Read Jinghpaw Common Language Bible 2009 NINGPAWT NINGHPANG 23 Bible Online

NINGPAWT NINGHPANG 23 - Jinghpaw Common Language Bible 2009 bible

NINGPAWT NINGHPANG 23

¹Sara gaw asak latsa hkun sanit ning du hkra hkrung nga wu ai.

²Sara gaw Hkanan mung na Hebron mare hta si mat ai. Shi si mat ai majaw Abraham sharung shayawt ai hte hkrap ngu hkrap ngoi nga wu ai.

³Abraham gaw shi a madu jan a si mang hpe sharawn tawn ai shara kaw nna pru mat wa nhtawm Heti masha ni hpang de sa mat wa let,

⁴“Ngai gaw ndai yang nanhte a ka-ang e shanu nga ai maigan masha wa rai nga nngai; dai rai nna nye a madu jan hpe lup makoi lu na matu, ngai hpe lamu ga dachyawk mi dut ya mi,” ngu nna tsun wu ai.

⁵Shanhte mung, “Madu e, anhte a ga hpe madat ya mi. Anhte nang hpe n-gun atsam hte hpring ai ningbaw langai zawn mu mada ga ai; dai rai nna anhte lu ai kaja htum ai lup hta na a madu jan hpe lup makoi lu na matu nang hpe lup wa langai anhte kabu gara ai hte jaw na ga ai,” ngu nna htan ma ai.

⁷Dai hpang shanhte a man e, Abraham gaw gum dagup let, “Ndai shara e, nye a madu jan hpe lup makoi na nanhte hkraw myit yang, chyeju hte Zohara a kasha Ehpron hpe shi a sun jahtum makau e nga ai Makhpela ginlawng hku, ngai hpe dut ya na san ya mi. Ndai shara nanhte a man na dai lamu ga a manu jahpu tup tup hte ngai hpe dut ya na matu, shi hpe san ya mi, dai hpe lup wa shara zawn ngai madu da lu na nngai,” ngu nna tsun wu ai.

¹⁰Ehpron shi nan mung mare chyinghka na hpawng ginra hta kaga Heti masha ni hte rau dung nga ai. Dai yang e madat nga ai masha shagu hte gaw, Abraham hpe,

¹¹“Madu e, madat u, ginlawng hku lawm ai sun lamu ga ting nang hpe ngai jaw na nngai. Ndai yang na nye a amyu masha ni a man e nan nang hpe ngai jaw na de ai; na a madu jan hpe nang lup makoi lu na ndai,” ngu nna htan wu ai.

¹²Rai ti mung, Abraham mahtang Heti masha ni a man e gum dagup let

¹³masha shagu mung na la lu mu ga Ehpron hpe, “Ngai nang hpe san yu de ga, chyeju hte madat la ya e. Dai sun ting hpe ngai mari la na nngai, ngai jaw na manu jahpu hpe hkap la ya e; dai shara hta nye a madu jan hpe ngai lup makoi na nngai,” ngu nna tsun wu ai.

¹⁴Ehpron mung, “Madu e, dai lamu ga a manu gaw gumhpraw lap mali tsa sha dan nga ai. Dai gaw an a lapran e hpa wa mi rai nga a ta? Dai shara hta na a madu jan hpe lup makoi u,” ngu nna htan wu ai.

¹⁶Abraham mung myit hkrum ai hte na lawm ai masha ni a man e Ehpron tsun hpaw sai manu hpe hpaga ni jai lang ai gumhpraw mali tsa, shi hpe shen ya wu ai.

¹⁷Ehpron madu da ai dai Mamre a sinpraw maga na Makhpela e nga ai lamu ga gaw Abraham a sut gan tai wa sai. Dai lamu ga hta sun mung, dai ginlawng hku mung, bai sun a jahtum shingnawm du hkra tu ai hpun ni yawng mung lawm nga ai.

¹⁸Dai hpawng ginra hta lawm ai Heti masha yawng hte mung, dai gaw Abraham madu da sai sut gan rai nga ai ngu, jawm hkap masat da ya ma ai.

¹⁹Dai hpang Abraham mung Hkanan mung na dai ginlawng hku hta shi a madu jan Sara hpe lup makoi wu ai.

²⁰Dai rai nna, Heti masha ni madu da ai sun hte dai hta nga ai ginlawng hku gaw Abraham madu nga na lupding lupra shara tai wa sai.