Read Kitab Sutji, 1981 WULANG BEBASAN 29 Bible Online

WULANG BEBASAN 29 - Kitab Sutji, 1981 bible

WULANG BEBASAN 29

¹Wong kang ngakokake githok, sanadyan wus diwelehake, iku bakal diremuk dadakan lan ora bisa dipulihake maneh.

²Samangsa cacahe wong bener mundhak akeh, rakyat bungah, nanging manawa wong duraka nyekel pangwasa, rakyat sambat.

³Wong kang tresna marang kawicaksanan, iku ndadekake bungahe bapakne, nanging kang srawungan karo wong wadon tuna-susila iku ngebreh-ebreh bandhane.

⁴Sarana kaadilan ratu anggone nyantosakake nagarane, nanging kang kakehan anggone narik pajeg ndadekake ambruke.

⁵Sing sapa ngonggrong-onggrong pepadhane, iku masang jiret ana ing ngarepe sikile.

⁶Wong kang ala kejiret dening panerake dhewe, nanging wong bener iku bakal bungah-bungah lan sukarena.

⁷Wong bener nyumurupi wewenange wong sekeng, nanging wong duraka padha ora ngreti.

⁸Wong ambek memoyok ngisruhake kutha, nanging wong wicaksana padha ngendhakake nepsu.

⁹Wong wicaksana manawa prakaran karo wong bodho, wong bodho mau ngamuk lan gumuyu, temah rame.

¹⁰Wong kang ngorong marang wutahing getih, padha sengit marang wong saleh, nanging wong jujur padha ngupaya kaslametane.

¹¹Wong gemblung nguja sakehe kanepsone, nanging wekasane wong wicaksana kang ngendhakake.

¹²Manawa wong kang mrentah ngrungokake tembung doracara, para punggawane padha dadi wong duraka.

¹³Wong miskin lan wong kang nindhes padha pethukan, sakaro-karone padha kapadhangake mripate dening Sang Yehuwah.

¹⁴Ratu kang ngadili wong sekeng klawan adil, iku dhampare lestari kukuh ing salawas-lawase.

¹⁵Gebug lan pameleh ngolehake kawicaksanan, nanging anak kang ditogake bae iku gawe wirange biyunge.

¹⁶Yen cacahe wong duraka mundhak, panerak iya saya akeh, nanging para wong bener bakal padha nyipati ambruke.

¹⁷Anakmu gulawenthahen, temah bakal ndadekake ayeming atimu, malah aweh kabungahan marang nyawamu.

¹⁸Manawa ora ana wangsit, rakyat dadi urakan, rahayu wong kang netepi angger-angger.

¹⁹Rewang ora bisa diperdi mung klawan tembung thok, marga sanadyana ngreti, nanging ora nindakake.

²⁰Kowe weruh wong kang gumampang ngetokake tetembungan; wong gemblung pangarep-arepe luwih akeh katimbang wong iku.

²¹Sing sapa nguja rewange wiwit enom, wekasane malah ndadekake rewang mau kaduk-wani.

²²Wong kang gampang nepsu nukulake tukar-padu, sarta wong brangasan akeh panerake.

²³Watek angkuh njalari asoring awak, nanging kang andhap-asor iku oleh pangalem.

²⁴Sing sapa nampani panduman saka maling, iku sengit marang awake. Wus krungu tumibaning ipat-ipat, nanging ora disumurupi.

²⁵Wedi marang wong, iku nggawa kala jiret, nanging sing sapa kumandel marang Pangeran Yehuwah iku kaayoman.

²⁶Akeh wong kang golek sih marang kang nyekel pangwasa, nanging kaadilan iku Sang Yehuwah.

²⁷Wong bodho iku nistha tumrap wong bener, lan kang jujur lakune iku jember tumrap wong duraka. [20†] [21†] [22†]