Read Kitab Sutji, 1981 MUSTHIKANING KIDUNG 2 Bible Online

MUSTHIKANING KIDUNG 2 - Kitab Sutji, 1981 bible

MUSTHIKANING KIDUNG 2

¹-- Kawula punika sekar mawar saking Saron, sekar bakung ing lebak.

²-- Memanisku iku ana ing satengahe para kenya pindha kembang bakung ing satengahing eren.

³-- Kekasihku iku ana ing satengahe para nom-noman kaya wit apel ing satengahing wit-witan ing alas. Aku kepengin lungguh ana ing ayome, wohe legi tumrap ing cethakku.

⁴Aku kinanthi lumebu ing papan pahargyan lan tunggul kang ana ing dhuwurku iku tresna.

⁵Bok aku kinuwatna srana panganan kismis, sinegerna kalawan woh apel.

⁶Amarga aku nandhang lara asmara. Astane kiwa ana ing ngisoring sirahku, astane tengen ngrangkul aku.

⁷He, para putri ing Yerusalem, kowe padha sunsupatani, demi kidang-kidang utawa menjangan wadon ing ara-ara; kowe aja nggugah lan ngobahake katresnan, sadurunge dikarepake!

⁸Rungokna! Kekasihku! Sawangen rawuhe, mlumpat-mlumpat ing gunung-gunung, mencolot-mencolot ing tengger-tengger!

⁹Kekasihku iku kaya kidang, utawa anak menjangan. Delengen, panjenengane jumeneng ing saburining tembok kita, kambi ngungak-ungak liwat cendhela-cendhela lan nginjen ing ruji-ruji.

¹⁰Kekasihku wiwit ngandika marang aku: “Tangia, memanisku, mrenea, intenku!

¹¹Awitdene delengen, mangsa atis wis kliwat, udane wis terang, lan wis kepungkur.

¹²Ing pategalan wis katon kembang-kembang, wis mangsane methik; anggunge perkutut wis keprungu ana ing tanah kita.

¹³Wit anjir wiwit awoh, lan kembanging wit anggur ngambar gandane. Tangia, memanisku, mrenea, intenku!

¹⁴Manukku dara ana ing lowahan-lowahaning parang, ana ing pandhelikan ing ereng-erenging gunung, pamerna paraupanmu, wetokna suwaramu; amarga arum suwaramu, lan endah warnamu!”

¹⁵Aku padha cekelna asu wawar iku, asu wawar kang cilik, kang ngrusak pakebonan anggur, pakebonan anggurku kang nedhenge kembang!

¹⁶Kekasihku iku darbekku lan aku iki kagungane kang ngengen wedhus ana ing satengahing kembang bakung.

¹⁷Sadurunge angin sore midid lan ayang-ayang ilang dhuh kekasih kawula, Paduka mugi kersaa wangsul, saha karsaa tumindak kados kidang utawi kados anak sangsam ingkang wonten ing redi-redi taneman anggi-anggi!