Read Kitab Sutji, 1981 WULANG BEBASAN 3 Bible Online

WULANG BEBASAN 3 - Kitab Sutji, 1981 bible

WULANG BEBASAN 3

¹He anakku, aja lali marang piwulangku, sarta atimu ngopenana sakehing pepakonku,

²amarga umur dawa lan urip nganti tuwa, apadene katentreman bakal kawuwuhake marang kowe.

³Katresnan lan kasetyan muga aja nganti ninggal kowe, iku kalungna ing gulumu, catheten ana ing papaning atimu;

⁴temah kowe bakal oleh sih lan dadi kajen ana ing ngarsane Gusti Allah lan ana ing ngarepe manungsa.

⁵Kumandela marang Pangeran Yehuwah klawan gumolonging atimu, lan aja sumendhe marang pangretenmu dhewe.

⁶Ing salaku-lakumu ngakonana Panjenengane, temah Panjenengane bakal nglencengake dalanmu.

⁷Aja rumangsa pinter dhewe, wedi lan asiha marang Sang Yehuwah lan ngedohana piala,

⁸iku kang bakal marasake awakmu, sarta nyegerake balung-balungmu.

⁹Pangeran Yehuwah luhurna kalawan bandhamu lan srana kawitaning sakehe pametumu;

¹⁰temah lumbungmu bakal dikebaki nganti luber, lan pamipitanmu luber anggure.

¹¹He anakku, aja nampik marang pamerdine Sang Yehuwah, lan aja bosen marang pepengete,

¹²awitdene Pangeran Yehuwah iku matrapi sapa wong kang disihi, iya kaya bapa anggone matrapi marang anak kang ditresnani.

¹³Rahayu wong kang tampa kawicaksanan, wong kang oleh kapinteran,

¹⁴awitdene oleh-olehane kawicaksanan iku ngluwihi oleh-olehane salaka, lan pikolehe ngungkuli emas.

¹⁵Ajine ngluwihi raja-peni, apa bae kang kokkarepake ora bisa madhani.

¹⁶Tangane tengen nggegem umur dawa, kang kiwa nyekel kasugihan lan kaurmatan.

¹⁷Dalane iku kebak kabegjan, lan sakehe lurunge anane mung tentrem.

¹⁸Iku dadi wit panguripan tumrap wong kang padha nyekel sarta kang padha gondhelan iku kaaranan begja.

¹⁹Klawan kawicaksanan Sang Yehuwah anggone nalesi bumi, sarta anggone netepake langit kalawan pangreten,

²⁰marga saka kawasisane Gusti Allah, banyuning sagara dipencarake, lan mendhung netesake ebun.

²¹He anakku, panglimbang lan kawicaksanan aja nganti sumingkir saka ing ngarepmu, iku simpenen,

²²iku bakal dadi uripe nyawamu, lan minangka rerenggane gulumu.

²³Lakumu ana ing dalanmu bakal slamet, lan sikilmu ora bakal kesandhung.

²⁴Samangsa kowe turon, bakal ora kaget, nanging bisa leyeh-leyeh lan turu kepenak.

²⁵Aja wedi marang pagiris kang tekane dadakan, utawa marang karusakane wong duraka, samangsa nekani.

²⁶Awitdene Sang Yehuwah kang bakal dadi andel-andelmu, lan kang bakal rumeksa marang sikilmu supaya aja nganti kejiret. [4†] [5†] [6†] [7†] [8†]

²⁷Aja nggondheli kabecikan marang wong kang wenang nampani, mangka kowe bisa tumindak mangkono.

²⁸Kowe aja nyelathoni pepadhamu: “Lungaa, lan balia, sesuk bakal dakwenehi,” mangka nyatane kowe duwe apa kang dijaluk.

²⁹Aja ngrancang gawe piala marang pepadhamu, awit anggone tetunggalan karo kowe tanpa sanggarunggi.

³⁰Aja padu karo wong tanpa sabab; manawa ora nandukake piala marang kowe.

³¹Aja meri marang wong kang ambek siya, lan aja milih dalane, sanajan mung siji bae kang kokpilih;

³²awitdene wong kang laku nasar iku nistha tumrap Sang Yehuwah, nanging karo wong kang temen pasrawungane raket.

³³Omahe wong duraka iku kanggonan laknate Sang Yehuwah, nanging panggonane wong mursid diberkahi.

³⁴Para wong ambek memoyok iku dipoyoki dening Panjenengane, nanging para wong kang andhap asor iku dikasihi.

³⁵Wong wicaksana bakal oleh warisan kaurmatan, nanging wong punggung bakal tampa pamoyok. [9†]