Read Kitab Sutji, 1981 WULANG BEBASAN 9 Bible Online

WULANG BEBASAN 9 - Kitab Sutji, 1981 bible

WULANG BEBASAN 9

¹Kawicaksanan wus yasa daleme, lan wus ngedegake sakane pitu,

²wus mragat kewane sembelehan, wus nyampur anggure, lan wus nyawisake pasugatane.

³Para abdine wadon wus padha didhawuhi nguwuh-uwuh ana ing papan kang dhuwur ing kutha, panguwuhe:

⁴“Sapa kang ora duwe pangalaman, padha mrenea,” lan para wong kang cupet ing budi, didhawuhi mangkene:

⁵“Mara padha mangana roti peparingSun, lan ngombea anggur kang wus Suncampur;

⁶ninggala kabodhoan, supaya padha urip, lan nuruta dalane pangreten.”

⁷Sing sapa mulang wong kang ambek memoyok, iku nekakake pamoyok marang awake dhewe, lan sing sapa melehake wong duraka, oleh panacad.

⁸Aja melehake wong ambek memoyok, supaya kowe ora disengiti, wong wicaksana iku welehna, kowe bakal ditresnani.

⁹Wong wicaksana pituturana, temah kawicaksanane mundhak, wong mursid wulangen, temah bakal mundhak kawruhe.

¹⁰Wedi-asih marang Pangeran Yehuwah iku wiwitaning kawicaksanan, lan wanuh marang Kang Mahasuci iku pangreten.

¹¹Marga saka Ingsun umurira kawuwuhan, lan taun-tauning uripira katambahan.

¹²Manawa sira wicaksana, kawicaksananira iku kanggo sira dhewe, sarta manawa sira ambek memoyok, iku sira dhewe kang bakal nanggung.

¹³Wong wadon bodho iku criwis, banget anggone ora duwe pangalaman lan ora duwe isin.

¹⁴Lungguh ana ing ngarepe lawange omahe, ana ing kursi ing papan-papan kang dhuwur ing kutha,

¹⁵lan wong kang padha lumaku liwat ing dalan, kang jujur lakune padha diundang, celathune:

¹⁶“Sapa kang ora duwe pangalaman, iku padha mrenea,” lan wong kang cupet budine iku dituturi:

¹⁷“Banyu colongan iku legi, lan roti kang dipangan kalawan ndhelik-ndhelik iku enak.”

¹⁸Mangka wong kang cupet ing budi mau ora sumurup yen ing kono dununge arwah-arwah lan wong-wong kang diampirake wong wadon mau ana ing jagade wong mati. [14†]