Read Kitab Sutji, 1981 WULANG BEBASAN 13 Bible Online

WULANG BEBASAN 13 - Kitab Sutji, 1981 bible

WULANG BEBASAN 13

¹Anak kang wicaksana ngrungokake marang pamerdine bapakne nanging wong ambek memoyok ora ngrewes marang pameleh.

²Wong iku mesthi mangan kang becik saka tembunge, nanging karepe wong cidra iku awujud tindak panganiaya.

³Wong kang njaga cangkeme, iku ngreksa nyawane, sapa kang crawak, iku bakal katempuh ing karusakan.

⁴Atine wong kesed iku kebak pepenginan, nanging tanpa guna, balik atine wong sregep iku kaparingan kaluberan.

⁵Wong kang bener iku sengit marang goroh, nanging wong duraka iku gawe wirang lan gawe alane awake dhewe.

⁶Wong kang lakune saleh iku kareksa dening kabenerane, nanging kang gawe dosa digawe sangsara dening durakane.

⁷Ana wong kang sumugih-sugih, nanging ora duwe apa-apa, ana uga kang ethok-ethok miskin, mangka bandhane akeh.

⁸Kasugihan iku kanggo nebus nyawane wong, nanging wong miskin ora bakal krungu pangancam.

⁹Pepadhange wong bener iku sumorot gumebyar, nanging damare wong duraka bakal mati.

¹⁰Ambek kumingsun iku mung marakake grejegan, nanging wong kang ngrungokake pitutur kadunungan kawicaksanan.

¹¹Bandha kang gampang olehe, mesthi bakal suda, nanging wong kang tlaten nglumpukake saka sathithik, bakal dadi sugih.

¹²Pangarep-arep kang kasumenekake, gawe sedhihing ati, nanging pepenginan kang katutugan iku wit panguripan.

¹³Sing sapa ngremehake pangandika, iku bakal nanggung akibate, nanging sapa kang manut marang prentah, iku bakal tampa piwales.

¹⁴Piwulange wong wicaksana iku sumbering urip, ndadekake wong ora kena ing kalaning pati.

¹⁵Budi kang utama ngolehake sih, nanging dalane wong cidra iku ndadekake cilakaning wong iku.

¹⁶Wong kang prayitna tumindak kanthi kawasisan, nanging wong bodho ngetokake bodhone.

¹⁷Utusan kang duraka iku njalari cilaka, nanging duta kang setya nekakake kuwarasan.

¹⁸Kamlaratan lan pamoyok iku bakal nempuh marang wong kang nglirwakake marang pamerdi, nanging sing sapa nampani pameleh iku kajen.

¹⁹Pepenginan kang katutugan iku nyenengake ati, nanging wong gemblung ora gelem ninggal piala.

²⁰Sapa kang srawungan karo wong wicaksana, dadi wicaksana, nanging sapa kang kekancan karo wong gemblung iku nemu sangsara.

²¹Wong dosa diburu ing bilai, nanging wong bener iku diwales kabegjan dening Panjenengane.

²²Wong becik ninggali warisan marang anak-putune, nanging barang darbeke wong dosa iku dicadhangake kanggo wong bener.

²³Tegale wong miskin metokake pangan akeh, nanging ana kang ilang marga ora ana kaadilan.

²⁴Sapa kang ora migunakake gitik, iku sengit marang anake, mangka kang asih marang anake iku aweh pamerdi ing kalamangsane.

²⁵Wong bener mangan nganti wareg, nanging wetenge wong duraka ngrasakake kekurangan.