵²para umat kagungane tumuli padha didhawuhi mangkat kaya wedhus, padha dituntun kaya pepanthan kewan ana ing ara-ara samun;

⁵³padha dituntun kalawan tentrem, temah ora padha kuwatir, amarga satrune wus padha keblabak ana ing segara;

⁵⁴padha diirid menyang ing tanah suci kagunganing Allah, yaiku ing pagunungan iki, kang pinundhut ing astane kang tengen;

⁵⁵para bangsa padha ditundhung saka ing ngarepane umat, tanah pusaka iku diedum-edum nganggo tali ukuran, sarta sakehing talere Israel padha didhawuhi ngenggoni tarub-tarube.

⁵⁶Nanging Banisrael padha nyoba lan mbalela marang Gusti Allah kang Mahaluhur, sarta ora padha netepi marang pepenget-pepengete;

⁵⁷padha murtad lan ora setya kaya para leluhure; padha nyimpang kaya gandhewa kang cidra;

⁵⁸padha gawe gerahing penggalihe Gusti Allah sarana tengger-tengger papang pangurbanane, sarta ndadekake bentering penggalihe marga saka reca-recane.

⁵⁹Bareng kapiyarsa dening Gusti Allah, temah Panjenengane banjur duka banget, Israel ditampik babar pisan;

⁶⁰mulane nilar padalemane ing Silo, tarub kang wus didalemi ana ing antarane manungsa;

⁶¹kasantosane nuli diulungake dadi bandhangan, kamulyane dipasrahake marang ing tanganing mungsuh;

⁶²Panjenengane marengake bae umate kamangsa ing pedhang, sarta bendu marang kagungane piyambak.

⁶³Para wong non-nomane padha kamangsa ing geni, lan para prawane padha ora dialembana maneh kalawan kekidungan palakrama;

⁶⁴para imam padha mati dening pedhang, lan randhane ora padha bisa nangisi.

⁶⁵Ing kono Pangeran tumuli wungu, kaya wong kang keturon, kaya prawira kang wus eling saka anggone mendem anggur;

⁶⁶mungsuh-mungsuhe padha digebag temah padha mundur, padha kadamel nandhang wirang ing salawase.

⁶⁷Panjenengane nampik tarube Yusuf, taler Efraim ora kapilih,

⁶⁸nanging kang dipilih taler Yahuda, Gunung Sion kang kinasihan;

⁶⁹pasucene banjur dibangun nganti sundhul langit, kaya bumi kang tinalesan langgeng;

⁷⁰Panjenengane milih Dawud, abdine, kapundhut saka ing satengahe kandhang-kandhang wedhus;

⁷¹kapundhut saka ing panggonane wedhus-wedhus kang padha nusoni, kapatah ngengon trahe Yakub, umate, iya Banisrael kagungane piyambak.

⁷²Tumuli iya padha diengon kalawan tulusing galih, sarta padha katuntun kanthi kaprigelaning astane. [77†] [78†] [79†] [80†] [81†] [82†] [83†] [84†] [85†] [86†] [87†] [88†] [89†] [90†] [91†] [92†] [93†] [94†] [95†] [96†] [97†]