Read Jinghpaw Common Language Bible 2009 NINGPAWT NINGHPANG 21 Bible Online

NINGPAWT NINGHPANG 21 - Jinghpaw Common Language Bible 2009 bible

NINGPAWT NINGHPANG 21

¹Dai MADU gaw shi shagrin da sai ga sadi hte maren, Sara hpe shaman ya ai hte shi hta na-um nasin rai wa nna,

²Abraham asak kaba sayang mahtang shi a matu shadang sha shangai ya wu ai. Shi shangai wa na ra ai ngu nna Karai Kasang tsun da ai ahkying hta nan shadang sha shangai wa sai.

³Abraham mung shi hpe Isak ngu nna shamying nhtawm,

⁴Isak asak 8 ya nhtoi du jang, Karai Kasang hkang da ai hte maren Abraham gaw shi hpe matu gadoi ya wu ai.

⁵Isak shangai wa ai shaloi Abraham a asak 100 ning rai nga wu ai.

⁶Sara gaw, “Karai Kasang ngai hpe kabu shangun ai hte mani shangun ni ai; dai lam hpe na ai ni kadai mung ngai hte rau mani na mara ai,” ngu nna tsun wu ai.

⁷Dai hpang shi gaw, “Sara mung kashu kasha ni hpe chyu shachyu na ru ai, nga nna Abraham hpe kadai tsun yu na wu ta? Rai tim shi dingla mat wa ai aten hta she, shi a matu shadang sha langai ya ni ai,” ngu nna tsun kahtap wu ai.

⁸Dai ma mung kaba wa nna chyu jahka ai shani e Abraham mung lusha poi kaba galaw ya wu ai.

⁹Lani mi na aten hta, Egutu num Hagara gaw Abraham a matu shangai ya ai shadang sha Ishmaela hte Sara a shadang sha Isak yan shada shatu ginsup chyai nga ma ai.

¹⁰Sara gaw shan hpe mu nna Abraham hpe, “Ndai mayam num hte shi a shadang sha hpe gawt kau u. Dai numsha a shadang sha gaw nye a shadang sha Isak hkam la ang ai na a sut gan sali wunli a daw chyen mi hpe pyi hkam la lu na n rai,” ngu nna tsun wu ai.

¹¹Ishmaela mung shi a kasha rai nga ai majaw dai lam hpe Abraham nachying myit yak dum nga wu ai.

¹²Rai ti mung, Karai Kasang gaw Abraham hpe, “Dai ma hte na a mayam num Hagara a majaw myit hkum ru et! Sara nang hpe tsun matsun ai hku hkan galaw u. Hpa majaw nga yang, ngai ga sadi tawn da ni ai hte maren, Isak hku nna sha na a amyu matu tai na mara ai.

¹³Ngai gaw mayam num a shadang sha hpe mung kashu kasha law law jaw na nngai; shi gaw na a shadang sha langai rai nga ai majaw shanhte gaw amyu langai tai wa na mara ai.

¹⁴Hpang jahpawt manap jau jau aten hta, Abraham gaw Hagara hpe lusha loi mi hte shanhpyi htingpa hta lu hka ntsin hpring hkra bang nna kasha hte rau dat dat wu ai. Dai hpang ma hpe mung shi a shingma ntsa hta shaba dat ya nhtawm dat dat wu ai. Shi pru mat wa nhtawm Berasheba nam mali hkan kayin hkawm nga ai.

¹⁵Bai gun ai lu hka ntsin ma mat jang, ma hpe mung sumwum kata e tawn kau da nhtawm,

¹⁶dai shara kaw na pe 300 daram tsan ai shara hta sa dung nga wu ai. Shi gaw, “Nye a ma si mat ai mung ngai n mu mayu mat ni ai,” nga nna shi hkum hpe ndawt wu ai. Shi gaw dai shara e dung nga let jahtau hkrap wu ai.

¹⁷Karai Kasang mung dai ma jahtau hkrap ai nsen na wu ai rai nna, sumsing lamu na Karai Kasang a lamu kasa gaw Hagara hpe, “Hagara e, nang hpa baw ru yak tsin-yam hkrum hkra nga n ta? Hkum hkrit nga et, Karai Kasang gaw dai ma a jahtau hkrap ai nsen hpe na ya nu ai.

¹⁸Dai rai nna rawt u, sa nna ma hpe pawn shadaw ai hte shi hpe shalan shabran la su. Shi a amyu matu ni hta na amyu kaba ngai shatai na we ai,” ngu nna tsun wu ai.

¹⁹Dai hpang Karai Kasang shi a myi hpe jahpaw ya wu ai rai nna hka htung langai mi hpe shi mu wu ai. Shi sa nhtawm shanhpyi nhpye hta hka jahpring la nhtawm ma hpe jaw lu wu ai.

²⁰Karai Kasang mung dai ma hte rau rai nga nna, shi galu kaba wa ai hte Hparan nam mali e nga nga let kung kyang ai jaugawng langai mi tai wa nu ai.

²¹Shi a kanu mung shi a matu Egutu shayi sha langai mi tam ya wu ai.

²²Dai aten hte yang, Abimelek gaw shi a hpyen du Hpikola hte rau sa nna Abraham hpe, “Nang galaw ai lam shagu hta Karai Kasang nang hte rau nga nga ai.

²³Dai rai nna ngai hpe mung, nye a kashu kasha ni hte matu mara ni hpe mung, nang n masu hkalem kau ai sha, na a ntsa e ngai sadi dung lai wa ai zawn nang mung nye a ntsa hte ya nang shanu nga ai ndai mung a ntsa e mung, sadi dung nga na ga sadi ndai shara Karai Kasang a man e dagam da e,” ngu nna tsun wu ai.

²⁴Abraham mung, “Ngai ga sadi jaw nngai,” ngu nna tsun wu ai.

²⁵Abraham chyawm gaw Abimelek a shangun ma ni kashun la sai hka htung a lam hte seng nna Abimelek hpe tsun lajin wu ai.

²⁶Abimelek mung dai hpe kadai galaw ai gaw ngai n chye nngai. Nang mung dai lam ngai hpe n tsun dan yu ndai; ndai gaw dai lam hte seng nna shawng na ai shiga rai sai,” ngu nna tsun wu ai.

²⁷Dai hpang Abraham gaw Abimelek hpe sagu hte dumsu nkau jaw nna shan lahkawng a myit hkrum ga shaka hpe shagrin da ma ai.

²⁸Abraham gaw shi a sagu hpung na sagu kasha sanit hpe jahka tawn wu ai.

²⁹Abimelek gaw shi hpe, “Nang hpa majaw dai zawn galaw n ta?,” ngu nna san wu ai.

³⁰Abraham gaw, “Ndai sagu kasha sanit hpe hkap la u. Ndai zawn galaw ai a majaw ndai hka htung hpe ngai htu se ai lam nang yin la lu na ndai,” ngu nna htan wu ai.

³¹Dai yang e shan lahkawng dagam ma ai majaw shara dai hpe Berasheba ngu nna shamying mu ai.

³²Shan gaw Berasheba e myit hkrum ga shaka hpe shagrin da ngut ai hpang, Abimelek hte Hpikola yan mung Hpilisti mung de nhtang mat wa ma ai.

³³Dai hpang Abraham chyawm gaw Berasheba shara e magyeng hpun langai mi hpe hkai nna, htani htana agrin nga ai dai MADU Karai Kasang hpe nawku wu ai.

³⁴Abraham gaw Hpilisti mung e na na wa nga nga wu ai.