Read Kitab Sutji, 1981 MUSTHIKANING KIDUNG 1 Bible Online

MUSTHIKANING KIDUNG 1 - Kitab Sutji, 1981 bible

MUSTHIKANING KIDUNG 1

¹Musthikaning Kidung anggitane Sang Prabu Suleman. Aku muga ingarasana kalawan pangarasing lathine!

²Amargi katresnan Paduka punika nikmatipun nglangkungi anggur,

³lisah Paduka wangi gandanipun, asma Paduka kadya lisah ingesok, milanipun para kenya sami tresna dhumateng Paduka.

⁴Kawula mugi Paduka gendeng ing pengkeran Paduka, sumangga sami enggal-enggal tindak! Sang Prabu wus mbekta aku menyang ing jero kadhatone. Kawula sami badhe surak-surak lan sukarena margi saking Paduka, kawula sami badhe ngalembana sih Paduka ingkang ngungkuli anggur! Sampun samesthinipun sami tresna dhumateng Paduka!

⁵Dhuh para putri ing Yerusalem, pancen pakulitanku ireng, nanging manis, kadi kemahe bangsa Kedar, lir klambu-klambune wong Salma.

⁶Aja kokgatekake anggonku ireng, amarga sumeleting surya nggesengake aku. Putra-putrane ibuku padha muring-muring marang aku, aku didadekake panjaga pakebonan anggur, pakebonane anggurku dhewe ora dakopeni.

⁷Dhuh gantilaning nalaningwang, kawula mugi Paduka wartosi, wonten ing pundi anggen Paduka angen menda, wonten ing pundi anggen Paduka mlegungaken pepanthan Paduka ing wanci dalu? Awit punapaa dene kawula ngantos kados tiyang nglembara celak pepanthanipun menda mitra-mitra Paduka?

⁸Dhuh wanita kang sulistya dhewe ana ing satengahe para wanita, manawa kowe durung sumurup, ngetutna tapak-tapake wedhus lan angona cempe-cempemu ing sacedhaking pakemahane para pangon. [1†]

⁹-- Dhuh kekasihku, kowe sunupamakake jarane wadon kareta titihane Sang Prabu Pringon.

¹⁰Pipimu katon endah ingapit rerenggan, mangkono uga gulumu kang kinalungan.

¹¹Kowe arep dakyasakake rerenggan-rerenggan emas kalawan menuran selaka.

¹²-- Sasuwene Sang Prabu lenggah dhahar, naredku amrik gandane.

¹³Kekasihku iku tumraping aku kaya mur sabuntel, sumelip ing antarane payudaraku.

¹⁴Kekasihku iku tumraping aku kaya kembang pacar sadhompol, ing pakebonan anggur ing En-Gedhi.

¹⁵-- Lah memanisku, kowe iku sulistya, sanyata endah ing warna kowe iku, mripatira pindha manuk dara.

¹⁶-- Dhuh kekasih kawula, Paduka punika bagus, saestu nenarik manah, pasarean kita punika saestu sakeca.

¹⁷Griya kita punika balok-balokipun kajeng eres, gebyogipun kajeng eru.