Read Jinghpaw Common Language Bible 2009 NINGPAWT NINGHPANG 17 Bible Online

NINGPAWT NINGHPANG 17 - Jinghpaw Common Language Bible 2009 bible

NINGPAWT NINGHPANG 17

¹Abram a asak jahku shi jahku ning du ai shaloi, dai MADU gaw shi kaw dan pru nna, “Ngai gaw Chyahtum Chyalai N-gun Rawng Ai Karai Kasang rai nga nngai. Nye a ga hpe madat mara nna teng man ai amu hpe tut nawng a galaw nga u.

²Nye a ga shaka hpe nang hte ngai tawn da nna, law htam ai amyu matu mung nang hpe jaw na nngai,” ngu nna tsun wu ai.

³Abram gaw ga du hkra dingnyawm dagup nga yang, Karai Kasang gaw,

⁴“Ndai ga shaka nang hte shagrin da ni ai; nang gaw masha amyu baw law law a kaji kawa tai wa na lit dai hpe ngai ga sadi jaw nngai.

⁵Na a amying hpe ya kaw nna Abram ngu lu na n rai; ngai nang hpe masha amyu baw law law a kaji kawa shatai nga nngai majaw na a amying hpe Abraham [8] ngu na rai nga ai.

⁶Ngai nang hpe amyu matu law law jaw na we ai; dai ni hta nkau mi hkawhkam hkawseng pru shajang na mara ai. Nang hta amyu matu grai law htam wa nna dai ni gaw amyu baw ni tai wa na mara ai.

⁷“Nang hte mung, du na ra ai ban na na a amyu matu ni hte mung htani htana ga shaka ngu ai nye a ga sadi hpe ngai shatup na nngai. Ngai gaw na a Karai Kasang mung, na a amyu matu ni a Karai Kasang mung tai nga na nngai.

⁸Ya nang tsasam tai nga ai ndai mung ting gaw nang hpe mung, na a amyu matu ni hpe mung ngai jaw na we ai. Ndai Hkanan mung ting hpe na a amyu matu ni htani htana madu lu na mara ai; ngai mung shanhte a Karai Kasang tai nga na nngai.”

⁹Karai Kasang gaw Abraham hpe, “Nang hkum nan hte du na ra ai ban na na a amyu matu ni hte ngai shaka da ai ga shaka hpe shadik shatup lu na matu nang mung myit hkrum ra na ndai.

¹⁰Nanhte hta na lasha shagu hpe matu gadoi ya na matu, nang hte na a amyu matu ni yawng myit hkrum lu na rai myit dai.

¹¹Nanhte gaw ya kaw nna asak nhtoi matsat ya du sai lasha ma chyangai shagu hte hpe mung, nanhte a dum nta ni hta shangai ai mayam lasha shagu hte hpe mung, maigan masha ni a lata kaw nna mari la sai mayam lasha shagu hte hpe mung, matu gadoi ya na rai myit dai. Dai gaw nanhte hte nye a lapran e tawn da ai ga shaka hpe madun dan ai kumla rai nga ai.

¹³Lasha hkum shagu matu gadoi hkam la na rai myit dai, dai gaw nanhte hte tawn da ai htani htana agrin nga ai nye a ga shaka hpe shadan dan ai hkum shan hte seng ai kumla tai na ra ai.

¹⁴Matu gadoi n hkam ai lasha kadai rai ti mung nye a amyu masha hta na sumri dan kau ai hkrum na rai nga ai; hpa majaw nga yang ngai hte shaka tawn ai ga shaka hpe shi n hkan shatup ai majaw rai nga ai,” ngu nna tsun wu ai.

¹⁵Karai Kasang gaw Abraham hpe, “Na a madu jan hpe mung Sarai ngu sana n rai; ya kaw nna shi a mying hpe Sara ngu na rai nga ai.

¹⁶Shi hpe ngai shaman ya nna, shi hta na shadang sha langai mi nang hpe jaw na we ai. Ngai shi hpe shaman ya nna, shi gaw amyu baw ni a kanu tai wa nhtawm; shi a amyu matu ni hta mung, hkawhkam hkawseng ni pru shajang na mara ai,” ngu nna tsun wu ai.

¹⁷Abraham gaw ga du hkra dingnyawm dagup let, “Latsa ning du sai wa gaw kasha naw lu na kun? Jahku shi ning hta Sara kasha naw shangai lu na kun?,” ngu nna mani ai hte shi myit sumru yu nga wu ai.

¹⁸Shi gaw Karai Kasang hpe, “Hpa majaw Ishmaela hpe nye a sali wunli n hkam la shangun a ta?,” ngu nna san wu ai.

¹⁹Rai ti mung, Karai Kasang chyawm gaw, “N rai law, na a madu jan Sara nan na a matu shadang sha shangai ya na ra ai; shi hpe Isak[9] ngu nna shamying na rin dai. Shi hte mung, shi a amyu matu ni hte mung shaka da ai nye a ga shaka hpe htani htana ngai shadik nga na nngai. Dai gaw htani htana hte seng ai ga shaka rai nga ai.

²⁰Ishmaela a lam hte seng nna nang hpyi lajin ai ga hpe ngai na ni ai, dai rai nna ngai shi hpe shaman ya nhtawm kashu kasha hte amyu matu law law shi hpe ngai jaw na nngai. Shi gaw hkawhkam kasha shi lahkawng a kawa tai wa na ra ai. Shi a amyu matu ni hpe mung amyu kaba ngai shatai na we ai.

²¹Rai ti mung htaning ndai aten hta e, Sara shangai na ra ai shadang sha Isak hte mahtang nye a ga shaka hpe shagrin da na nngai,” ngu nna tsun wu ai.

²²Karai Kasang gaw Abraham hpe ga shaga ngut jang shi kaw nna lung mat wa wu ai.

²³Dai shani jang, Abraham gaw Karai Kasang a ga matsun hte maren shi a shadang sha Ishmaela hpe mung, shi a nta na kaga lasha ni yawng hte hpawn shi a nta hta shangai ai mayam lasha ni hte shi mari da sai mayam lasha ni hpe matu gadoi ya wu ai.

²⁴Abraham gaw shi hkum nan matu gadoi hkam ai shaloi jahku shi jahku ning rai nga salu ai.

²⁵Shi a kasha Ishmaela chyawm gaw shi masum ning hta rai nga ai.

²⁶Shan wa lahkawng yan hte rau Abraham a mayam lasha ni yawng mung,

²⁷dai shani jang matu gadoi hkam la ma ai.