Read Kitab Sutji, 1981 WILANGAN 34 Bible Online

WILANGAN 34 - Kitab Sutji, 1981 bible

WILANGAN 34

¹Pangeran Yehuwah tumuli ngandika marang Nabi Musa:

²“Sira kandhaa marang wong Israel lan sira tutura mangkene: Samangsa sira padha lumebu ing tanah Kanaan, nuli kang masthi bakal dadi darbekira yaiku tanah Kanaan miturut wates-watese.

³Anadene watese tanahira kang sisih kidul iku wiwit saka ing pasamunan Zin ing saurute tanah Edom; dadi watese kang sisih kidul iku ing sisih wetan wiwit ing pungkasane Tlaga Pauyahan.

⁴Saka ing kono tapel-watese tanahira menggok ing sakidule unggah-unggahan ing Akrabim, terus tekan ing Zin, lan pantoge ana ing sakidule Kadesy-Barnea, banjur terus menyang ing Hazar-Adar, lan terus nganti tekan ing Azmon.

⁵Saka ing Azmon, watese nuli menggok menyang ing kali Mesir, lan terus nganti tekan ing sagara.

⁶Mungguh tapel-watese tanahira kang sisih kulon sagara gedhe dalah pasisire, yaiku kang dadi tapel-watesira kang sisih kulon.

⁷Dene tapel-watesira kang sisih lor iku: wiwit saka ing sagara gedhe mau watese kaenerna tekan ing gunung Hor,

⁸saka ing gunung Hor kaenerna tekan ing Hamat, lan terus nganti tekan ing Zedad.

⁹Tapel-wates mau banjur terus tekan ing Zifron, nganti notog ing Hazar-Enan; iku tapel-watesira kang sisih lor.

¹⁰Anadene tapel-watese kang sisih wetan iku kaenerna saka Hazar-Enan mau tekan ing Sefam.

¹¹Saka ing Sefam iku nuli mudhun menyang Ribla ing sawetane Ain; watese banjur terus mudhun maneh nganti tekan ing pinggiring Tlaga Kineret ing sisih wetan.

¹²Watese iku nuli mudhun maneh nganti tekan ing bengawan Yarden lan terus nganti tekan ing Tlaga Pauyahan. Yaiku nagaranira miturut tapel-watese mubeng.”

¹³Nabi Musa banjur dhawuh marang wong Israel: “Iku mau tanah kang bakal dadi duwekira srana kaundhi, kang kadhawuhake dening Pangeran Yehuwah supaya kaparingna marang taler kang sanga satengah iku.

¹⁴Marga golongane talere Ruben lan golonganing talere bani Gad wus padha tampa tanah pusaka, mangkono uga saparoning talere Manasye iya wus padha tampa panduman.

¹⁵Loro satengah taler iku wus padha tampa tanah pusaka ana ing sabrangane bengawan Yarden ing sacedhake Yerikho sapangetan.”

¹⁶Pangeran Yehuwah ngandika maneh marang Nabi Musa:

¹⁷“Iki jenenge wong kang kudu padha ngedum tanah mau marang sira minangka tanah pusaka, yaiku Imam Eleazar lan Yusak bin Nun.

¹⁸Karomaneh saka saben taler mataha pemimpin siji kang ngrewangi ngedum tanah iku dadi tanah pusaka.

¹⁹Iki jenenge wong-wong mau: saka taler Yehuda: Kaleb bin Yefune;

²⁰saka talere bani Simeon: Samuel bin Amihud;

²¹saka taler Benyamin: Elidad bin Kislon;

²²saka talere bani Dhan sawijining pemimpin: Buki bin Yogli;

²³saka turune Yusuf, kang saka talere bani Manasye sawijining pemimpin: Haniel bin Efod;

²⁴lan saka talere bani Efraim sawijining pemimpin: Kemuel bin Siftan;

²⁵saka talere bani Zebulon sawijining pemimpin: Elisafan bin Parnakh;

²⁶saka talere bani Isakhar sawijining pemimpin: Paltiel bin Azan;

²⁷saka talere bani Asyer sawijining pemimpin: Akhilud bin Selomi;

²⁸saka talere bani Naftali sawijining pemimpin: Pedael bin Amihud.

²⁹Iku mau wong-wong kang padha kakarsakake dening Sang Yehuwah ngedum tanah pusaka marang wong Israel ana ing tanah Kanaan.” [73†] [74†]