Read Kitab Sutji, 1981 WILANGAN 33 Bible Online

WILANGAN 33 - Kitab Sutji, 1981 bible

WILANGAN 33

¹Iki pratelane panggonan-panggonan kang diliwati wong Israel sawuse budhal saka ing tanah Mesir, sagolongan-sagolongan kairid dening Nabi Musa lan Imam Harun.

²Panggonan sing dilereni dipengeti dening Nabi Musa miturut dhawuhe Pangeran Yehuwah, iki pratelane panggonan-panggonan sing dilereni mau.

³Budhale saka Rameses ing sasi kapisan tanggale ping limalas salebare Paskah, wong Israel padha budhal marga dening asta kang kaulukake, ing sapandelenge wong Mesir kabeh,

⁴nalika samana wong Mesir lagi mbeneri padha ngubur sakehe pembarep kang padha dipateni dening Pangeran Yehuwah ana ing satengahe, marga Sang Yehuwah matrapi paukuman marang para allahe.

⁵Sawuse wong Israel budhal saka Rameses mau banjur leren ana ing Sukot.

⁶Nuli mangkat saka Sukot lan leren ana ing Etam, kang kaprenah sapinggire pasamunan.

⁷Budhal saka Etam tumuli bali menyang ing Pi-Hakhirot, kang kaprenah ana ing penere Baal-Zefon, sarta padha nginep ana ing sawetane Migdol.

⁸Banjur budhal saka Pi-Hakhirot, padha nyabrang lumaku ana ing tengahe segara ngener marang pasamunan, tumuli lumaku ing pasamunan Etam nganti telung dina, nuli padha leren ana ing Mara.

⁹Banjur budhal saka Mara lan tekan ing Elim; ing Elim kono ana sendhange rolas lan wit kurma pitung puluh; tumuli padha nginep ana ing kono.

¹⁰Saka Elim nuli leren ana ing pinggire sagara Teberau.

¹¹Budhal saka pinggire sagara Teberau, banjur nginep ana ing pasamunan Sin.

¹²Budhal saka pasamunan Sin, nginep ana ing Dofka.

¹³Budhal saka Dofka nuli leren ana ing Alus.

¹⁴Saka Alus banjur leren ana ing Rafidim, ana ing kono wong-wong padha ora oleh banyu kang diombe.

¹⁵Budhal saka Rafidim, tumuli leren ana ing pasamunan Sinai.

¹⁶Banjur mangkat saka pasamunan Sinai, lan nginep ana ing Kibrot-Taawa.

¹⁷Budhal saka Kibrot-Taawa banjur padha adeg tarub ana ing Hazerot.

¹⁸Budhal saka Hazerot lan leren ana ing Ritma.

¹⁹Budhal saka Ritma banjur nginep ana ing Rimon-Peres.

²⁰Nuli budhal saka Rimon-Peres lan leren ana ing Libna.

²¹Banjur budhal saka Libna lan leren ana ing Risa.

²²Tumuli mangkat saka Risa lan nginep ana ing Kehelata.

²³Banjur budhal saka Kehelata lan leren ana ing Har-Syafer.

²⁴Nuli budhal saka Har-Syafer lan adeg tarub ana ing Harada.

²⁵Tumuli budhal saka Harada lan nginep ana ing Makhelot.

²⁶Banjur mangkat saka Makhelot lan leren ana ing Tahat.

²⁷Tumuli budhal saka Tahat, lan adeg tarub ana ing Tarah.

²⁸Nuli mangkat saka Tarah lan nginep ana ing Mitka.

²⁹Banjur budhal saka Mitka lan leren ana ing Hasmona.

³⁰Tumuli budhal saka Hasmona lan leren ana ing Moserot.

³¹Nuli budhal saka Moserot lan adeg tarub ana ing Bene-Yaakan.

³²Banjur mangkat saka Bene-Yaakan lan nginep ana ing Hor-Gidgad.

³³Tumuli budhal saka Hor-Gidgad lan adeg tarub ana ing Yotbata.

³⁴Nuli mangkat saka Yotbata lan leren ana ing Abrona.

³⁵Banjur budhal saka Abrona lan nginep ana ing Ezion-Geber.

³⁶Tumuli mangkat saka Ezion-Geber lan adeg tarub ana ing pasamunan Zin, yaiku Kadesy.

³⁷Nuli budhal saka Kadesy lan nginep ana ing gunung Hor, ing tapel-watese tanah Edom.

³⁸Nalika iku Imam Harun minggah ing gunung Hor awit saka dhawuhe Pangeran Yehuwah, banjur seda ana ing kono, ing taun kaping patang puluh kaetung saka budhale wong Israel saka ing tanah Mesir, ing sasi kalima, ing tanggal sapisan.

³⁹Nalika seda ana ing gunung Hor iku yuswane Imam Harun satus telulikur taun.

⁴⁰Ing nalika iku raja ing Arad kang kalebu bangsa Kanaan, kang akedhaton ana ing tanah Negeb, mireng warta bab tekane wong Israel.

⁴¹Sawuse mangkono Banisrael banjur budhal saka ing gunung Hor, tumuli leren ana ing Zalmona.

⁴²Tumuli budhal saka Zalmona lan nginep ana ing Funon.

⁴³Banjur budhal saka Funon lan leren ana ing Obot.

⁴⁴Nuli mangkat saka Obot lan adeg tarub ana ing sacedhake jugrugan ing Abarim ing laladan tanah Moab.

⁴⁵Nuli budhal saka ing gempuran iku lan nginep ana ing Dibon-Gad.

⁴⁶Tumuli mangkat saka Dibon-Gad lan adeg tarub ana ing Almon-Diblataim.

⁴⁷Banjur budhal saka Almon-Diblataim lan leren ana ing pagunungan Abarim, ing sangarepe gunung Nebo.

⁴⁸Nuli mangkat saka pagunungan Abarim lan nginep ana ing tanah ngare ing Moab, ing sapinggire bengawan Yarden ing sacedhake Yerikho.

⁴⁹Anggone padha nginep ana ing sapinggire bengawan Yarden wiwit saka Bet-Yesimot tumeka ing Abel-Sitim ing tanah ngare ing Moab mau. [70†] [71†]

⁵⁰Nalika ana ing tanah ngare ing Moab ing sapinggire bengawan Yarden ing sacedhake Yerikho mau, Pangeran Yehuwah ngandika marang Nabi Musa:

⁵¹“Sira kandhaa marang wong Israel sarta tutura mangkene: Samangsa sira wus padha nyabrang ing bengawan Yarden sarta lumebu ing tanah Kanaan,

⁵²wong kang manggon ing kono nuli padha sira tundhungana kabeh saka ing ngarepira, lan sakehe watu ukir-ukirane padha sira sirnakna, karodene sakehe reca cithakan iya padha sira gempurana, dalah sakehe tengger pepundhene padha sira bubrahana.

⁵³Tanahe padha sira ejegana lan sira enggonana, awitdene sira kang padha Sunparingi tanah iku supaya dadi darbekira.

⁵⁴Anadene anggonira mbage-mbage tanah iku kang banjur dadi tanah pusakanira iku nganggoa kaundhi, miturut golonganira: golongan kang gedhe, iku kapandumana akeh, lan kang cilik iku pandumane iya sathithik, miturut undhiane; pangedume miturut talering para leluhurira.

⁵⁵Nanging manawa sira padha ora nundhungi wong bumi ing tanah iku saka ing ngarepira, masthi sapira panunggalane kang kari iku bakal padha dadi klilip ana ing mripatira, kaya eri kang nancep ing awakira, sarta bakal padha gawe susahira ana ing tanah kang sira enggoni iku.

⁵⁶Ingsun bakal nandukake marang sira, apa kang dadi rancanganingSun kang arep Suntandukake marang para bangsa iku.” [72†]