Read Jinghpaw Common Language Bible 2009 NINGPAWT NINGHPANG 11 Bible Online

NINGPAWT NINGHPANG 11 - Jinghpaw Common Language Bible 2009 bible

NINGPAWT NINGHPANG 11

¹Shawng e, mungkan ga ting na masha amyu ni hta tsun shaga ai ga langai sha nga ai rai nna dai ga hpe lang nga ma ai.

²Shanhte gaw sinpraw maga de htawt hkawm nga ma yang, Babelon mung hta nga ai pa layang langai mi de du nna dai yang e de nga ma ai.

³Shanhte gaw shada da hpe, “Sa marit! Anhte wut ju nna dai hpe ja hkra kabaw ga,” ngu nna tsun hkat ma ai. Dai rai nna, lang na wut ni hte wut ni hpe chya shakap na hka namsu ni hpe shanhte lu la ma ai.

⁴Shanhte gaw, “Lamu dep langchyi hte mare langai mi hpe anhte jawm galaw ga, shaloi anhte a matu amying gumhkawng shangun lu nna ga ntsa ting hta anhte n bra mat na ga ai,” ngu nna tsun ma ai.

⁵Dai hpang dai MADU gaw shinggyim masha ni galaw da sai mare hte langchyi hpe yu yu na nga, yu hkrat wa wu ai.

⁶Shi gaw, “Yu mu, ndai ni yawng gaw amyu langai sha rai nna ga langai hpe sha shanhte shaga nga ma ai; ndai gaw shanhte nnan galaw hpang ai amu rai nga malu ai. Kade n na yang, shanhte ra sharawng hpa lam hpe mung shanhte galaw lu na mara ai!

⁷Anhte yu sa nna, shanhte a ga hpe shanut kau ya ga; shaloi shada da tsun hkat ai ga hpe shanhte n chye na mat na mara ai,” ngu nna tsun wu ai.

⁸Dai rai nna dai MADU gaw shanhte hpe mungkan ga ting de shabra kau dat wu ai rai nna, mare de ai hpe shanhte jahkring kau ma ai.

⁹Dai MADU gaw amyu masha ni a ga hpe shanut kau nna mungkan ga ting de shabra kau wu ai majaw, dai mare hpe Babelon ngu nna shamying mu ai.

¹⁰Ndai ni gaw Shem a lakung lama ni rai nga ai. Sha-u ing ngut ai hpang ni ning ngu na, Shem a asak 100 ning du ai shaloi, Arhpaza mying ai shadang sha hpe shi shaprat ai.

¹¹Dai hpang shi gaw asak 500 ning naw nga nna shayi shadang sha ni hpe shaprat wu ai.

¹²Arhpaza a asak 35 ning hta shadang sha Shela hpe shaprat wu ai.

¹³Dai hpang shi gaw 403 ning du hkra naw nga nna shayi shadang sha ni hpe shaprat wu ai.

¹⁴Shela a asak 30 ning du ai shaloi, shadang sha Ebera hpe shaprat wu ai.

¹⁵Dai hpang shi gaw 403 ning du hkra naw nga nna shayi shadang sha ni hpe shaprat wu ai.

¹⁶Ebera a asak 34 ning du ai shaloi, shadang sha Hpelek hpe shaprat wu ai.

¹⁷Dai hpang shi gaw 430 ning du hkra naw nga nna shayi shadang sha ni hpe shaprat wu ai.

¹⁸Hpelek a asak 30 ning du ai shaloi, shadang sha Reu hpe shaprat wu ai.

¹⁹Dai hpang shi gaw 209 ning du hkra naw nga nhtawm shayi shadang sha ni hpe shaprat wu ai.

²⁰Reu a asak 32 ning du ai shaloi, shadang sha Seruk hpe shaprat wu ai.

²¹Dai hpang shi gaw 209 ning du hkra naw nga nhtawm, shayi shadang sha ni hpe shaprat wu ai.

²²Seruk a asak 30 ning du ai shaloi, shadang sha Nahora hpe shaprat wu ai.

²³Dai hpang shi gaw 200 ning du hkra naw nga nhtawm shayi shadang sha ni hpe shaprat wu ai.

²⁴Nahora a asak 29 ning du ai shaloi, shadang sha Htera hpe shaprat wu ai.

²⁵Dai hpang shi gaw 119 ning du hkra naw nga nhtawm shayi shadang sha ni hpe shaprat wu ai.

²⁶Htera asak 70 ning du ai hpang, Abram, Nahora hte Haran ni a kawa tai wa sai.

²⁷Dai ndai ni gaw Abram, Nahora hte Haran ni a kawa Htera a matu mara ni a lam rai nga ai. Haran gaw Lawt a kawa rai nga ai,

²⁸shi a kawa naw hkrung nga yang, Babelon mung na shi a daidaw buga Ura mare hta si mat sai.

²⁹Abram gaw Sarai hpe la nna Nahora gaw Haran a shayi sha Milhka hpe la wu ai; bai shi gaw Yisahka a kawa mung rai nga ai.

³⁰Sarai chyawm gaw maudung num rai nna kashu kasha n lu nga ai.

³¹Htera gaw shi a kasha Abram hte shi a kashu Haran a shadang sha Lawt hpe mung, shi a kanam Abram a madu jan Sarai hpe mung shaga woi nhtawm Hkanan mung de sa wa na nga, Babelon mung Ura mare kaw nna pru sa wa ai. Shanhte gaw Haran mare de du hkra sa nhtawm dai yang e nga nga ma ai.

³²Htera chyawm gaw shi a asak 205 ning hta dai mare e si mat sai.