Read Kitab Sutji, 1981 JABUR 81 Bible Online

JABUR 81 - Kitab Sutji, 1981 bible

JABUR 81

¹Kanggo lurah pasindhen. Miturut lagu: Gitit. Anggitane Asaf.

²Padha surak-suraka kagem Gusti Allah, kang dadi kasantosan kita, padha surak-suraka kagem Gusti Allahe Rama Yakub.

³Padha ngidunga karo trebangan lan clempungan, kang laras binarung swaraning slukat.

⁴Ngunekna kalasangka ing tanggal sapisan, ing tanggal purnama ing dina riyaya kita.

⁵Amarga bab iku dadi pranatan tumrap bangsa Israel, sarta dadi angger-angger saka Gusti Allahe Rama Yakub.

⁶Kang pinacak dadi pepakon marang Rama Yusuf, nalika Gusti Allah miyos nglurugi tanah Mesir. Aku krungu bangsa kang aku durung tau weruh.

⁷“Pundhake wus Sunuwalake saka anggone memikul, sarta tangane saka ing kranjanging pikulan;

⁸sajroning karubedan sira padha sesambat, Ingsun banjur ngentasake sira, Ingsun nyembadani panyuwunira saka ing pasingidaning gludhug, Ingsun wus nyoba marang sira ana ing sacedhake banyu Meriba. (Selah)

⁹He para umatingSun padha ngrungokna, Ingsun arsa paring pepenget marang sira; he Israel, manawa sira gelem ngrungokake marang dhawuhingSun.

¹⁰Ing tengahira aja ana allah liyane, sira aja sujud marang allah ngamanca.

¹¹Iya Ingsun iki Yehuwah Allahira, kang ngluwari sira saka ing tanah Mesir, cangkemira angapna kang amba, nuli bakal Sunkebaki.

¹²Nanging umatingSun ora ngrungokake marang swaraningSun, sarta Israel ora seneng marang Ingsun.

¹³Mulane banjur Suntogake atine kang wangkot iku, cikben padha nglakoni sakarepe dhewe.

¹⁴Ah, saupama umatingSun ngrungokake marang dhawuhingSun, saupama Israel ngambah ing dalan pitedahingSun.

¹⁵Sanalika iku uga mungsuhe mesthi Suntelukake, sarta mungsuhe padha ngrasakake antebing astaningSun.

¹⁶Para wong kang sengit marang Pangeran Yehuwah, bakal nyembah ndilat sampeyane, lan iki wis dadi nasibe ing salawas-lawase.

¹⁷Nanging umatingSun bakal Sunparingi mangan gandum kang becik dhewe malah bakal padha Sunwaregi kalawan madu saka ing parang.” [100†] [101†] [102†]