Read Jinghpaw Common Language Bible 2009 NINGPAWT NINGHPANG 24 Bible Online

NINGPAWT NINGHPANG 24 - Jinghpaw Common Language Bible 2009 bible

NINGPAWT NINGHPANG 24

¹Ya Abraham gaw grai dingla wa nna prat kaba nga sai; dai MADU mung shi galaw ai lam shagu hpe shaman ya nu ai.

²Abraham gaw nta na shi lu ai sut rai mahkra hpe up ai asak kaba ai shi a shangun ma wa hpe shaga la nhtawm,

³“Na a lata nye a magyi lapran hta bang nna dagam ru. Ngai sha a matu ningrum ningtau langai ndai Hkanan mung na shayi sha ni hpe n lata hkrup lit ga, sumsing lamu hte ginding aga a MADU Karai Kasang a mying nsang hta ngai nang hpe dagam shangun mayu nngai.

⁴Nye a daidaw mungdan de nang sa nna, ngai sha Isak a matu nye a amyu bawsang ni kaw na ningrum ningtau langai sa la ya lu na rai ndai,” ngu nna tsun wu ai.

⁵Rai ti mung, dai shangun ma wa mahtang, “Dai numsha ndai mungdan de ngai hte rau hkan wa na matu n hkraw ai rai yang kaning di na rai nga a ni? Dai n rai, nang pru kau da ai mungdan de na a nsha hpe ngai bai woi sa wa lu na rai nga a ni?,” ngu nna htan wu ai.

⁶Abraham gaw, “Ngai sha hpe dai de nang bai n woi sa ra hkra sadi nga u!

⁷Dai MADU sumsing lamu a Karai Kasang gaw ngai hpe nye kawa a nta hte nye a amyu bawsang ni shanu ai buga kaw nna woi la nhtawm ndai lamu ga hta nye a amyu matu ni hpe jaw na nga nna ngai hpe shi dagam let ga sadi shagrin da nu ai. Shi gaw shi a lamu kasa hpe na a shawng de shangun dat na ru ai; dai shara hta ngai sha a matu ningrum ningtau langai nang la ya lu na rai ndai.

⁸Dai numsha nang hte rau n hkan nang hkraw ai rai yang chyawm gaw ndai shagrin da sai ga sadi kaw na nang lawt lu na rin dai. Rai ti mung, ngai sha hpe gara hku nna mung bai woi nhtang sa wa lu na n rai,” ngu nna htan wu ai.

⁹Dai rai nna, shangun ma wa mung, shi a madu Abraham a magyi lapran hta shi a lata bang nna, Abraham tsun matsun ai hte maren hkan galaw na matu dagam yin la wu ai.

¹⁰Abraham a sut rai hpe up ai shangun ma wa gaw shi madu a gawla-uk ni hpe byau la nna Nahora shanu nga ai Mesopotamia mung a dingdung maga na mare de sa wa wu ai.

¹¹Shi du shang wa yang, mare shinggan na hka htung makau e, shi a gawla-uk ni hpe jahpum tawn da wu ai. Dai aten gaw numsha ni hka ja na matu pru sa wa ai shana de na ahkying rai nga ai.

¹²Shi gaw, “Dai MADU nye a madu Abraham a Karai Kasang e, dai ni na aten hta awng dang ai lam ngai hpe jaw ya e; nye a madu hpe jaw ai na a ga sadi mung dik wa u ga law.

¹³Ndai mare na num mahkawn ni hka ja na matu pru sa wa na ndai hka htung hta ngai nga nga na nngai.

¹⁴Ngai gaw dai ni hta na marai langai ngai hpe, “Chyeju hte ngai ntsin lu n-ga, na a ntsin di bu shayu u,’ ngu nna tsun yang, shi rai nna, ‘Lu u, na a gawla-uk ni hpe mung ngai ja jaw na nngai,” ngu nna tsun pru wa ai numsha gaw, na a shangun ma Isak a matu, nang san da ya ai jan rai sanu ga. Dai zawn byin wa ai rai yang, nye a madu hpe jaw ai ga sadi hpe nang shadik shatup nga nit dai gaw ngai chye lu na we ai,” ngu nna hpyi wu ai.

¹⁵Ga dai garai n htum yang, yu u Rebeka gaw shi a lahpa ntsa e di bu hpai let du sa wa nga sai. Shi gaw Abraham a kanau Nahora hte madu jan Milhka yan a shadang sha Behtuela a shayi sha rai nga ai.

¹⁶Shi gaw nachying ahpraw tsawm ai hte hkawn jet naw rai nga ai. Dai hka htung de shi yu sa nna ntsin di bu hpe jahpring nhtawm bai lung wa nga ai.

¹⁷Dai shangun ma wa gaw shi hpang de gat sa wa nhtawm, “Chyeju hte na a di bu kaw na ntsin ngai hpe jaw lu e,” ngu nna tsun wu ai.

¹⁸Shi mung, “Madu e, she lu u,” ngu nna shi a lahpa kaw na di bu hpe alawan shayu la nga ai, dai hpe shi lu nga yang, di bu hpe mung jum da ya wu ai.

¹⁹Shi lu ngut jang dai numsha gaw, “Na a gawla-uk ni hpe mung hkru hkra ngai ja jaw na we ai,” ngu nna tsun wu ai.

²⁰Shi a di bu na ntsin hpe yam nga ni hpe jaw ai ntsin htung hta ru bang nhtawm, hka bai ja la na matu hka htung de gat yu wa nna shi gawla-uk ni yawng hka lu ngut ai aten du hkra ntsin ja jaw ya wu ai.

²¹Dai wa mung dai MADU shi hpe awng dang ai lam jaw ya sai rai, n rai hpe chye lu hkra dai numsha hpe atsin sha azi yu nga wu ai.

²²Dai numsha gawla-uk ni hpe ntsin jaw ngut jang, dai wa gaw manu dan ai ja shanghkawng la nna shi a ladi hta noi ya let kaba ai ja lahkawn man mi hpe mung shi a lata hta hkawn ya wu ai.

²³Dai hpang shi gaw, “Chyeju hte na nwa kadai rai nga ai gaw, ngai hpe tsun dan e. Shi a nta hta ngai hte nye a masha ni manam na gawk nga a ni?,” ngu nna san wu ai.

²⁴Shi gaw, “Nye wa mahtang Nahora hte madu jan Milhka yan a kasha Behtuela rai nga ai,” ngu nna htan wu ai.

²⁵Shi gaw, “Anhte a nta hta yihku hte ushat law law nga ai; nanhte a matu nga shara mung nga ai,” ngu nna tsun dan wu ai.

²⁶Shaloi dai wa gaw hput di di let dai MADU hpe nawku wu ai.

²⁷Shi gaw, “Nye a madu hta shi a ga sadi hte maren, sadi sahka hte shatup ya sai nye a madu Abraham a Karai Kasang dai MADU a nga u ga law. Dai MADU gaw ngai hpe nye madu a amyu bawsang ni nga ai de ading sha woi wa ni ai,” ngu nna tsun ai.

²⁸Dai numsha mung shi kanu a nta de gat wa nhtawm byin ai lam yawng hpe wa tsun dan wu ai.

²⁹Ya Rebeka hta Laban mying ai kahpu langai lu wu ai. Shi mung Abraham a shangun ma wa nga ai hka htung de gat sa wa wu ai.

³⁰Shi kajan a ladi shanghkawng hte lata na lahkawn ni hpe Laban mu wu ai. Dai wa kajan hpe kaning nga tsun ai ga hpe shi a kajan kaw na na la wu ai. Shing rai hka htung makau e nga ai shi a gawla-uk ni a makau hta tsap nga ai Abraham a shangun ma hpang de shi sa wa nhtawm, “Nta de ngai hte rau wa ga.

³¹Nang gaw dai MADU a shaman chyeju hpe hkam la ai wa rai nga ndai. Hpa rai ndai shinggan e tsap nga n ta? Nye a nta hta na a matu ya jang mai nga ai gawk langai mi lajang da ya se ai: dai sha n rai, gawla-uk ni a matu nga shara mung nga ai,” ngu nna tsun wu ai.

³²Dai rai nna, dai wa gaw nta de shang mat wa ai hte Laban mung gawla-uk ni hpe hking raw kau ya nhtawm dai ni hpe yihku hte ushat jaw sha wu ai. Dai hpang shi gaw Abraham a shangun ma hte shi a masha ni a matu lagaw shin hka la wa ya wu ai. Bai shat lusha ni hpe la wa ya yang,

³³dai wa gaw, “Ngai tsun ang ai ga hpe tsun ngut ai aten du hkra shat lusha garai n sha na nngai,” ngu nna tsun wu ai. Dai rai nna Laban gaw, ‘Rai taw, she matut tsun yu u,” ngu nna tsun wu ai.

³⁴Shi gaw, “Ngai gaw Abraham a shangun ma wa rai nga nngai,” ngu nna tsun hpang wu ai.

³⁵“Dai MADU gaw nye a madu hpe grai shaman ya nu ai hte sut su shangun nu ai. Dai sha n-ga, sagu, bainam hte dumsu uhpung ni hpe mung, aja gumhpraw ni hte hpawn mayam num mayam la ni, gawla-uk ni hte lawze ni hpe mung shi jaw ya nu ai.

³⁶Nye a madu a madu jan Sara asak kaba sayang she, shi a matu shadang sha langai mi shangai ya wu ai majaw nye a madu shi lu malu mahkra shi a kasha hpe jaw nu ai.

³⁷Nye a madu mung shi hkang da ai ga hpe madat mara na matu ngai hpe ga sadi hte dagam shangun ni ai. Shi gaw, ‘Ngai sha a matu ningrum ningtau langai mi hpe dai Hkanan mung na shayi sha ni hta na nang lata lu na n rai;

³⁸dai hkan na lata la na malai, nye wa a amyu masha ni hte nye a amyu bawsang ni hpang de mahtang sa nna shi a matu ningrum ningtau lata ya lu na ndai,’ ngu nna tsun wu ai.

³⁹Dai rai nna nye a madu hpe, “Dai numsha ngai hte rau n hkan hkraw ai rai yang, kaning di na rai ta?,” ngu nna san we ai.

⁴⁰Shi gaw, ‘Ngai tut nawng e madat mara nga ai dai MADU gaw shi a lamu kasa hpe nang hte rau shangun dat nna nang hpe awng dang ai lam jaw ya na ra ai. Nang mung ngai sha a matu ningrum ningtau langai mi hpe nye a amyu masha ni kaw na mung, nye wa a dinghku kata kaw na mung num la lu na ndai.

⁴¹Nang dagam da ai kaw na lawt lu na ginjang langai sha nga nga ai; dai gaw nye a amyu bawsang ni de nang sa ai hpe n hkap la ai rai yang chyawm gaw nang lawt lu na rin dai,’ ngu nna htan wu ai.

⁴²“Ngai gaw, ‘Ya dai ni ndai hka htung de ngai du ai shaloi, nye a madu Abraham a dai MADU Karai Kasang hpe chyeju hte ngai galaw nga ai lam hta awng dang ai lam jaw ya e.

⁴³Ndai hka htung makau e ngai nga nga nngai. Nang de num mahkawn langai mi hka ja sa na matu, pru sa wa ai shaloi shi a di bu kaw na lu hka ntsin ngai hpe jaw lu na matu hpyi nngai.

⁴⁴Shi dai hpe hkraw ya nna nye a gawla-uk ni hpe mung hka ja jaw na nngai, nga nna tsun wa ai rai yang, dai numsha gaw nye madu a shadang sha a ningrum ningtau hpe nang lata san da ya ai jan rai u ga, ngu nna hpyi we ai.

⁴⁵Ya dai lam, nye a kraw kata e shing ngu akyu hpyi tsun ai pyi garai n htum yang, Rebeka gaw shi a lahpa hta ntsin di bu hpai nna sa wa nhtawm hka ja na matu hka htung de yu wa wu ai. Dai rai nna ngai shi hpe, “Chyeju hte ngai hpe ntsin jaw lu e,” ngu nna tsun we ai.

⁴⁶Shi mung shi a lahpa na ntsin di bu hpe tin tin shayu ya nhtawm, ‘She lu u, na a gawla-uk ni hpe mung ngai ja jaw na we ai,’ ngu nna tsun ai. Dai rai nna ngai ntsin lu ni ai, shi mung gawla-uk ni hpe hka ja jaw wu ai.

⁴⁷Ngai mung shi hpe, “Na nwa kadai rai nga a ta?,” ngu nna san we yang, shi gaw, Nye wa gaw Nahora hte Milhka yan a kasha Behtuela rai nga ai,” ngu nna htan wu ai. Dai hpang ngai gaw shi a ladi hta shanghkawng hte lata hta lahkawn ni hpe hkawn ya nngai.

⁴⁸Ngai mung hput di nna dai MADU hpe nawku nngai. Nye a madu a shadang sha a matu dai shayi sha hpe ngai sa mu ai shara ngu ai nye madu a amyu bawsang hpang de ading sha woi sa wa ai nye madu Abraham a Karai Kasang dai MADU hpe shakawn kungdawn nngai.

⁴⁹Ya chyawm gaw, nye a madu hpe nanhte maga na lit hpe shatsup ya na myit makun ai hte shi hpe htuk tsawm ai hku lajang na rai myit yang mung, chyeju hte ngai hpe tsun dan mi; dai hku n tsun lu ai rai yang mung, kaning rai galaw na hpe ngai daw dan na nngai,” ngu nna tsun wu ai.

⁵⁰Laban hte Behtuela yan mung, “Ndai lam gaw dai MADU hpajang ai lam rai nga ai hte maren, dai amu hpe an n chye daw dan lu na ga ai.

⁵¹Yu u, nang e Rebeka nga nga ai; shi hpe woi wa u. Dai MADU nan tsun sai hte maren, na madu a shadang sha a madu jan shi tai nu ga,” ngu nna htan ma ai.

⁵²Ga dai hpe Abraham a shangun ma wa na ai shaloi jang shi gum dagup let dai MADU hpe nawku wu ai.

⁵³Dai hpang hpun palawng ni hpe shi la shapraw nhtawm aja, gumhpraw sumli arai ni hte hpawn Rebeka hpe jaw wu ai. Shi a kanu yan kayung hpe mung manu dan ai kumhpaw kumhpa ni jaw ya wu ai.

⁵⁴Dai hpang Abraham a shangun ma wa hte shi kaw hkan nang ai ni mung lusha sha nna shana nhtoi shalai ma ai. Hpang jahpawt shanhte rawt wa yang shi gaw, “Nye madu a nta de bai wa lu n-ga,” ngu nna tsun wu ai.

⁵⁵Rai ti mung, Rebeka a kanu yan kayung chyawm gaw, “Ndai numsha anhte hte rau bat mi shing n rai nhtoi shi ya dang naw nga nga u ga; dai hpang mahtang shi hkan nang wa u ga,” ngu nna tsun wu ai.

⁵⁶Rai ti mung shi mahtang, “Anhte hpe hkum hkum da mani. Dai MADU gaw anhte a hkrun lam hpe abu abai n nga hkra lajang da ya mani ai; nye a madu hpang de she, ngai nhtang wa lu u ga law,” ngu nna tsun wu ai.

⁵⁷Shanhte gaw, “Dai rai taw gaw, dai numsha hpe anhte shaga la nna shi hpa mi naw tsun ra ai hpe san yu na ga ai,” ngu nna tsun ma ai.

⁵⁸Dai rai nna shan gaw Rebeka hpe shaga la nhtawm, “Nang ndai wa kaw hkan mayu nga n ni?,” ngu nna san mu ai. Shing rai nna shi mung, “Rai sa, hkan nang wa na nngai,” ngu nna htan wu ai.

⁵⁹Shing rai, shanhte gaw Rebeka hte shi a shingnan num hpe Abraham a shangun ma hte shi a masha ni hte rau hkan nang shangun mu ai.

⁶⁰Shanhte mung Rebeka hpe ning nga ai ga ni hte shaman ya mu ai: “Anhte a kajan e, nang gaw masha mun mun sen sen ni a kanu tai wa nit ga law! Na a amyu matu ni mung shanhte a gumlau hpyen ni shanu ai mare ni hpe madu la lu mu ga law!”

⁶¹Dai hpang Rebeka hte shi a shangun ma numsha ni mung rawt nang nna Abraham a shangun ma wa hte rau wa na matu gawla-uk ni hta jawn let shanhte yawng pru mat wa ma ai.

⁶²Isak gaw, “Ngai Hpe Mu Ai Asak Hkrung Ai Wa A Hka Htung” nga ai nam mali kata de sa wa nhtawm Hkanan mung a dingda daw de nga nga wu ai.

⁶³Shi chyawm gaw shana maga de loi jau jau re ai aten hta pa layang hkan e hkawm chyai na nga, pru mat wa yang, gawla-uk ni wa ai hpe mu wu ai.

⁶⁴Rebeka mung Isak hpe mu wu yang, gawla-uk kaw nna yu nhtawm,

⁶⁵Abraham a shangun ma wa hpe, “Wora pa e anhte maga de hkawm sa wa ai wa gaw kadai wa rai nga a ta?,” ngu nna san wu ai. Dai shangun ma wa mung, “Shi gaw nye a madu rai nga ai,” ngu nna htan wu ai. Dai rai nna shi gaw du gyit sumpan hpe la nhtawm shi a myi man hpe magap da wu ai.

⁶⁶Dai shangun ma wa mung shi galaw sai lam shagu Isak hpe tsun dan wu ai.

⁶⁷Dai hpang Isak gaw kanu Sara nga lai wa sai sum kata de woi shawn la wu ai. Rebeka mung shi a madu jan tai wa sai. Isak mung Rebeka hpe tsaw ra wu ai rai rai nna, kanu a yawn hta na shalan shabran hkrum wu ai.