Read Kitab Sutji, 1981 WULANG BEBASAN 2 Bible Online

WULANG BEBASAN 2 - Kitab Sutji, 1981 bible

WULANG BEBASAN 2

¹He anakku, manawa kowe nampani tembung-tembungku, lan nyimpen prentahku ana ing sajroning atimu,

²temah kupingmu nggatekake marang kawicaksanan, sarta atimu kokadhepake marang kapinteran,

³lan manawa kowe njaluk tulung marang pangreten, lan ngenerake swaramu marang kapinteran,

⁴manawa iku kokupaya kaya golek salaka, lan pangoyakmu kaya mburu rajabrana kapendhem,

⁵kowe tumuli bakal nemu pangreten bab wedi-asih marang Pangeran Yehuwah lan oleh kawruh bab Gusti Allah.

⁶Awitdene Sang Yehuwah kang paring kawicaksanan, saka ing lesane miyos kawruh lan kapinteran.

⁷Panjenengane nyawisi pitulungan marang wong kang jujur, -- Panjenengane iku dadi tetamenge para wong kang lakune tanpa cacad --

⁸kambi njagi lakuning kaadilan, lan ngreksa lakune para kagungane yaiku wong kang padha setya.

⁹Mangkono dadine kowe bakal ngreti bab kabeneran, kaadilan, lan kejujuran, malah sarupane dalan kang becik.

¹⁰Awitdene kawicaksanan bakal lumebu ing atimu sarta kawruh iku bakal nyenengake nyawamu;

¹¹kawicaksanan bakal ngopeni kowe, sarta kapinteran bakal rumeksa marang kowe,

¹²supaya kowe kaedohna saka ing dalan kang ala, saka wong kang nglairake apus krama;

¹³saka wong kang padha ngungkurake dalan kang lurus lan lumaku ing dalan kang peteng;

¹⁴kang seneng nindakake piala, sarta surak-surak marga saka kadursilane;

¹⁵kang menggak-menggok lakune lan kang keblinger tindak-tanduke;

¹⁶karomaneh supaya kowe uwal saka wanita tuna-susila, lan wong wadon liyane kang lunyu tembung-tembunge,

¹⁷kang ninggal bojone jaka-lara, sarta lali marang prasetyane Gusti Allah;

¹⁸lan omahe ilang ambles marang pati, sarta dalane anjog ing papaning arwah-arwah.

¹⁹Sapa kang marani wong iku, ora bisa bali, lan ora bisa tumeka ing dalaning urip.

²⁰Mulane lumakua ing dalane wong kang becik, nirua lakune wong mursid.

²¹Marga wong jujur kang bakal padha ngenggoni tanah, lan para wong kang tanpa cacad bakal padha tetep manggon ing kono,

²²nanging para wong duraka bakal padha kasirnakake saka ing tanah iku, sarta wong kang laku cidra bakal padha kabuwang saka ing kono.