Read Kitab Sutji, 1981 JABUR 91 Bible Online

JABUR 91 - Kitab Sutji, 1981 bible

JABUR 91

¹Wong kang dumunung ana ing pangaubane Kang Mahaluhur lan nginep ing pangayomane Kang Mahakuwasa,

²iku bakal nyebut marang Yehuwah mangkene: “Pangungsen saha beteng kawula, Gusti Allah kawula ingkang kawula andelaken.”

³Sanyata Panjenengane iku kang bakal nguwalake kowe saka ing jirete juru pikat, lan saka pageblug kang mbilaeni.

⁴kowe bakal dikemuli kalawan elare, bakal diayomi ing sangisoring siwiwine, kasetyane iku minangka tameng lan pager tembok.

⁵Kowe ora usah wedi marang pagiris ing wayah bengi, marang panah kang lumepes ing wayah awan,

⁶marang pageblug kang lumaku ana ing pepeteng, tuwin marang lelara pes kang ngamuk ing wayah sore.

⁷Sanadyan ing sandhingmu ana wong kang ambruk sewu, sarta sepuluh ewu ana ing tengenmu, ewadene kowe dhewe ora bakal ketaman;

⁸iku mung koksawang kalawan mripatmu dhewe bae, lan ndeleng piwales marang para wong duraka.

⁹Amarga Pangeran Yehuwah iku dadi pangayomanmu, Kang Mahaluhur iku wus kokdadekake pangaubanmu,

¹⁰Kowe ora bakal katempuh ing bilai, sarta ora ana wewelak kang nyedhaki tarubmu;

¹¹awit Pangeran bakal ndhawuhi para malaekate ing ngatase kowe, supaya rumeksa marang kowe ana ing sakehing dalanmu.

¹²Kowe bakal ditadhahi ing tangane, supaya kowe aja nganti kesandhung ing watu.

¹³Singa lan ula bedhudhak bakal padha koklangkahi, singa nom lan ula naga bakal kokidak-idak.

¹⁴“Sanyata, sarehne rumaket marang Ingsun, mulane bakal Sunluwari, bakal Sunpageri santosa awit wanuh marang asmaningSun.

¹⁵Yen sesambat marang Ingsun bakal Sunsembadani, ing sajroning karubedan bakal Sunkanthi, bakal Sunentasake lan Sunluhurake,

¹⁶bakal Sunwaregi kalawan umur dawa, lan karahayoningSun bakal Suntedahake marang dheweke.” [112†] [113†]