Read Kitab Sutji, 1981 WULANG BEBASAN 11 Bible Online

WULANG BEBASAN 11 - Kitab Sutji, 1981 bible

WULANG BEBASAN 11

¹Traju kang cidra iku kasengitan dening Sang Yehuwah, nanging watu timbangan kang trep ndadekake keparenge.

²Samangsa piangkuh teka, pamoyok uga nututi, nanging kawicaksanan dumunung ana ing wong kang lembah manah.

³Wong kang jujur iku katuntun dening katemenane, nanging wong cidra iku dirusak dening culikane.

⁴Samangsa bebendu teka, kasugihan ora migunani, nanging kabeneran ngluwari saka ing pati.

⁵Dalane wong mursid dirata dening kabenerane, nanging wong duraka tiba marga saka durakane.

⁶Wong kang jujur kapitulungan dening kabenerane, nanging wong cidra iku kejiret dening hawa-nepsune.

⁷Pangarep-arepe wong duraka gagal nalika dina patine, nanging pangajape wong ala bakal tanpa guna.

⁸Wong bener kaentasake saka ing karubedan, wong duraka kang banjur nggenteni.

⁹Wong duraka ngrusak pepadhane srana cangkeme, nanging wong bener kapitulungan dening kawruhe.

¹⁰Kabegjane wong mursid, ndadekake kabungahane wong sakutha, lan samangsa wong duraka tumpes, wong padha rame surak-surak.

¹¹Berkahe wong jujur ndadekake mekaring kutha, nanging cangkeme wong duraka njalari gempure.

¹²Sing sapa ngremehake pepadhane iku tanpa budi, nanging wong kang pinter iku meneng bae.

¹³Sing sapa nenacad, iku ngeler wewadi, nanging wong setya nutupi prakara.

¹⁴Yen tanpa pemimpin, bangsa ambruk, nanging manawa juru pirembug akeh banjur ana katentreman.

¹⁵Sing sapa nanggung wong liya kang durung diwanuhi, iku bakal sangsara banget, nanging wong kang sengit marang tanggung jawab, iku slamet.

¹⁶Wong wadon kang becik atine bakal kajen, dene wong kang nindhes iku oleh kasugihan.

¹⁷Wong kang ambek darma mbeciki awake dhewe, nanging kang ambek siya iku niksa awake dhewe.

¹⁸Wong duraka oleh bebathen kang muspra, nanging sing sapa nyebar kabeneran oleh ganjaran kang tetep.

¹⁹Sing sapa nggondheli kabeneran kang sejati iku ngener marang urip, nanging sapa kang mburu piala iku marani pati.

²⁰Wong kang atine culika, iku nistha ana ing ngarsane Pangeran Yehuwah, nanging para wong kang tanpa cacad, ndadekake keparenge.

²¹Sanyata, wong ala mesthi tampa ukuman, nanging turune wong bener bakal kapitulungan.

²²Kayadene anting-anting emas ana ing congoring babi, iya kaya mangkono iku wong wadon ayu kang ora susila.

²³Pangarep-arepe wong bener nekakake kabegjan, nanging pangarep-arepe wong duraka nekakake bebendu.

²⁴Ana kang ngawut-awut bandhane, nanging saya sugih, lan ana kang kumet banget, ewasamono tansah kekurangan.

²⁵Sing sapa kerep andum berkah, bakal nampani kaluberan, sing sapa aweh ngombe, bakal diwenehi ngombe.

²⁶Sing sapa ndhelikake gandum, mesthi diunek-unekake ing wong nanging wong kang nempurake gandum, sirahe bakal katekan berkah.

²⁷Sing sapa ngupaya kabecikan, iku ngudi supaya disenengi ing wong, nanging kang ngarah marang piala, bakal ketaman ing piala.

²⁸Sing sapa ngandelake marang kasugihane bakal ambruk, nanging wong bener bakal semi kaya godhong enom.

²⁹Sing sapa ngisruhake brayate, bakal oleh angin, wong bodho bakal dadi bature wong wicaksana.

³⁰Pituwase wong bener iku wit panguripan, sarta sapa kang wicaksana iku bisa narik atine wong.

³¹Manawa wong bener oleh piwales ana ing donya, mendahane maneh wong duraka lan wong dosa!