Read Kitab Sutji, 1981 WULANG BEBASAN 18 Bible Online

WULANG BEBASAN 18 - Kitab Sutji, 1981 bible

WULANG BEBASAN 18

¹Wong kang ndhewe, iku ngupaya pepenginane, saben panimbang njalari nepsune.

²Wong gemblung iku ora seneng marang pangreten, mung dhemen njereng isining atine.

³Samangsa duraka iku teka, tindak ngremehake uga teka ngetutake, sarta cacad iku dibarengi pamoyok.

⁴Tembunging cangkeme wong iku kaya banyu kang jero, nanging sumber kawicaksanan, iku kaya kali kang mili.

⁵Ora becik ngeloni wong duraka, kalawan nampik wong bener ana ing pangadilan.

⁶Lambene wong gemblung njalari pasulayan, sarta cangkeme bengak-bengok njaluk digitiki.

⁷Wong gemblung nemahi karusakan marga saka cangkeme, sarta lambene dadi kala tumrap nyawane.

⁸Tembunge wong mitenah iku kaya panganan kang enak-enak, kang lumebu ing sajroning ati.

⁹Wong kang kesed sajroning nindakake pagaweane, iku wus dadi sadulure juru pangrusak.

¹⁰Asmane Pangeran Yehuwah iku menara kang santosa, wong bener padha ngungsi mrono temah slamet.

¹¹Tumrape wong sugih kutha kang santosa iku raja-darbeke, dirasa kaya balowarti kang dhuwur.

¹²Lumuhur-luhur pepucuking karusakan, nanging andhap-asor iku margane kajen.

¹³Manawa wong mangsuli sadurunge ngrungokake, iku bodho sarta cacad.

¹⁴Kencenging ati marakake tahan nandhang sangsara, nanging sapa kang bisa mulihake semplahing ati?

¹⁵Atine wong pinter ngolehake kawasisan, lan kupinge wong wicaksana ngupaya kapinteran.

¹⁶Ganjaran ngomberake dalane wong, lan nglantarake marang ing ngarsane para wong luhur.

¹⁷Kang guneman dhisik ing sajrone para padu, kaya-kaya iku kang bener, nanging bareng ana wong liya kang teka, prakarane banjur dititipriksa.

¹⁸Tibane undhi mungkasi pepadon, sarta ngrampungake prakara ing antarane wong-wong kang nduweni pangwasa.

¹⁹Sadulur kang diserikake atine, luwih angel dicedhaki katimbang karo nyedhaki kutha kang santosa, lan crah iku kayadene slaraking gapurane beteng.

²⁰Wetenge wong iku diwaregi klawan asile cangkeme, lan diwaregi dening pametune lambene.

²¹Pati lan urip padha kawengku ing ilat, sapa kang seneng mratak-mratakake, iku mesthi mangan wohe.

²²Sapa kang oleh jodho iku nemu bab kang becik, sarta oleh sihe Sang Yehuwah.

²³Wong miskin memelas celathune, nanging wong sugih songol wangsulane.

²⁴Ana kanca kang marakake sangsara, nanging uga ana mitra kang rumakete ngungkuli sadulur.