Read Kitab Sutji, 1981 WULANG BEBASAN 5 Bible Online

WULANG BEBASAN 5 - Kitab Sutji, 1981 bible

WULANG BEBASAN 5

¹He anakku, nggatekna marang kawicaksananku, kupingmu tilingna marang kapinteran kang dakwulangake,

²supaya kowe gondhelan ing kawicaksanan, lan lambemu ngemota kawasisan.

³Awit lambene wong wadon tunasusila netesake madu, lan cethake lunyu ngungkuli lenga;

⁴nanging wekasane pait kaya rempelu, lan landhepe kaya pedhang kang mempan kiwa-tengen,

⁵tumapaking dlamakane mudhun menyang pati, jangkahe anjong marang jagading wong mati.

⁶Lakune ora metu ing dalaning urip, lakune nasar ora kanthi disumurupi.

⁷Awit saka iku, he bocah-bocah, padha ngrungokna tembung-tembungku, aja nyimpang saka pituture cangkemku.

⁸Lakumu ngedohana wong wadon mau, lan aja nyedhaki lawanging omahe,

⁹supaya kanomanmu aja kokpasrahake marang wong liya, lan umurmu marang kang ambek siya;

¹⁰supaya wong liya aja nganti maregi awake srana kasugihanmu, lan pituwasing kangelanmu aja nganti tumiba marang wong kang ora kokwanuhi,

¹¹lan ing wekasane kowe bakal sambat-sambat, yen daging lan awakmu padha rusak kabeh;

¹²sarta pangucapmu: “Yagene aku kok gething marang pamerdi, lan atiku kok nampik pameleh,

¹³yagene aku ora ngrungokake pituture para guruku, lan ora nilingake marang tembunge kang padha mulang aku?

¹⁴Meh bae aku kejlungup ing sawernaning bilai ana ing satengahing pasamuwan lan pakumpulan.”

¹⁵Kowe ngombea banyu ing kulahmu dhewe, ngombea saka ing sumurmu kang ngumbul.

¹⁶Apa pantes manawa sumbermu luber kaya kalen-kalen menyang ing ara-ara.

¹⁷Iku mung dadia duwekmu dhewe, aja nganti ana wong kang melu nduweni.

¹⁸Sendhangmu muga diberkahana, bungaha karo somahmu jaka-lara.

¹⁹Menjangan kang manis, kidang kang ayu muga susune iku tansah maremake kowe, muga katresnane iku kang ngenyutake kowe.

²⁰He anakku, yagene kowe nganti kepencut marang wong wadon tuna-susila, lan ngrangkul dhadhane wong wadon liya?

²¹Amarga Pangeran Yehuwah ora kasamaran marang sakehe tumindake wong, sarta mirsani sakehing pratingkahe manungsa.

²²Wong duraka ketangkep ing sajroning pialane, lan kejiret ing talining dosane dhewe.

²³Wong iku mati, marga ora oleh pamerdi, lan kesasar marga saka bangeting bodhone.