Read Kitab Sutji, 1981 WILANGAN 2 Bible Online

WILANGAN 2 - Kitab Sutji, 1981 bible

WILANGAN 2

¹Pangeran Yehuwah ngandika marang Nabi Musa lan Rama Harun:

²“Wong Israel anggone lereb iku padha nyedhakana panji-panjine, mituruta tetengering suku-sukune. Anggone lereb iku anaa ing saubenge Tarub Pasewakan kapara adoh.

³Kang lereb ana ing sisih wetan, cedhak karo panji-panjine, iku bani Yehuda, miturut golongane; kang dadi pemimpine bani Yehuda: Nahason bin Aminadhab.

⁴Balane kang kacacahake iku ana pitung puluh papat ewu nem atus.

⁵Sandhinge iku kang makuwon taler Isakhar, pemimpine bani Isakhar yaiku: Netaneel bin Zuar.

⁶Balane kang kacacahake ana seket papat ewu patang atus.

⁷Tumuli taler Zebulon, pemimpine bani Zebulon yaiku: Eliab bin Helon.

⁸Balane kang kacacahake ana seket pitu ewu patang atus.

⁹Gunggunge bala kang kacacahake ana ing tarube Yehuda, miturut golongane ana satus wolung puluh nem ewu patang atus. Iku samangsa budhal anaa ing ngarep dhewe.

¹⁰Panji-panjine taler Ruben ana ing sisih kidul, miturut golongane, kang dadi pemimpine bani Ruben yaiku: Elizur bin Syedeur.

¹¹Balane kang kacacahake ana patang puluh nem ewu limang atus.

¹²Kang lereb ana ing sandhinge yaiku taler Simeon, kang dadi pemimpine bani Simeon yaiku: Selumiel bin Zurisyadai.

¹³Balane kang kacacahake ana seket sanga ewu telung atus.

¹⁴Nuli taler Gad; kang dadi pemimpine taler Gad yaiku: Elyasaf bin Rehuel.

¹⁵Balane kang kacacahake ana patang puluh lima ewu nem atus seket.

¹⁶Gunggunge kang kacacahake ana ing tarube Ruben, miturut golongane ana satus seket siji ewu patang atus seket. Iku budhale nomer loro.

¹⁷Sawuse iku banjur disambung Tarub Pasewakan karo balane bani Lewi ana ing tengah-tengahe bala liya-liyane. Kaya manawa mbeneri lereb, iya mangkono uga samangsa budhalan, siji-sijine ana ing panggonane dhewe-dhewe miturut panji-panjine.

¹⁸Kang ana ing sisih kulon iku panji-panjine taler Efraim, miturut golongane; kang dadi pemimpine bani Efraim yaiku: Elisama bin Amihud.

¹⁹Balane kang kacacahake ana patang puluh ewu limang atus.

²⁰Kang ana ing sandhinge taler Manasye, kang dadi pemimpine bani Manasye yaiku: Gamaliel bin Pedazur.

²¹Balane kang kacacahake iku ana telung puluh loro ewu rong atus.

²²Tumuli taler Benyamin, kang dadi pemimpine taler Benyamin yaiku Abidan bin Gideoni.

²³Balane kang kacacahake iku ana telung puluh lima ewu patang atus.

²⁴Gunggunge kang kacacahake ana ing tarube Efraim, miturut golongane ana satus wolu ewu satus. Iku budhale kang nomer telu.

²⁵Kang ana ing sisih lor panji-panjine taler Dhan, miturut golongane, kang dadi pemimpine bani Dhan yaiku: Ahiezer bin Amisyadai.

²⁶Balane kang kacacahake iku ana suwidak loro ewu pitung atus.

²⁷Kang lereb ing sacedhake iku taler Asyer, kang dadi pemimpine taler Asyer yaiku: Pagiel bin Okhran.

²⁸Balane kang kacacahake iku ana patang puluh siji ewu limang atus.

²⁹Banjur taler Naftali, kang dadi pemimpine taler Naftali yaiku: Ahira bin Enan.

³⁰Balane kang kacacahake iku ana seket telu ewu patang atus.

³¹Gunggunge kang kacacahake ana ing tarube Dhan ana satus seket pitu ewu nem atus. Iku budhale anaa ing buri dhewe, miturut panji-panjine.”

³²Samono mau gunggunge wong Israel kang padha kacacahake miturut taler-talere. Sakehe kang kacacahake ana ing tarub miturut golongane kabeh ana nem atus telu ewu limang atus seket.

³³Nanging wong Lewi ora kalebu kacacahake bareng karo wong Israel, kaya kang wus dadi dhawuhe Pangeran Yehuwah marang Nabi Musa.

³⁴Wong Israel padha nglakoni apa sadhawuhe Pangeran Yehuwah marang Nabi Musa; kaya mangkono anggone padha makuwon miturut panji-panjine, lan uga anggone padha budhalan, siji-sijine miturut gotrahe lan talere. edit 1: fajar 21 des'00