Read Jinghpaw Common Language Bible 2009 NINGPAWT NINGHPANG 14 Bible Online

NINGPAWT NINGHPANG 14 - Jinghpaw Common Language Bible 2009 bible

NINGPAWT NINGHPANG 14

¹Hkawhkam mali rai nga ai, Babelon hkawhkam Amrahpela, Elasa hkawhkam Ariok, Elam hkawhkam Hkedalauma, hte Goim hkawhkam Htidala

²hte gaw hkawhkam manga rai nga ai Sodom hkawhkam Bera, Gomora hkawhkam Birsha, Adma hkawhkam Shinab, Zeboim hkawhkam Shemeba, hte Zoara ngu ai Bela a hkawhkam ni hpe hpyen gasat ma ai.

³Dai hkawhkam manga hte gaw ya aten Jum Nawng ngu ai Sidim Kadit hta sa hpawng nna n-gun galung da nga ma ai.

⁴Shanhte gaw Hkedalauma up ai npu hta shi lahkawng ning tup rawng nga nna shi masum ning hta shi hpe gumlau ma ai.

⁵Shi mali ning hta e Hkedalauma hte shi a jinghku hpyen hpung ni gaw rau sa nhtawm, Ashterot Karnaim hta e Rehpim masha ni hpe mung, Ham hta e Zuzim masha ni hpe mung, Kiriahtim pa hta e Emim masha ni

⁶hpe mung dang kau nhtawm, Edom bum ga hkan e nga ai Hori masha ni hpe mung, zaibru jang nten mahka e nga ai masha ni hpe Elahparan du hkra, shanhte hpe shachyut kau mu ai.

⁷Dai hpang shanhte kayin yu wa nna (Dai aten hta Enmisahpat ngu ai) Kadesha mare de nhtang mat wa ma ai. Shanhte gaw Amalek masha ni a mungdan ting hpe mung, Hazazon Tama e nga ai Amori masha ni hpe mung dang kau ma ai.

⁸Dai hpang Sodom, Gomora, Adma, Zeboim hte Bela hkawhkam ni gaw

⁹shanhte a hpyen luksuk ni hpe shajin da nhtawm, Elam, Goim, Babelon hte Elasa hkawhkam ni hpe Sidim kadit e gasat nga ma ai. Hkawhkam mali hte hkawhkam manga majan gasat nga ma ai.

¹⁰Ya, dai Kadit hta e hka namsu nhkun hkrai pri rai nga ai; shaloi Sodom hte Gomora hkawhkam ni gaw majan pa kaw nna hprawng wa ma yang, dai nhkun ni hta hkrat shajang ma ai; rai ti mung, kaga hkawhkam masum hte gaw bum ga de hprawng lawt wa ma ai.

¹¹Hkawhkam mali ni gaw Sodom hte Gomora mare na arai nga manga hte hpawn lusha shahpa ni hpe htawm la nna wa mat ma ai.

¹²Sodom mare e nga ai Abram a kanau a kasha Lawt hte shi a sut rai yawng hpe mung shanhte la mat wa ya mu ai.

¹³Rai ti mung, hprawng lawt wa ai masha langai mi gaw Amori masha Mamre madu da ai dai chyoi pra ai hpun ni tu ai shara makau e naw nga ai Hebre masha Abram hpang de dai lam yawng sa tsun dan wu ai. Mamre hte shi a kahpu kanau yan rai nga ai Eshkola hte Anera ni chyawm gaw Abram hte ga shaka tawn da ai jinghku ni rai ma ai.

¹⁴Ya Abram gaw shi a kanau a kasha hpe rim mat wa ai lam na jang, majan gasat kung ai masha 318 hte hpe shi a sum hta shaga mahkawng la nhtawm dai hkawhkam mali hte hpe Dan mare du hkra hkan shachyut ma ai.

¹⁵Dai shara e, shi a masha ni hpe hpung hte hpung garan nna shana e dai hpyen ni hpe gasat ai hte shanhte hpe dang kau mu ai. Shi gaw shanhte hpe Damasku mare a dingdung maga,

¹⁶Hoba mare du hkra hkan shachyut ma ai rai nna, shanhte la mat wa sai arai ni yawng hpe nhtang la lu ma ai. Shi gaw shi a kanau a kasha Lawt hte shi a arai ni hpe mung, numsha ni hte hpawn kaga bawng masha ni hpe mung bai woi la lu nga ma ai.

¹⁷Abram gaw Hkedalauma hte kaga hkawhkam ni hpe dang kau nna bai wa ai shaloi, Sodom hkawhkam wa shi hpe sa tau la na nga, Shawe Kadit ngu ai (Hkawhkam Kadit) de pru sa wa wu ai.

¹⁸Tsaw Htum ai Karai Kasang a hkinjawng rai nna, Salem hkawhkam tai nga ai Melhkizedek mung Abram hpang de muk hte sabyi la sa ya nna,

¹⁹shi hpe shaman ya let, “Sumsing lamu hte ginding aga hpe hpan da ai dai Tsaw Htum ai Karai Kasang gaw Abram hpe shaman ya u ga!

²⁰Na a gumlau hpyen ni a ntsa e, nang hpe awng padang jaw ya ai dai Tsaw Htum ai Karai Kasang gaw a nga u ga law!,” nga nna tsun ai. Abram mung shi lu la sai arai mahkra a htam shi hta na htam mi hpe Melhkizedek a lata hta jaw ya wu ai.

²¹Sodom hkawhkam wa gaw Abram hpe, “Arai ni hpe la kau u, rai ti mung, nye a amyu masha ni yawng hpe chyawm gaw ngai hpe nhtang ap ya e,” ngu nna tsun wu ai.

²²Abram gaw, “Na a arai ngu na hpa hpe mung, dai sha n-ga ri yan mi hte kyepdin sumri yan mi du hkra pyi, ngai n la na nngai ngu, Sumsing lamu hte ginding aga hpe hpan da ai wa dai Tsaw Htum ai

²³dai MADU Karai Kasang a man e ngai dagam da se ai. Dai rai nna nang gaw, ‘Abram hpe sut su shangun ai gaw ngai wa rai nga nngai,’ ngu nna galoi mung tsun lu na ndai n rai.

²⁴Nye matu ngu nna hpa hpe mung ngai hta la na n rai. Nye a masha ni lang ai arai hpe chyu sha ngai hkap la na nngai. Rai ti mung nye a jinghku hpung ni rai nga ai Anera, Eshkola hte Mamre ni chyawm gaw shanhte lu la sai gambum hte maren la wa manu ga,” ngu nna htan wu ai.