Read Kitab Sutji, 1981 I TESALONIKA 5 Bible Online

I TESALONIKA 5 - Kitab Sutji, 1981 bible

I TESALONIKA 5

¹Nanging, para sadulur, mungguh mangsa lan wayahe ora prelu daktulis marang kowe,

²amarga kowe wus padha sumurup dhewe kalawan cetha, yen dina rawuhe Gusti iku tekane kaya maling ing wayah bengi.

³Manawa wong-wong padha kandha: Saiki tentrem, ora ana bebaya -- mangka dumadakan wong-wong padha katempuh ing bilai, kayadene wong wadon kang ngandheg dadakan nglarani -- mesthi ora bakal padha bisa ngoncati.

⁴Nanging kowe iku, para sadulur, padha ora ana ing pepeteng, yen ngantia kowe padha kebrejog ing dina ki kaya tekaning maling,

⁵amarga kowe kabeh iku padha dadi anaking raina. Kita iku dudu wong-wonging wengi utawa wong-wonging pepeteng.

⁶Awit saka iku prayogane kita aja turu kaya wong-wong liyane, nanging padha meleka lan sing waspada.

⁷Jalaran wong kang padha turu, iku turune ing wayah bengi, lan kang padha mendem, iku anggone mendem ing wayah bengi.

⁸Nanging kita iki wong-wonging raina, mulane kita kudu waspada, kudu ngrasuk kerening pracaya lan katresnan sarta atetopong pangarep-areping karahayon.

⁹Awit Gusti Allah ora nyadhangake kita marang beendu, nanging supaya oleh karahayon marga dening Gusti Yesus Kristus, Gusti kita,

¹⁰kang wus seda kanggo kita, supaya kita dadia melek, dadia turu, padha ndherek urip kalawan Panjenengane.

¹¹Mulane kowe padha eling-ingelingna lan bangun-binanguna, kayadene kang pancen padha koklakoni iku. [16†] [17†]

¹²Karodene, para sadulur, panjalukku kabeh marang kowe: wong-wong kang padha nyrempeng ing gawe ana ing antaramu, kang nenuntun marang kowe ana ing patunggilane Gusti sarta kang memerdi marang kowe,

¹³iku padha ajenana kang banget kalawan katresnan marga saka pagaweane. Tansah padha rukuna.

¹⁴Aku iya padha aweh pitutur marang kowe, para sadulur, wong kang uripe padha ora tumata iku perdinen, wong kang padha cilik atine iku lipuren, wong kang ringkih padha belanana. Sing sabar marang wong kabeh.

¹⁵Eling-elingen, aja nganti ana wong kang males ala marang wong kang gawe piala, nanging tansah padha ngudia marang kabecikan, iya tumrap para sadulur, iya tumrap wong kabeh.

¹⁶Tansah padha bungaha.

¹⁷Aja kendhat anggonmu ndedonga.

¹⁸Padha ngunjukna panuwun ing sabarang kang tinemu, awit iku kang dikarsakake dening Gusti Allah ana ing Sang Kristus Yesus tumrap kowe.

¹⁹Aja nyirep Sang Roh,

²⁰lan aja ngremehake pamedharing wangsit.

²¹Samubarang kabeh iku titinen, dene kang becik anggonen.

²²Padha ngedohana sarupaning piala.

²³Muga Gusti Allah kang kagungan tentrem-rahayu iku nucekake kowe ing sasampurnane lan muga roh, jiwa lan badanmu rineksa becik kalawan tanpa cacad, besuk rawuhe Gusti Yesus Kristus, Gusti kita.

²⁴Panjenengane kang nimbali kowe iku setya tuhu, Panjenengane iya bakal ngleksanani.

²⁵Para sadulur, aku kabeh padha dongakna.

²⁶Salamku kabeh marang para sadulur kalawan pangambung kang suci.

²⁷Atas asmaning Gusti aku njaluk kanthi banget marang kowe, poma layang iki kawacaa ing ngarepe para sadulur kabeh.

²⁸Sih-rahmate Gusti kita Yesus Kristus, anaa ing kowe kabeh.