Read Kitab Sutji, 1981 WULANG BEBASAN 19 Bible Online

WULANG BEBASAN 19 - Kitab Sutji, 1981 bible

WULANG BEBASAN 19

¹Luwih becik wong miskin kang kelakuane resik, tinimbang karo wong cidra lambene lan gemblung.

²Tanpa kawruh kasregepan uga ora maedahi, sarta kang kesusu iku bakal kleru jangkahe.

³Kabodhoane wong nasarake lakune, nuli ngundhamana marang Pangeran Yehuwah.

⁴Kasugihan ngolehake mitra akeh, nanging wong mlarat, ditinggal mitrane.

⁵Seksi goroh mesthi bakal nampani paukuman, sarta wong kang ngucapake cidra ora bakal oncat saka ing paukuman.

⁶Akeh wong kang nyanak marang wong kang luber atine, lan saben wong kepengin dadi mitrane wong kang dhemen weweh.

⁷Wong miskin iku kasengitan dening sadulure kabeh, apa maneh mitrane, mesthi padha ngedohi, dioyak klawan diceluki, ewasamono wus padha ora katon.

⁸Sing sapa kadunungan akal-budi, iku nresnani awake dhewe, kang migunakake kapinteran, bakal nemu begja.

⁹Seksi goroh mesthi bakal nampani paukuman, sarta kang ngucapake cidra bakal sirna.

¹⁰Wong gemblung ora patut oleh kamukten, apamaneh abdi manawa pantesa ngereh para panggedhe.

¹¹Kapinteran njalari wong sabar banget, sarta kaalembana marga anggone ngapura panerak.

¹²Dukaning ratu iku kaya panggerone singa anom, nanging kabecikane iku kaya ebun kang tumiba ing pasuketan.

¹³Anak kang gemblung iku dadi cilakane bapakne, padune wong wadon iku kaya trocohing payon kang tanpa kendhat.

¹⁴Omah lan bandha iku warisan saka leluhur, nanging rabi kang pinter iku peparinge Sang Yehuwah.

¹⁵Kesed iku marakake turu kepati, nanging wong wegahan bakal nandhang keluwen.

¹⁶Wong kang netepi pepakon, iku rumeksa marang nyawane, nanging kang ngremehake pangandika, bakal mati.

¹⁷Sing sapa melasi marang wong kang ringkih, iku motangake marang Pangeran Yehuwah, Panjenengane kang bakal males panggawene iku.

¹⁸Anakmu rangketen salawase isih ana pangarep-arep, nanging aja nganti ndadekake patine.

¹⁹Wong kang enggal banget nepsune, bakal kena dhendha, sabab saupama kowe nyoba arep nulungi, malah mundhak nepsune.

²⁰Nilingna pitutur lan nampanana pamerdi, supaya kowe ing tembe bisa dadi wicaksana.

²¹Atine wong ngrancang-ngrancang prakara akeh, nanging putusane Sang Yehuwah iku kang bakal kelakon.

²²Wewatekan kang dikepengini tumraping wong iku kasetyan, luwih becik wong miskin tinimbang karo wong kang ngapusi.

²³Wedi-asih marang Pangeran Yehuwah ngolehake urip, wong banjur bakal nginep klawan seneng ora bakal katempuh ing bilai.

²⁴Wong kesed nyelupake tangane ing pinggan, nanging ora bakal bisa ngemplok.

²⁵Yen wong ambek memoyok kokgitik, wong kang tanpa pengalaman bakal dadi wicaksana, yen wong mawa budi kokwelehake, bakal ngrumangsani.

²⁶Anak kang nganiaya bapakne utawa nundhung biyunge, iku ngalakake lan mirangake awake dhewe.

²⁷He anakku, aja ngrungokake pamerdi maneh, manawa kowe jebul iya nyimpang saka ing pitutur kang aweh kawruh.

²⁸Seksi kang ora ana gunane iku ngremehake angger-angger, lan cangkeme wong duraka nguntal para cidra.

²⁹Wong memoyok kacawisan paukuman, lan gegere wong gemblung dicepaki gitik.