Read Kitab Sutji, 1981 MATEUS 1 Bible Online

MATEUS 1 - Kitab Sutji, 1981 bible

MATEUS 1

¹Iki sarasilahe Gusti Yesus Kritus, tedhake Sang Prabu Dawud, tedhake Rama Abraham.

²Rama Abraham peputra Iskak, Iskak peputra Yakub, Yakub peputra Yahuda sasadhereke;

³Yahuda peputra Peres lan Zerah, patutan saka Tamar; Peres peputra Hezron, Hezron peputra Ram;

⁴Ram peputra Aminadab, Aminadab peputra Nahason, Nahason peputra Salmon;

⁵Salmon peputra Boas patutan saka Rakhab; Boas peputra Obed patutan saka Rut; Obed peputra Isai,

⁶Isai peputra Sang Prabu Dawud, Sang Prabu Dawud peputra Sang Prabu Suleman, patutan saka tilas bojone Uria,

⁷Sang Prabu Suleman peputra Rehabeam, Rehabeam peputra Abia, Abia peputra Asa,

⁸Asa peputra Yosafat, Yosafat peputra Yoram, Yoram peputra Uzia;

⁹Uzia peputra Yotam, Yotam peputra Akhas, Akhas peputra Hizkia;

¹⁰Hizkia peputra Manasye, Manasye peputra Amon, Amon peputra Yosia;

¹¹Yosia peputra Yekhonya sasadhereke, nalika jaman pambuwangan menyang Babil. [1†]

¹²Sawise jaman pambuwangan menyang Babil, Yekhonya peputra Sealtiel, Sealtiel peputra Zerubabel;

¹³Zerubabel peputra Abihud, Abihud peputra Elyakim, Elyakim peputra Azor;

¹⁴Azor peputra Zadhok, Zadhok peputra Akhim, Akhim peputra Eliud;

¹⁵Eliud peputra Eleazar, Eleazar peputra Matan, Matan peputra Yakub;

¹⁶Yakub peputra Yusuf bojone Maryam, kang mbabar Gusti Yesus, kang jejuluk Sang Kristus.

¹⁷Dadi gunggunge saka Rama Abraham tumeka Sang prabu Dawud iku ana patbelas turunan, saka Sang Prabu Dawud tumeka ing jaman pambuwangan menyang Babil ana patbelas turunan lan saka jaman pambuwangan menyang Babil tumeka Sang Kristus patbelas turunan.

¹⁸Anadene miyose Gusti Yesus Kristus iku sejarahe mangkene: Nalika Maryam kang ibu lagi pacangan karo Yusuf, sadurunge tunggal sapaturon, tinemu wus ngandheg marga saka Sang Roh Suci. [2†]

¹⁹Sarehne Yusuf bojone iku wong mursid sarta ora gelem mirangake Maryam ana ing ngarepe wong akeh, mulane sumedya medhot pepacangane kanthi sidheman.

²⁰Nanging bareng lagi duwe gagasan mangkono iku, tumuli ana malaekating Pangeran ngatingali sajroning pangimpen, dhawuhe: “He, Yusuf, tedhake Dawud, aja sumelang anggonmu ngepek Maryam dadi bojomu, awit Putra kang kabobotake iku marga saka Roh Suci,

²¹sarta Maryam bakal mbabar putra kakung, iku namakna Yesus; awit iya iku kang bakal ngluwari bangsane saka ing dosane.” [3†]

²²Bab iku anggone kalakon supaya kayektenana apa kang kapangandikakake dening Pangeran lumantar nabi mangkene:

²³“Lah, sang kenya bakal nggarbini sarta mbabar putra kakung, kang asmane bakal sinebut Emanuel, tegese: Gusti Allah nunggil kalawan kita.” [4†]

²⁴Yusuf satangine turu banjur ngestokake kaya kang didhawuhake dening malaekating Pangeran, Maryam dipek bojo,

²⁵nanging ora diwori turu, nganti tumekane wis mbabar putra, kang banjur dinamakake Yesus. [5†]